سندھ مدرسته الاسلام یونیورسٹی اچ ‘پائیدار کمپیوٹنگ اتے آرٹیفیشل انٹیلیجنس’ دے موضوع تے ݙو ݙیھاڑی بین الاقوامی کانفرنس

کراچی۔21 مئی(اے پی پی)سندھ مدرستہ الاسلام یونیورسٹی اچ “پائیدار کمپیوٹنگ اینڈ اے آئی: شیپنگ دی فیوچر آف انڈسٹری اینڈ سوسائٹی” دے موضوع تے چوتھی بین الاقوامی کانفرنس شروع تھی ڳئی۔ چیئرمین سندھ ہائر ایجوکیشن کمیشن (سندھ ایچ ای سی) پروفیسر ڈاکٹر طارق رفیع اتے سندھ مدرستہ الاسلام یونیورسٹی دے وائس چانسلر ڈاکٹر مجیب صحرائی یونیورسٹی دے شاہنواز بھٹو آڈیٹوریم اچ کانفرنس دا افتتاح کیتا۔ کانفرنس نال خطاب کریندے ڈاکٹر طارق رفیع آکھیا جو ایس ایم آئی یو دا دورہ کرݨ انہاں کیتے اعزاز دی ڳالھ اے کیوں جو اے بانی پاکستان قائد اعظم محمد علی جناح اتے ݙوجھے وݙے رہنماواں دی مادر علمی اے۔

چیئرمین سنڌ ایچ ای سی آکھیا جو ایس ایم آئی یو دے وائس چانسلر دا انہاں کانفرنساں دے انعقاد دے پچھے اہم کردار اے اتے سنڌ ایچ ای سی ہمیش ایس ایم آئی یو دی ترقی اتے اوندیاں سرگرمیاں اچ تعاون کریندا رہیا اے۔ کانفرنس دے حوالے نال چیئرمین سندھ ایچ ای سی آکھیا جو ساکوں پاکستان دیاں یونیورسٹیاں اچ ریسرچ کلچر کوں فروغ ݙیوݨے، انفارمیشن ٹیکنالوجی زندگی کوں بہوں تکھا بدل ݙتے، ایں کیتے مستقبل انفارمیشن ٹیکنالوجی دا اے خاص کر مصنوعی ذہانت (آرٹیفیشل انٹیلیجنس – اے آئی) دا، جیندے تے ودھ توجہ ݙیوݨی ہوسی، ٹیکنالوجی اچ تبدیلی گزریل 30 سالاں توں تھیندی پئی اے، ایں سانڳے نینگراں کوں وی ایندے نال واقف ہووݨا چاھیدے۔ انہاں آکھیا جو حالیہ بھارتی جارحیت اچ اساں ایں ٹیکنالوجی دا استعمال ݙٹھے اتے پاکستان ثابت کیتے جو او دشمن کوں منہ توڑ جواب ݙیوݨ دی تکنیکی صلاحیت رکھیندے۔ چیئرمین سندھ ایچ ای سی آکھیا جو اے کوئی روایتی جنگ کائناں ہئی ٻھل ہک سائبر وار ہئی، اساں تبدیلی کوں روک نئیں سڳدے، ایں کیتے اے طالب علماں، استاداں اتے وائس چانسلراں کیتے وی ہک چیلنجنگ دور اے۔ انہاں دا آکھݨ ہا جو تعلیم اتے صحت تے توجہ ݙے تے پاکستان کوں ترقی ݙتی ونڄ سڳدی اے۔ انہاں سندھ اچ اعلیٰ تعلیم کوں ودھاوݨ اتے ݙوجھے صوبیاں دی اعلیٰ تعلیم کیتے مختص کیتے ڳئے بجٹ توں ودھ بجٹ ݙیوݨ تے سندھ حکومت دی تعریف کیتی۔