تکنیکی معاونت،علم دی بنیاد تے معیشت اچ تعاون پاک چین تعلقات دا اہم حصہ اے، وفاقی وزیر خزانہ محمداورنگزیب دا چائنا ڈیلی کوں انٹرویو

اسلام آباد۔28مارچ(اے پی پی)وفاقی وزیر خزانہ و محصولات سینیٹر محمد اورنگزیب چین پاکستان اقتصادی راہداری (سی پیک) کوں ٻہوں اہم منصوبہ قرار ݙیندے آکھیے جو سی پیک دے ݙوڄھے مرحلہ اچ بزنس ٹوبزنس اتے سرمایہ کاری دے منصوبیاں کوں ترجیح ݙتی ویندی پئی اے، تکنیکی معاونت،علم دی بنیاد تے معیشت اچ تعاون پاک چین تعلقات دا اہم حصہ اے۔ چائنا ڈیلی کوں انٹرویو اچ انہاں آکھیا جو پاکستان اتے چین آئرن برادرز اتے اہم تزویراتی شراکت دار ہین، سی پیک چین دے روڈ اینڈ بیلٹ اقدام دا پرچم بردار منصوبہ اے، منصوبے دے پہلے مرحلے اچ پاکستان اچ بنیادی ڈھانچہ ٻمیے، ہݨ ایں منصوبے دے ݙوڄھے مرحلہ اچ ویندے پئے ہیں ڄیڑھا بنیادی ڈھانچہ دے مونیٹائریشن دا منصوبہ اے، ایندے اچ سرمایہ کاری بیسڈ اقدامات ہوسن ڄیویں بزنس ٹو بزنس رابطیاں و منصوبیاں کوں اہمیت ݙتی ویسی۔ وزیرخزانہ آکھیا جو سی پیک دے ݙوڄھے مرحلہ اچ وسیع تر استعداد موجود اے، پاکستان مصنوعی ذہانت اتے ٹیکنالوجی دے ٻئے شعبیاںاچ وی چین نال معاونت چاہندے، چین دی کمپنی ہواوے نہ صرف کلاوڈکمپیوٹنگ ٻھل ٻئے شعبیاں اچ وی پاکستان نال ہتھ ونݙیندی پئی اے، ایویں ہی پاکستان اچ ہزاراں طلباء اتے فری لانسرز کوں تربیت ݙتی ویندی پئی اے۔ وزیرخزانہ آکھیا جو زراعت اتے ڈیجیٹل ٹرانسفارمیشن سودھا ہر اہم شعبہ اچ ݙوہیں ملک قریبی تعاون ودھیندے پین، چین دے بینکاں مالیاتی شمولیت اچ وݙی پیش رفت کیتی اے ایں سانڳے اساں چین دے تجربات توں فیدہ چاوݨ چاہندے ہیں، پانڈا بانڈ دے اجراء کیتے پاکستان چائنا انٹرنیشنل کیپٹل کارپوریشن دی بطور مشیر خدمات ڳھدن اتے کریڈٹ ودھارے کیتے ایشیئن انفراسٹرکچر انویسٹمنٹ بینک اتے ایشیائی ترقیاتی بینک نال وی رابطہ کیتے، امید اے جو ایں سال پاکستان پانڈا بانڈجاری کر ݙیسی۔