سخت چیلنجز دے باوجود قابلِ ستائش کامیابیاں ڳھدن، وفاقی وزیر صحت دا ورلڈ ہیلتھ اسمبلی دے 78ویں اجلاس توں خطاب

جنیوا۔ 21 مئی (اے پی پی) وفاقی وزیر صحت سید مصطفیٰ کمال آکھیے جو اساں عالمی ادارہ صحت دے عالمی صحت دے ودھارے اچ کلیدی کردار کوں خراج تحسین پیش کریندوں۔ پاکستان عالمی ادارہ صحت دے صحت متعلق عالمی ایجنڈے نال اپݨی غیر متزلزل وابستگی دا اعادہ کریندے ۔ جنیوا، ورلڈ ہیلتھ اسمبلی دے 78ویں اجلاس توں خطاب کریندے ہوئیں انہاں آکھیے جو رکن ملکاں اَتے بین الحکومتی مذاکراتی ادارے ولوں عالمگیر وبا متعلق معاہدے دی تیاری دیاں کوششاں دی تعریف کریندوں ۔ انہاں آکھیے جو سخت چیلنجز دے باوجود اساں کئی قابلِ ستائش کامیابیاں حاصل کیتن، زچہ اَتے بچہ اموات اچ کمی، حفاظتی ٹیکے جات دی کوریج اچ وادھا کیتے۔ ٻہوں بیماریاں جیویں تپِ دق، ایچ آئی وی، ملیریا، ڈینگی اَتے ہیپاٹائٹس دے خلاف موثر اقدامات شامل ہن۔ پولیو مکاوݨ کوں اساں اپݨی پہلی ترجیح سمجھدوں ۔ انہاں آکھیے جو وزیراعظم دی قیادت اچ وختی پاکستان کوں پولیو فری بݨیسوں۔ وفاقی وزیر صحت آکھیے جو بھارتی جارحیت اچ نشوم ٻالاں سودھے شہریاں کوں نشانہ بݨایا ڳئے، پاکستان بھارت دے خلاف جارحیت دا بھرپور جواب ݙتا۔ انہاں آکھیے جو فلسطین دے خلاف اسرائیلی جارحیت دی بھرپور مذمت کریندوں، ہسپتالاں اَتے طبی عملے کوں ڄاݨ بُجھ تے نشانہ بݨاوݨ دی شدید مذمت کریندوں ۔ عالمی برادری کروڑاں لوکاں دی زندگی خطرے اچ پاوݨ تے بھارت توں جواب منڳے ۔ بھارت ولوں پاݨی کوں ہتھیار دے طور تے استعمال کرݨ پاکستان اچ صحتِ عامہ دے مستقبل کیتے سنگین خطرہ اے۔ انہاں آکھیے جو دریائے سندھ دا نظام نہ صرف محفوظ پیوݨ دا پاݨی ݙیندے بلکہ 80 فیصد فصلاں کوں سیراب کریندے، اساݙے ہسپتالاں اَتے صفائی دے نظام کوں توانائی ݙیندے ۔ پاݨی کوں ہتھیار بݨاوݨ اَتے طبی انفراسٹرکچر کوں نشانہ بݨاوݨ بین الاقوامی قوانین دی کھلی خلاف ورزی اے، صحت دے بنیادی انسانی حق تے حملہ اے۔