معیاری مصنوعات ݙیوݨ سانڳے “ون ونڈو” کوالٹی ایشورنس نظام متعارف کرایا ویسی، وفاقی وزیرخالد حسین مگسی

اسلام آباد۔22مئی(اے پی پی) وفاقی وزیر سائنس و ٹیکنالوجی خالد حسین مگسی نال کاسمیٹکس صنعت دے نمائندہ وفد ملاقات کیتی جئیں اچ ملکی سطح تے صنعت کوں پیش آوݨ آلے مسئلیں، چیلنجز اتے موقعیں تے تفصیلی ڳالھ مہاڑ تھئی۔ وزارت سائنس و ٹیکنالوجی توں جاری بیان موجب ، وفد ݙسایا جو معیاراں دی کمی، جانچ دے نظام دی سست روی اتے برآمدات اچ رکاوٹاں ایں شعبے دی ترقی اچ وݙی رکاوٹ ہن۔ خالد حسین مگسی یقین ݙیوائے جو حکومت صنعت دی ترقی اچ ہر ممکن تعاون ݙیویسی تاں جو مقامی مصنوعات عالمی مارکیٹ اچ مؤثر طریقے نال متعارف کرائی ونڄ سڳن۔ انہاں آکھیے جو صارفین کوں معیاری مصنوعات ݙیوݨ سانڳے ہک مربوط اتے سوکھا “ون ونڈو” کوالٹی ایشورنس نظام متعارف کرایا ویسی، جݙاں جو انسانی استعمال دی ساریاں مصنوعات دی سخت اتے جامع جانچ کوں یقینی بݨایا ویسی۔ وفاقی وزیر آکھیے جو حکومت نہ صرف معیار کوں بین الاقوامی سطح تے اُچا کریسی بلکہ برآمدات دے ودھارے کیتے وی عملی اقدامات کریسی۔ انہاں آکھیے جو پاکستانی کاسمیٹکس مصنوعات اچ بھرپور صلاحیت موجود اے جیہڑی بہتر پالیسیاں، تعاون اتے نگرانی دے ذریعے عالمی سطح تے اجاگر کیتی ونڄ سڳدی اے۔ وزارت سائنس و ٹیکنالوجی ایں حوالے نال پالیسی سازی، تحقیق و ترقی اتے صنعت نال رابطیں کوں مزید تکڑا کریسی