چیئرمین سینیٹ سید یوسف رضا گیلانی نال امریکی ناظم الامور نٹالی اے بیکر دی ملاقات

اسلام آباد۔24مارچ(اے پی پی) چیئرمین سینیٹ سید یوسف رضا گیلانی نال امریکی ناظم الامور نٹالی اے بیکر اڄ اسلام آباد اچ ملاقات کیتی۔ملاقات اچ ݙوہیں ملکاں وچال تاریخی اتے پراݨے تعلقات تے ڳالھ مُہاڑ کیتی ڳئی ایں دوران پاکستان اتے امریکہ وچال ݙوطرفہ تعلقات، تجارتی تعاون، سفارتی تعلقات، توانائی، موسمیاتی تبدیلی، زرعی شعبے اچ شراکت داری اتے سکیورٹی تعاون جیھے اہم امور زیر بحث آئے۔ چیئرمین سینیٹ سید یوسف رضا گیلانی آکھیے امریکہ پاکستان دا ھک پراݨہ شراکت دار اے اتے ݙوہیں ملکاں دے تعلقات 7 ݙھاکیں تے محیط ہن۔ انہاں آکھیے بطور وزیراعظم پاکستان انہاں 2008 اچ امریکی صدر جارج بش تے 2012 اچ صدر براک اوباما نال ملاقاتاں کیتن، جنھاں اچ ݙو طرفہ تعاون کوں مزید وسعت ݙیوݨ تے زور ݙتا ڳیا ہئی ۔ سید یوسف رضا گیلانی دا مزید آکھݨ ہئی جو امریکہ پاکستان دی ساریں توں وݙی برآمدی منڈی اے اتے تجارتی تعلقات مزید مستحکم کرݨ دی لوڑھ اے۔ چیئرمین سینیٹ آکھیے پاکستان اچ امریکی سرمایہ کاری دے وسیع موقع موجود ہن تے توانائی، بنیادی ڈھانچے اتے ٹیکنالوجی دے شعبیں اچ مزید امریکی سرمایہ کاری ضروری اے۔ انہاں آکھیے کاروباری ماحول کوں چنڳاں بݨاوݨ نال ݙوہیں معیشتاں کوں فیدہ تھیسی تے ترقی دے نویں موقع پیدا تھیسن ۔چیئرمین سینیٹ سید یوسف رضا گیلانی ایں ڳالھ تے زور ݙتے جو موسمیاتی تبدیلی، توانائی اتے زراعت ماچ سانجھے تعاون کوں ودھارا ݙتا ونڄݨا چاہیدے تاں جو پاکستان تے امریکہ مشترکہ طور تے جدید ٹیکنالوجی اتے پائیدار ترقی دے منصوبیں تے کم کرسڳن ۔ چیئرمین سینیٹ آکھیے انسداد دہشت گردی اچ پاکستان دی قربانیاں دنیا دے سامݨے ہن تے عالمی امن و استحکام سانڳے پاکستان دا کردار اہم اے ،افغانستان اچ امن و استحکام سانڳے پاکستان دا کردار کلیدی حیثیت رکھیندے تے خطے اچ امن سانڳے پاک-امریکہ تعاون ویلھے دی اہم لوڑھ اے ۔ ملاقات اچ پارلیمانی سفارت کاری ودھاوݨ تے اتفاق تھئے ایں توں انڄ  بائیوٹیکنالوجی، خلائی تحقیق تے مصنوعی ذہانت دے شعبیں اچ تعاون ودھاوݨ دے امکانات تے ڳالھ مہاڑ تھئی ۔چیئرمین سینیٹ آکھیے امریکہ اچ رہݨ آلی پاکستانی کمیونٹی ھک اہم اثاثہ اے جیڑھا ݙوہیں ملکاں وچال عوامی رابطے کوں مزید مستحکم کرسڳدی اے ۔چیئرمین سینیٹ سید یوسف رضا گیلانی آکھیے جو پاکستان تے امریکہ کوں اختراع اتے اقتصادی ترقی دے نویں موقع تلاش کرݨے چاہیدن ، انہاں آکھیے جدید زراعت اتے حیاتیاتی تنوع اچ امریکہ نال شراکت داری ودھاوݨ دی لوڑھ اے تاں جو غذائی تحفظ اتے زرعی پیداوار اچ بہتری گھن آئی ونڄ سڳے ۔چیئرمین سینیٹ آکھیے پاکستان عالمی سطح تے امن و استحکام سانڳے بے شمار قربانیاں ݙتن تے ݙوہیں ملکاں دے سفارتی مشنز انھاں تعلقات کوں مزید مستحکم کریندے پئن ۔ملاقات دے چھیکڑ تے ݙوہیں رہنماواں ایں عزم دا اظہار کیتے جو پاکستان اتے امریکہ وچال تعلقات مزید مستحکم کیتے ویسن تے سانجھے تعاون نال ترقی دے نویں موقع بݨائے ویسن ۔ ݙوہیں ملکاں دے عوام وچال رابطے کوں مزید مستحکم کرݨ تے سفارتی تعلقات اچ بہتری سانڳے مسلسل رابطے جاری رکھݨ تے اتفاق کیتا ڳئے۔