وفاقی وزیر بین الصوبائی رابطہ رانا ثناء اللہ دی آسٹریلوی ہائی کمشنر نیل ہاکنز نال ملاقات

اسلام آباد۔25مارچ  (اے پی پی) وفاقی وزیر بین الصوبائی رابطہ رانا ثناء اللہ نال آسٹریلوی ہائی کمشنر نیل ہاکنز ملاقات کیتی، جئیں اچ ݙوپاسے تعلقات، سانجھے تعاون اتے خطے دی مجموعی صورتحال تے ڳالھ مہاڑ کیتی ڳئی ۔ آسٹریلوی ہائی کمشنر نیل ہاکنز پاکستان دی دہشت گردی دے خلاف قربانیاں دی تعریف کریندے آکھئے پاکستان امن دے قیام سانڳے بے مثال جدوجہد کیتی اے۔ انہاں ایں عزم دا اظہار کیتے جو آسٹریلیا پاکستان نال مختلف شعبیں اچ تعاون کوں مزید ودھارا ݙیسی ۔ وفاقی وزیر رانا ثناء اللہ ایں موقع تے آکھئے جو پاکستان تے آسٹریلیا وچال تکڑے تعلقات سانجھی ترقی سانڳے اہم ہن تے ݙوہیں ملکاں کوں تعلیم ، تجارت تے سرمایہ کاری سودھے مختلف شعبیں اچ تعاون ودھاوݨا چاہیدے۔ انہاں ایں ڳالھ تے زور ݙتے جو پاکستان خطے اچ امن و استحکام سانڳے کلیدی کردار نبھیندا پئے تے عالمی برادری کوں قیام امن اچ پاکستان دے تجربے توں فیدہ چاوݨا چاہیدے۔ انہاں مزید آکھئے سیاسی استحکام اتے ترقی لازم و ملزوم ہن تے جمہوری روایات دے ودھارے نال ہی ملک اچ حقیقی استحکام ممکن تھیسی ۔ انہاں ایں ڳالھ تے وی زور ݙتے جو تکڑی معیشت تے چنڳے خارجہ تعلقات دے بغیر ترقی ممکن کائنی، ایں سانڳے پاکستان اقتصادی استحکام کیتے بھرپور اقدامات کریندا پئے ۔ ملاقات دے مکݨ تے ݙوہیں رہنماواں ݙو پاسے تعلقات کوں مزید مستحکم بݨاوݨ تے مختلف شعبیں اچ تعاون ودھاوݨ دا عزم کیتے۔