پاکستان کیتے آئی ایم ایف پروگرام نال ملک اچ معاشی ترقی کوں ودھارا ملسی، صدر آصف علی زرداری دی عالمی مالیاتی ادارے دے وفد نال گالھ مہاڑ

اسلام آباد۔ 23 مئی (اے پی پی) صدر مملکت آصف علی زرداری آکھیا جو آئی ایم ایف ترقی پذیر ملکاں دی اقتصادی ترقی اچ اہم کردار ادا کریندا پئے، پاکستان کیتے آئی ایم ایف پروگرام نال ملک اچ معاشی ترقی کوں ودھارا ملسی۔ صدر مملکت اے ڳالھیں جہاد الظہور دی قیادت اچ عالمی مالیاتی ادارے دے وفد نال گالھ مہاڑ کریندیں ہوئیں کیتا جئیں جمعے کوں ایوان صدر اچ انہاں نال ملاقات کیتی۔ ایوانِ صدر دے پریس ونگ موجب ملاقات اچ وفاقی وزیر خزانہ سینیٹر محمد اورنگزیب، سینیٹر سلیم مانڈوی والا اتے بئے اعلیٰ حکام وی شامل ہن۔ ملاقات اچ پاکستان دی معاشی صورتحال اتے جاری آئی ایم ایف پروگرام تے گالھ مہاڑ کیتی گئی۔ ایں موقع تے صدر مملکت آکھیا جو آئی ایم ایف پروگرام پاکستان اچ معاشی استحکام گھن آوݨ اچ مددگار ثابت تھئے، انہاں پاکستان دی معاشی ترقی اچ آئی ایم ایف دے کردار دی تعریف کیتی۔ وفد پاکستان اچ معاشی اصلاحات اتے عالمی مالیاتی ادارے دے پروگرام تے اطمینان دا اظہار کیتا۔ وفد آکھیا جو پاکستان کیتے عالمی مالیاتی ادارے دا پروگرام صحیح راہ تے اے، آئی ایم ایف پروگرام نال پاکستان اچ افراطِ زر، زرمبادلہ دے ذخائر اتے مالیاتی خسارے اچ استحکام گھن آوݨ اچ مدد ملی اے۔ صدر مملکت پاکستان نال تعاون کرݨ تے عالمی مالیاتی ادارے دا شکریہ ادا کیتا اتے معیشت دی بہتری کیتے وزارتِ خزانہ اتے ایں دی ٹیم دے اقدامات دی تعریف کیتی۔