دہشت گرد عناصر کوں ہر قیمت تے ہریسوں، صدر مملکت دی بلوچستان دی پارلیمانی پارٹیاں دے اراکین نال ملاقات، اہم اجلاس نال خطاب

اسلام آباد/ کوئٹہ۔19مارچ(اے پی پی):صدر مملکت آصف علی زرداری آکھیے جو بلوچستان کیتے عوامی فلاح و بہبود دے اقدامات موچر کیتے ویسن، دہشت گرد عناصر کوں ہر قیمت تے ہریسوں، انسداد دہشت گردی ونگ کوں جدید اسلحہ ݙیسوں۔ اے ڳآلھ انہاں کوئٹہ اچ بلوچستان دی پارلیمانی پارٹیاں دے اراکین نال ملدے اتے امن و امان دی صورتحال بارے اہم اجلاس دی صدارت کریندے آکھی۔ صدر مملکت کوں بلوچستان اسمبلی اچ اپوزیشن لیڈر و سیاسی جماعتاں دے پارلیمانی لیڈراں صوبے دے مسلیاں اتے عوامی منصوبیاں تے بریفنگ ݙتی۔ ملاقات اچ پاکستان پیپلزپارٹی دے چیئرمین بلاول بھٹو زرداری وی موجود ہن۔ صدر آکھیے جو بلوچستان دی ترقی و عوام دی بہبود ہمیشہ اولین ترجیح رہی اے، اساں قومی یکجہتی نال وطن عزیز کوں اڳو تے ڳھن ونڄݨے، اساں حق ڈݙیوݨ چاہندے ہیں کھسݨ نئیں، عید دے بعد بلوچستان اچ کیمپ لیساں اتے ساریاں دی ڳالھ سݨساں۔ ملاقات اچ قائم مقام گورنر بلوچستان کیپٹن (ر) عبدالخالق اچکزئی اتے وزیر اعلیٰ بلوچستان میر سرفراز بگٹی وی موجود ہن۔ نیشنل پارٹی دے سربراہ ڈاکٹر عبدالمالک بلوچ، پاکستان مسلم لیگ دے پارلیمانی لیڈر میر سلیم خان کھوسہ، عوامی نیشنل پارٹی دے پارلیمانی لیڈر انجینئر زمرک خان اچکزئی اتے جماعت اسلامی دے رکن میر عبدالمجید بادینی ملاقات اچ شریک ہن۔ بلوچستان کابینہ دے ارکان، صوبائی وزراء، پارلیمانی سیکرٹریز تے ایم پی ایز وی ملاقات اچ ہن۔ بعد اچ صدر مملکت آصف علی زرداری امن و امان دی صورتحال بارے جائزہ اجلاس دی اڳواݨی کیتی۔ وزیر اعلیٰ بلوچستان میر سرفراز بگٹی صوبے اچ امن و امان دی صورتحال تے بریفنگ ݙتی۔ صدر مملکت آکھیا جو دہشت گرد قوم کوں تقسیم کرݨ چاہندن، ریاست ہر صورت راہݨے، اساں دہشت گردی دے خلاف جنگ جیتݨی اے۔ اجلاس اچ قائم مقام گورنر بلوچستان کیپٹن (ر) عبدالخالق اچکزئی، چیف سیکرٹری بلوچستان شکیل قادر خان، آئی جی پولیس معظم جاہ انصاری سودھا ٻئے اعلیٰ حکام شرکت کیتی۔