انتہا پسندی، نفرت اتے تقسیم دے رویے اسلامی تعلیمات دے منافی ہین، وزیراعظم شہباز شریف دا اسلامی نظریاتی کونسل دی گولڈن جوبلی تقریب نال خطاب

اسلام آباد۔27مارچ(اے پی پی)وزیراعظم محمد شہباز شریف آکھیے جو انتہا پسندی، نفرت اتے تقسیم دے رویے اسلامی تعلیمات دے منافی ہین، اسلامی نظریاتی کونسل اتے علماءکرام نوجوان نسل کوں منفی رویاں اتے کوڑے پروپیگنڈہ توں بچاوݨ کیتے کردار ادا کرن، قیام پاکستان دے اصل مقاصد سانڳے اجتماعی تدبر اتے حکمت عملی نال ودھدے ہوئے پاکستان دا ناں سڄاکا کرݨ کیتے کوششاں کرݨیاں ہوسن جیندے کیتے کونسل قائدانہ کردار نٻھاوے۔ انہاں اے ڳالھ اسلام آباد اچ اسلامی نظریاتی کونسل دی گولڈن جوبلی تقریب نال خطاب اچ آکھی۔ انہاں گولڈن جوبلی تے مبارک ݙیندے آکھیے جو بابائے قوم اتے مفکر پاکستان دے پاکیزہ خواباں کوں عملی شکل ݙیوݨ کیتے 1973 دے آئین دے تحت اسلامی نظریاتی کونسل ٻݨی ہئی، خوشی اے جو اے ادارہ اپݨے مقاصد اچ کامیابی نال ودھدا پئے۔ وزیراعظم آکھیے جو کونسل دے چیئرمین علامہ راغب نعیمی دے بزرگ وی دین دی خدمت اچ ردھے رہین، انہاں دے شہید سرفراز نعیمی دہشت گردی کوں خلاف اسلام قرار ݙتے، چیئرمین اسلامی نظریاتی کونسل ساکوں ݙسائے جو کیویں جنگجو تحریکاں طاقت دی تݙ تے من مانیاں کیتن اتے کیویں اسلامی نظریاتی کونسل انہاں دے اڳو بند ٻدھیے، ایں خدمت کوں پاکستان دے عوام ہمیشہ یاد رکھسن۔ اے ڈینھ یاد گار اے جو جیڑھے مقصد کیتے اے ملک اتے ادارہ ٻݨایا ڳیا ہا او ہک کار مسلسل اے ڄئیں اپݨی ذمہ داری وݙی محنت، دیانتداری اتے ذوق و شوق نال پوری کیتی اے اتے ایندا صلہ اللہ ݙیسی۔ وزیراعظم آکھیے جو اسلامی بنکاری دا کامیاب نظام متعارف کراوݨ کونسل دا کریڈٹ اے، ایندے نال کئی اسلامی ممالک اچ اسلامی بنکاری دا نظام ودھیے اتے ہݨ غیر مسلم ملک وی ایندے تے کم کریندے پین۔ وزیراعظم آکھیے جو انتہا پسندی، نفرت اتے تقسیم دے رویے اسلامی اتحاد، اخوت و بھائی چارے دی تعلیمات اتے سوچ دے منافی ہین، علما حق خاص کر کونسل دی ذمہ داری اے جو او نوجوان نسل کوں بچاون اتے قرآن و سنت دے مطابق رل تے معاشرے دی رہنمائی کرن، کونسل دے ارکان فرقہ واریت توں پاک اتے قوم اچ وحدت اتے اتحاد اچ رکاوٹاں مکاوݨ کیتے رل تے کم کریندے پین۔ انہاں آکھیا جو جدید ٹیکنالوجی دنیا کوں وٹا تے رکھ ݙتے ساکوں وی ایندی رفتار دے نال ٹرݨا ہوسی جیندے کیتے اسلام اجتہاد دا راستہ ݙکھائے، ایں سانڳے اسلامی نظریاتی کونسل دا کردار اہم اے۔ وزیر اعظم آکھیا جو ساکوں ریاست، معاشرے اتے فرد دے طور تے اسلام دے روشن رستے تے ٹرݨے تاں جو قیام پاکستان دے اصل مقاصد حاصل تھیون۔ وزیراعظم آکھیے جو قائداعظم دی عظیم قیادت اچ قوم قربانیاں ݙتن اتے پاکستان معرض وجود اچ آئے، ساݙا فرض اے جو انہاں قربانیاں کوں ݙیہدے ہوئے اوں رستے تے ٹروں جیندے کیتے اے خطہ ونݙیا ڳئے۔ انہاں کونسل کوں دعو ت ݙتی جو او اڳو تے ودھے اتے معاشرے اچ ہم آہنگی سانڳے قائدانہ کردار ادا کرے، اساں ایندے پچھو ٹرسوں تاں جو پاکستان ہک حقیقی اسلامی رفاحی ریاست ٻݨے۔ تقریب اچ اسلامی نظریاتی کونسل دے چیئرمین علامہ راغب نعیمی خطاب کریندے آکھیے جو اسلامی نظریاتی کونسل دی گولڈن جوبلی تے یادگاری ٹکٹ دی اشاعت کیتی اتے ایکوں وزیراعظم پذیرائی بخشی اے، ایں سانڳے کونسل اپݨی 50 سالہ کارکردگی رپورٹ وی جاری کیتی اے۔ تقریب نال اسلامی نظریاتی کونسل دے سابق چیئرمین قبلہ ایاز وی خطاب کیتے۔