اسلام آباد۔24مارچ(اے پی پی)وزیراعظم محمد شہباز شریف آکھیے جو پاکستان دی ترقی کیتے زرعی شعبہ دی ترقی ٻہوں ضروری اے، کسان کوں بہترین بیج، کھاد و اصلی زرعی ادویات ݙے تے ولا زرعی انقلاب ڳھن آیا ونڄ سڳدے، جنوبی کوریا دے تعاون نال آلو دا بہترین بیج ہݨ پاکستان اچ ہی ٻݨایا ویسی۔ نیشنل ایگریکلچرل اینڈ ریسرچ سنٹر دے دورے ویلھے جدید ایروپانکس طریقے نال کاشت دی افتتاحی تقریب نال خطاب کریندے وزیر اعظم آکھیا جو پاکستان دے زرعی سائنسدان اتے ماہرین وݙی محنت و لگن نال زراعت دی ترقی کیتے ردھے ہوئن جیندے نال ساݙا زرعی شعبہ ضرور ترقی کریسی۔ وزیر اعظم نیشنل ایگریکلچرل ریسرچ سنٹر اسلام آباد اچ سیڈ پوٹاٹو پروڈکشن اینڈ ایروپانکس کمپلیکس دا افتتاح کیتے۔ اے کمپلیکس اعلیٰ درجے دی ایروپانکس ٹیکنالوجی نال آلو دے تصدیق شدہ بیج دی پیداوار کیتے کوریا پارٹنرشپ فار انوویشن آف ایگریکلچر (کوپیا) اتے پاکستان ایگریکلچرل ریسرچ کونسل (پی اے آر سی) وچال ہک اہم شراکت داری دا منصوبہ اے جیندے نال پاکستان اچ آلو دے بیج دے معیار اتے دستیابی اچ بہتری سودھا آلو دی پیداواری لاگت ڳھٹاوݨ اتے سستے آلو دی پیدوار یقینی ٻݨاوݨ اچ مدد ملسی۔ ایں موقع تے وفاقی وزیر فوڈ سکیورٹی رانا تنویر حسین سودھا وفاقی وزراء، ارکان اسمبلی، جنوبی کوریا دے قائم مقام سفیر، زرعی ماہرین وی موجود ہن۔ وزیراعظم جمہوریہ کوریا دے تعاون نال آلو دے بیج دی تیاری کیتے ادارے دے قیام تے مبارک ݙتی۔ وزیراعظم آکھیا جو زراعت دی پاکستان دی معیشت اچ اہم حیثیت اے، ڄیکر پاکستانی کساناں کوں بہترین بیج، کھاد و اصلی زرعی دوائیاں مناسب قیمت تے ݙتیاں ونڄن تاں پاکستان اچ ہک واری ولا زرعی انقلاب برپا کیتا ونڄ سڳدے، ایں سانڳے وفاقی و صوبائی حکومتاں کوں رل تے کم کرݨا ہوسی۔ وزیراعظم آکھجیا جو ایں جدید سنٹر دے ٻݨݨ نال آلو دا بہترین اتے زیادہ پیداوار و منافع آلا بیج ملسی،ساکون اپݨے کساناں دا شکریہ ادا کرݨا چاہیدے جیندی محنت نال زرعی شعبہ چلدا پئے، زراعت دی ترقی نال ہی معیشت ترقی کریسی۔ وزیراعظم ایس ایم ایز کوں آکھیا جو او دیہات اچ نوجواناں اچ سرمایہ کاری کرن، لائیو سٹاک، سبزیاں و پھلاں دی پیداوار ودھائی ونڄے، کولڈ سٹوریج اتے ٹرانسپورٹیشن دے شعبہ اچ بہتری کرݨی ہوسی۔ تقریب نال وفاقی وزیر غذائی تحفظ رانا تنویر حسین اتے آر ڈی اے کوریا دے ایڈمنسٹریٹر کوان جے ہان وی تقریب نال خطاب کیتے۔ ایں توں پہلے وزیراعظم نیشنل انسٹی ٹیوٹ فار جینومکس اینڈ ایڈوانسڈ بائیو ٹیکنالوجی دا وی افتتاح کیتے۔
