وزیراعظم ڈیجیٹل یوتھ ہب دی افتتاحی تقریب، نوجواناں کوں 4 اہم شعبیاں اچ مواقع سانڳے “ون سٹاپ شاپ” پلیٹ فارم دا اہم قدم

اسلام آباد۔27مارچ(اے پی پی)وزیراعظم یوتھ پروگرام دے تحت وزیراعظم  ڈیجیٹل یوتھ ہب دی افتتاحی تقریب اسلام آباد اچ تھئی اے جیندے اچ وزیراعظم محمد شہباز شریف، سرکاری افسران، آئی ٹی اتے روزگار دے شعبیاں نال جڑے مہماناں، مختلف ممالک دے سفیراں اتے نوجواناں دی وݙی تعداد شرکت کیتی۔ وزیراعظم ڈیجیٹل یوتھ ہب نوجواناں کوں بااختیار ٻݨاوݨ کیتے وزیراعظم یوتھ پروگرام ہیٹھ ہک اہم اقدام اے۔ اے ہک “ون سٹاپ شاپ” پلیٹ فارم اے جتھاں کوئی وی وزیر اعظم دے یوتھ پروگرام دے چار اہم شعبیاں تعلیم، روزگار، مصروفیت، اتے ماحولیات نال رابطہ کر سڳدے اتے اے مصنوعی ذہانت نال چلݨ آلا پروگرام اے۔ ایپ آئی او ایس اتے اینڈرائیڈ موبائل ڈیوائسز تے ایندے متعلقہ پلے سٹورز توں ڈاؤن لوڈ کیتے ونڄ سڳدن اتے ویب سائٹ www.pmyp.gov.com تے وی رسائی ممکن اے۔ تقریب نال وزیراعظم یوتھ پروگرام دے چیئرمین رانا مشہود احمد خان آکھیا جو ڈیجیٹل یوتھ ہب ہک پورٹل اے جیڑھا نوجواناں کوں ملازمتاں، تعلیم، سکالرشپ، قرضیاں، کھیݙاں، موسمیاتی تبدیلیاں، ماحولیات، انٹرن شپ، رضاکارانہ مواقع، آئی ٹی، آرٹس، ثقافت سودھا ٻئے اینڄھے شعبیاں توں فیدہ چاوݨ اچ ہتھ ونݙیسی۔ اے پروگرام نوجواناں کوں مصنوعی ذہانت نال چلݨ آلی سفارشات اتے وسائل تئیں ذاتی رسائی ݙے تے انہاں دی ترقی اچ ہتھ ونݙا تے بااختیار ٻݨیسی۔ تقریب اچ مہماناں کوں پلیٹ فارم بارے آگاہی کیتے ہک تعارفی ویڈیو وی ݙکھائی گئی جیندے اچ ایندے استعمال دا طریقہ کار اتے ٻئے اقدامات شامل ہن۔ تقریب نال یونیسیف دی آفیسر انچارج شرمیلا رسول، گلوبل سیمی کنڈکٹر گروپ دے چیئرمین نوید شیروانی، اقوام متحدہ دے ریزیڈنٹ کوآرڈینیٹر محمد یحییٰ وی خطاب کیتے۔