نوجواناں دی تربیت، جدید ٹیکنالوجی اچ سرمایہ کاری نال پاکستان کڄھ سالاں اچ ترقی یافتہ ملک ٻݨ ویسی، وزیراعظم شہباز شریف

اسلام آباد۔27مارچ(اے پی پی)وزیراعظم محمد شہباز شریف آکھیے جو نوجوان ساݙے کیتے ہک چیلنج دے نال نال ہک عظیم موقع وی ہین،  نوجواناں کوں آئی ٹی، مصنوعی ذہانت اتے پیشہ وارانہ تربیت ݙویڄے تاں او ملک دا عظیم سرمایہ ٻݨسن، نوجواناں دی تربیت، جدید ٹیکنالوجی اچ سرمایہ کاری نال پاکستان کڄھ سالاں اچ ترقی یافتہ ملک ٻݨ ویسی، مقروض زندگی کوں وقار اچ بدلݨے، دعا اے جو آئی ایم ایف دا موجودہ پروگرام ملکی تاریخ دا آخری پروگرام ثابت تھیوے۔ ہو اے ڳالھ وزیراعظم پرائم منسٹرز ڈیجیٹل یوتھ ہَب دے اجراء دی تقریب نال خطاب کریندے آکھی۔ تقریب اچ وفاقی وزیر اطلاعات و نشریات عطا اللہ تارڑ،  وزیرامور کشمیر و گلگت بلتستان امیر مقام، وفاقی وزیر انفارمیشن ٹیکنالوجی شزہ فاطمہ خواجہ وی موجود ہن۔ وزیراعظم محمد شہبازشریف آکھیا جو اڄ دا ݙینھ نویکلا اتے خوشی دا ݙینھ اے، ڄݙاں کہیں کوں مصنوعی ذہانت دا پتا وی نا ہا میں اوں زمانے اچ بطور وزیر اعلیٰ پنجاب تعلیم، صحت و نوجواناں کیتے ترجیحی اقدامات کیتن، پنجاب اچ 2011 توں 2018 تئیں میرٹ تے 4 لکھ لیپ ٹاپ ہونہار طلبا و طالبات کوں مفت ݙتن، اڄ دی دنیا ٹیکنالوجی دی دنیا اے، اللہ پاکستان کوں کئی قدرتی نعمتاں ݙتن جیندے اچ نوجوان ہک ہین، ڄیکر آزاد کشمیر، گلگت بلتستان اتے پورے ملک دے کروڑاں نوجواناں کوں تربیت اتے جدید ٹیکنالوجی ݙیوݨ تے سرمایہ کاری کیتی ونڄے تاں پاکستان تیکھے ترقی یافتہ ملک ٻݨ ویسی جیندے کیتے ودھ محنت کرݨی ہوسی۔ انہاں آکھیا جو رانا مشہود احمد خان کوں پروڈکٹو ایمپلائمنٹ دا ٹاسک ݙتا ڳئے تاں جو نوجواناں کوں زرعی اتے صنعتی شعبیاں، آئی ٹی ہائوسز، یونیورسٹیاں اتے ٹیکنیکل سنٹرز اچ بہترین تربیت دے بعد ملازمت ݙیوائو۔ انہاں آکھیا جو اساں اپݨے اخراجات ڳھٹ کر ݙیسوں ٻھل پاکستان دے نوجواناں کوں بہترین تربیت ݙتی ویسی، ساݙے ٹریننگ سنٹرز اچ بہترین ٹرینرز آوݨے چاہیدن، اپݨے نینگراں کوں بہترین ہنر ݙیسوں، تاں جو ملک دا مستقبل شاندار ٻݨے۔ وزیراعظم آکھیا جو این پورٹل نال صوبیاں نال رل تے وسائل ݙتے ویسن، 77 سال اچ ساݙے قرضے ٻہوں ودھ ڳن، آئی ایم ایف پروگراماں نال قوماں ترقی نئیں کرینداں ٻھل معاشی اشاریاں کوں مستحکم کوں کیتا ونڄ سڳدے اتے اے استحکام پاکستان اچ آڳئے، آئی ایم ایف نال سٹاف لیول معاہدہ تھی ڳئے، آئی ایم ایف بورڈ آف گورنر دے مئی دے اجلاس اچ ہک ارب ڈالر دی اگلی قسط منظور تھی ویسی، ساکوں نوجواناں، کساناں، صنعتکاراں اتے نوجواناں کوں معاشی طور تے تکڑا کرݨا ہوسی، میں چھیکڑی ساہ تئیں تہاݙے حقوق دی جنگ لڑدا رہساں اتے قوم کوں قرضیاں توں چھڑویساں، ساکون قرض توں جان چھڑاوݨ کیتے اپݨی پیداوار اتے برآمدات ودھاوݨیاں ہوسن، انشااللہ ݙینھ رات محنت کر تے پاکستان کوں اپݨے پیریں تے کھڑا کریسوں۔ ایں توں پہلے تقریب نال وزیراعظم یوتھ پروگرام کے چیئرمین رانا مشہود احمدخان، یونیسیف پاکستان دی آفیسر انچارج  شرمیلا رسول، گلوبل سیمی کنڈکٹر گروپ دے چیئرمین نوید شیروانی، اقوام متحدہ دے ریذیڈنٹ کوآرڈینیٹر محمد یحییٰ وی خطاب کیتے۔