دہشتگردی ہر صورت ناکام، قومی سلامتی تے سمجھوتہ نہ کریسوں، سینیٹر شیری رحمان

اسلام آباد۔22مئی(اے پی پی) پی پی پی دی رہنما سینیٹر شیری رحمان آکھیے جو پاکستان دی سرزمین تے کہیں وی قسم دی دہشتگردی کوں ہر صورت ناکام بݨایا ویسی اتے قومی سلامتی تے کوئی سمجھوتہ نہ کیتا ویسی۔ نشوم ٻالاں دی شہادت تے اساں سارے ٻۃوں ݙکھی ہیسے ، اے حملہ صرف خانداناں تے کائنی بلکہ پوری قوم دے دل تے حملہ تھئے۔ سینیٹ اجلاس اچ انہاں آکھیے جو بھارت پاکستان اچ دہشتگردی کیتے بی ایل اے جیہے گروپ کوں تربیت اتے اسلحہ ݙیندا کھڑے ، اے ریاستی دہشتگردی دے زمرے اچ آندے جئیں تے اساں سینیٹ اچ باقاعدہ قرارداد وی منظورکریسوں۔ انہاں یاد ݙیوائے جو بے نظیر بھٹو وی دہشتگردی دا نشانہ بݨی ہن ایں سانڳے اے مسئلہ کہیں ہک جماعت یا علاقے دا کائنی بلکہ پوری قوم دا مسئلہ اے۔ شیری رحمان واضح کیتے جو بلوچستان اچ دہشتگردی کرݨ آلے سیاسی لوک کائنی بلکہ ریاست دشمن عناصر ہن، سیاسی اختلافات کوں دہشتگردی دے ذریعے طے کیتا نی ونڄ سڳدا۔ انہاں آکھیے جو نشوم سکول دے ٻالاں کوں سکول ویندے ہوئیں دہشتگردی دا نشانہ بݨایا ڳیا جیڑھا ناقابل معافی جرم اے۔ انہاں آکھیے پاکستان دہشتگردی دے خلاف کئی آپریشنز کیتن اتے اڄ وی اے جنگ جاری اے۔ سینیٹر شیری رحمان آکھیے جو اساں ہمیشہ ذمہ واری اتے لچک دا مظاہرہ کیتے لیکن دشمن دی جارحیت دا مُنہ بھن جواب ݙتے۔ انہاں یاد ݙیوائے جو کلبھوشن یادیو جیہے بھارتی جاسوس کوں پاکستان رنڳے ہتھ گرفتار کیتا جیڑھا دہشتگردی دے نیٹ ورک دا حصہ ہئی۔ انہاں آکھیے جو اساݙی پارٹی دے کئی رہنما بلوچستان اتے خیبر پختونخوا اچ دہشتگردی دا نشانہ بݨئن اتے اساں محترمہ بے نظیر بھٹو جیھی قیادت کوں وی دہشتگردی اچ ونڄائے۔ سینیٹر شیری رحمان ایوان کوں ݙسائے جو پاکستان  کنے بھارت دی مداخلت اتے دہشتگردی دے ثبوت موجود ہن جݙاں جو بھارت اڄ تئیں کہیں وی الزام دے ثبوت پیش نی کر سڳیا۔ انہاں آکھیے جو اڄوکے 87 گھنٹے دی کشیدگی اچ بھارت عام شہریاں کوں نشانہ بݨائے، جݙاں جو پاکستان صرف فوجی اہداف کوں نشانہ بݨا تے اپݨی اخلاقی برتری دا ثبوت ݙتے۔ انہاں ایں عزم دا اظہار کیتے جو پاکستان دی سرزمین تے کہیں وی قسم دی دہشتگردی کوں ہر صورت ناکام بݨایا ویسی اتے قومی سلامتی تے کوئی سمجھوتہ نہ کیتا ویسی