پارلیمانی کمیٹی قومی سلامتی دا متفقہ اعلامیہ  منظور،  دہشت گردی کوں ایندیاں ساریاں شکلاں اچ مکاݨ سانڳے پاکستان دے غیر متزلزل عزم دا اعادہ ، ریاست دی پوری طاقت نال سٹریٹجک اتے متفقہ سیاسی عزم تے زور

اسلام آباد۔18مارچ(اے پی پی) پارلیمانی کمیٹی قومی سلامتی ھک متفقہ اعلامیہ دی منظوری ݙتی اے جیں اچ کمیٹی دہشت گردی کوں ایندیاں ساریاں شکلاں اچ مکاوݨ سانڳے پاکستان دے غیر متزلزل عزم دا اعادہ کیتے اتے ریاست دی پوری طاقت نال ایں خطرے دا مقابلہ کرݨ سانڳے سٹریٹجک اتے ھک متفقہ سیاسی عزم تے زور ݙیندے انسداد دہشت گردی سانڳے قومی اتفاق دی لوڑھ تے زور ݙتے ، کمیٹی پروپیگنڈا کھنڈاوݨ ، اپݨے پیروکاراں کوں بھرتی کرݨ تے حملیں کوں مربوط کرݨ سانڳے دہشت گرد گروپاں دی طرفوں سوشل میڈیا پلیٹ فارمز دے ودھدے غلط استعمال تے شدید تشویش کیتی تے اینکوں روکݨ سانڳے وختی اقدامات تے زور ݙتے ۔ وزیراعظم محمد شہباز شریف پارلیمانی کمیٹی قومی سلامتی  دے اجلاس دا اعلامیہ پڑھ تے سݨائے ۔ اعلامیہ اچ آکھیا ڳئے جو ملکی سلامتی دی موجودہ صورتحال دا جائزہ گھنݨ سانڳے پارلیمانی کمیٹی قومی سلامتی دا اجلاس پارلیمنٹ ہائوس ا تھئے ۔  اجلاس اچ قومی سلامتی دی پارلیمانی کمیٹی دہشت گردی دی اڄوکی کارروائیاں دی واضح الفاظ اچ مذمت کیتی تے متاثرہ خانداناں نال یکجہتی کیتی ۔ کمیٹی انسداد دہشت گردی آپریشنز دے انعقاد اچ سکیورٹی فورسز اتے قانون نافذ کرݨ آلے اداریں دی بہادری ، شجاعت اتے پیشہ وارانہ مہارت دی تعریف کریندے دہشت گردی کوں ایندیاں ساریاں شکلاں اچ مکاوݨ سانڳے پاکستان دے غیر متزلزل عزم دا اعادہ کیتے۔  کمیٹی ریاست دی پوری طاقت نال ایں خطرے دا مقابلہ کرݨ سانڳے سٹریٹجک تے ھک متفقہ سیاسی عزم تے زور ݙیندے انسداد دہشت گردی سانڳے قومی اتفاق دی لوڑھ تے زور ݙتا ۔ کمیٹی دہشت گرداں دے نیٹ ورکس کوں مکاوݨ ، لاجسٹک سپورٹ  دے انسداد اتے دہشت گردی و جرائم دے ڳٹھ جوڑ کوں مکاوݨ سانڳے نیشنل ایکشن پلان تے عزم استحکام دی حکمت عملی تے وختی عملدرآمد تے زور ݙتے ۔کمیٹی پروپیگنڈا کھنڈاوݨ ، اپݨے پیروکاراں کوں بھرتی کرݨ تے حملیں کوں مربوط کرݨ سانڳے دہشت گرد گروپاں دی طرفوں سوشل میڈیا پلیٹ فارمز دے ودھدے غلط استعمال تے شدید تشویش کیتی تے ایں کوں روکݨ سانڳے وختی اقدامات تے زور ݙتے۔ کمیٹی دہشت گرداں دے ڈیجیٹل نیٹ ورکس دے سدباب سانڳے طریقہ کار وضح کرݨ تے زور ݙتے۔ افواج پاکستان اتے قانون نافذ کرݨ آلے اداریں دی غیر متزلزل حمایت دا اعادہ کریندے کمیٹی  انہاں دیاں قربانیاں اتے ملکی دفاع دے عزم دا اعتراف کیتے تے آکھیے جو قوم دہشت گردی دے خلاف جنگ اچ مسلح افواج، پولیس، فرنٹیئر کانسٹیبلری اتے انٹیلی جنس ایجنسیاں دے رلے کھڑی اے ۔ کمیٹی ایں ڳالھ دا اعادہ کیتے جو دشمن قوتاں نال ملی بھگت نال کم کرݨ آلے کہیں وی ادارے، فرد یا گروہ کوں پاکستان دے امن و استحکام کوں ضیان پڄاوݨ دی اصلوں اجازت نہ ݙتی ویسی کمیٹی حزب اختلاف دے کجھ ارکان دی عدم شرکت تے افسوس کریندے اعادہ کیتے جو ایں بارے مشاورت دا عمل جاری رہسی ۔ سپیکر قومی اسمبلی دی زیر صدارت اجلاس اچ وزیراعظم شہباز شریف، پارلیمانی کمیٹی دے ارکان، سیاسی قائدین،  چیف آف آرمی سٹاف جنرل سید عاصم منیر، اہم وفاقی وزراء تے فوج اتے انٹیلی جنس ایجنسیاں دے اعلیٰ حکام شرکت کیتی۔سپیکر قومی اسمبلی سردار ایاز صادق اے اعلامیہ منظوری سانڳے قومی سلامتی کمیٹی اچ پیش کیتا جیں دی کمیٹی متفقہ طور تے منظوری ݙے ݙتی۔