پاکستان توں ہیپاٹائٹس سی دے خاتمے کیتے کوششاں کیتی ونڄن، وزیراعظم شہباز شریف

اسلام آباد۔18مارچ  (اے پی پی) وزیر اعظم محمد شہباز شریف  پاکستان توں ہیپاٹائٹس سی دے خاتمے کیتے وفاقی تے صوبائی حکومتاں اتے سارے سٹیک ہولڈرز دی کوششاں تے زور ݙیندیں ہوئیں  وزیراعظم دے ہیپاٹائٹس سی دے خاتمے دے پروگرام کوں پورے ملک اچ ودھاوݨ دا عزم کیتا۔ گلگت بلتستان اچ وزیر اعظم دے ہیپاٹائٹس سی دے خاتمے دے قومی پروگرام دے پائلٹ پراجیکٹ دی کامیاب تکمیل دے موقع تے منگل کوں تھیوݨ آلی تقریب توں خطاب کریندیں ہوئیں وزیراعظم ملک اچ ایں بیماری دے اثرات نال نبڑݨ کیتے ایں اقدام دی اہمیت تے زور ݙتا۔ انہاں ایں بارے آغا خان خان ڈیویلپمنٹ نیٹ ورک اتے عالمی ادارہ صحت ( ڈبلیو ایچ او ) دے تعاون دی تعریف کریندیں ہوئیں آکھیا جو ہیپا ٹائٹس یونٹ ابتدائی طور تے پاکستان کڈنی اینڈ لیور انسٹی ٹیوٹ  اچ ٻݨایا ڳئیا ہئی اتے بعد اچ ایندا دائرہ ٻئے سرکاری ہسپتالاں تئیں کھنڈایا ڳئے جتھ مریضاں کوں سو فیصد مفت علاج دی سہولت ݙتی ویندی پئی اے۔ وزیراعظم افسوس کیتا جو 2018 اچ نویں حکومت اے پروگرام بند کر ݙتا ہئی اتے میں وزارت عظمیٰ دا منصب سنبھالݨ دے بعد فورا اے پروگرام ولا شروع کیتا۔ انہاں یقین کیتا جو اڄوکی حکومت دی کوششاں نال ہیپاٹائٹس سی دا ٻہوں جلدی ملک توں خاتمہ تھی ویسی۔ انہاں ݙسیا جو وفاقی حکومت اسلام آباد اچ جناح میڈیکل سینٹر ٻݨیندی پئی اے جو صحت عامہ دے شعبہ اچ پاکستان دا جانزہاپکنز ہسپتال ثابت تھیسی۔ ایں توں پہلے وزیراعظم گلگت بلتستان دے پائلٹ پراجیکٹ اچ تعاون کرݨ آلیاں اچ شیلڈز تقسیم کیتی جئیں اچ وفاقی وزیر منصوبہ بندی احسن اقبال، وزیر صحت مصطفیٰ کمال، وزیر مملکت برائے صحت مختار بھرتھ ، نادرا دے چیئر مین ، پاکستان اچ ڈبلیو ایچ او دے نمائندے اتے ٻئے شامل ہن۔ وفاقی وزیر منصوبہ بندی تے ترقی احسن اقبال ایں موقع تےڳالھ مہاڑ کریندیں ہوئیں آکھیا جو پاکستان اچ ہیپا ٹائٹس سی ٻہوں تکھے کھنڈدا پئے جیڑھا ٻہوں تشویشناک اے۔ انہاں آکھیا جو حکومت 2029 تئیں ایں مرض دے خاتے کیتے پرامید اے۔  وزیر صحت سید مصطفیٰ کمال ملک توں ہیپاٹائٹس سی دے خاتمے دے وزیراعظم دے وژن دی تعریف کیتی۔ پاکستان اچ عالمی ادارہ صحت (ڈبلیو ایچ او) دے نمائندے ڈاکٹر لو ڈپینگ آکھیا جو انہاں دا ادارہ ایں بیمارے دے پورے خاتمے تئیں ایں پروگرام دی حمایت اچ پاکستان دے نال کھڑا رہسی۔ ایں موقع تے وفاقی وزیر اطلاعات عطا اللہ تارڑ اتے ٻئے اعلیٰ حکام وی موجود ہن۔