یوم پاکستان: مسلح افواج دی پریڈ، شیردل فارمیشن دا فلائی پاسٹ

اسلام آباد۔23مارچ(اے پی پی) یوم پاکستان دے موقع تے ایوان صدر اچ ترائی مسلح افواج دی مشترکہ پریڈ اچ پاک فوج ، پاک بحریہ تے پاک فضائیہ دےچاق و چوبند دستیں مارچ پاسٹ کیتے، قومی پرچم کوں سلامی ݙتی ،شیردل فارمیشن فلائی پاسٹ کیتے۔ ایوان صدر اچ تھیوݨ آلی پریڈ دے مہمان خصوصی صدر مملکت آصف زرداری ہن ۔ تقریب اچ سروسز چیفس، سپیکر قومی اسمبلی سردار ایاز صادق، چیئرمین سینٹ سید یوسف رضا گیلانی دے علاؤہ غیرملکی سفیراں سودھ اہم شخصیات شرکت کیتی۔ صدر مملکت آصف زرداری روایتی بگھی اچ تقریب اچ پڄے ، بگل وڄا تے اعلان کیتا ڳئے ، صدر مملکت استقبالیہ کمیٹی دے ارکان نال ہتھ ملائے، وزیراعظم شہباز شریف، وزیر دفاع خواجہ آصف اتے مسلح افواج دے سربراہان اسٹیج تے موجود رہیے ۔یوم پاکستان دی پریڈ اچ پاک فضائیہ دے شاہیناں فلائی پاسٹ دا مظاہرہ کرتے دشمن تے لرزہ طاری کرݙتا ، پاک فضائیہ دی شیر دل فارمیشن شاندار فضائی مظاہرہ کیتے، جے ایف 17 تھنڈر، ایف 16، جے 10 سی، میراج طیاریں دے ذریعے شاندار فلائی پاسٹ کیتے۔صدر آصف علی زرداری یوم پاکستان دی تقریب دے شرکا کوں مبارخ ݙیندے آپݨے خطاب اچ آکھیے اڄ دے ݙینھ لکھاں مسلماناں دی قربانیاں دی یاد تازہ کریندوں ، لکھاں قربانیاں پاروں پاکستان داخواب حقیقت اچ بدلیا ، شہدا دی قربانیاں کوں خراج تحسین پیش کریندوں اساں ٻہوں قربانیاں ݙے تے آزادی ڳھدی۔