تریمتیں کوں مرکزی دھارے اچ رلائے بغیر معاشی ترقی دا خواب پورا تھیوݨ اوکھا اے، وفاقی وزیر اورنگزیب خان کھچی

اسلام آباد۔21 مئی(اے پی پی)وفاقی وزیر برائے قومی ورثہ و ثقافت اورنگزیب خان تریمتیں دے کردار کوں قومی ترقی اچ اہم قرار ݙیندے آکھیے جو پاکستان دا مستقبل تریمتیں نال جڑیا ہوئے، کوئی وی معیشت او تئیں اپݨی مکمل صلاحیت حاصل نی کر سڳدی جے تئیں او تریمتیں دی قابلیت، قیادت اتے حوصلے کوں مکمل طور تے نا رلاوے۔ اے ڳالھ انہاں کراچی اچ تھیوݨ آلے سیمینار نال خطاب اچ آکھی۔ سیمینار دا عنوان ” تریمتیں کاروباری لوکاں کیتے پائیدار نظام دی تشکیل” اتے “تریمتیں اتے زراعت: قیادت، جدت اتے اثرات” ہا۔ سیمینار اچ وفاقی و صوبائی حکومتاں دے نمائندے، ترقیاتی ادارے، مالیاتی ادارے، نجی شعبے نال متعلقہ لوکاں اتے ݙوجھے مقامی رہنماواں دے علاوہ انسانی حقوق کمیشن، پلاننگ اینڈ ڈویلپمنٹ ڈیپارٹمنٹ، ویمن چیمبر آف کامرس اینڈ انڈسٹری، نیشنل انکیوبیشن سینٹر، موبی لنک مائیکروفنانس بینک، پاکستان سنگل ونڈو اتے ݙوجھے اہم اداریاں دے نمائندیاں شرکت کیتی۔ پاکستان پاورٹی ایلیویشن فنڈ (پی پی اے ایف) دے سی ای او نادر گل بریچ آکھیا جو ساݙا مشن ایہو اے جو اساں کمیونٹی دی سطح تے تریمتیں دی صلاحیتاں کوں ودھائوں تاں جو او ترقی دے سفر پندھ اچ رل تے قائدانہ کردار ادا کرن۔ صوبائی وزیر زراعت سردار محمد بخش زراعت دے شعبے اچ تریمتیں دے کردار دی تعریف کریندے آکھیا جو تریمتیں کوں جدید وسائل، حقوق اتے سنڄاݨ ݙیوݨ دا ویلھا آڳئے تاں جو او بدلدے ڄڳ اتے معیشت دی ترقی اچ ہتھ ونݙا سڳن۔ سیمینار نال وزیراعلیٰ سندھ دی مشیر تنزیلہ امِ حبیبہ ادارہ جاتی ہم آہنگی اتے پالیسی دی شفافیت تے زور ݙتے۔ سیمیانر دے شرکا تریمتیں دیاں مشکلات جیویں صنف تے مبنی مالی خدمات، زراعت، ڈیجیٹل شمولیت، قیادت دی ترقی اتے بغیر معاوضے گھریلو کم کوں تسلیم کرݨ جھیں اقدامات تے زور ݙتے۔ ایں موقع تے ہک مشترکہ ورکنگ گروپ تشکیل ݙیوݨ تے اتفاق کیتا ڳیا جیڑھا سرکاری و نجی شعبے دے شراکت داراں تے مشتمل ہوسی۔