آپریشن بنیان مرصوص اچ پاکستان کُوڑ، فریب، جبر اتے بھارتی جارحیت دا پردہ چاک کیتا، میجر جنرل احمد شریف چوہدری دا الجزیرہ ٹی وی کوں انٹرویو

اسلام آباد۔23 مئی (اے پی پی) پاک فوج دے شعبہ تعلقات عامہ (آئی ایس پی آر) دے ڈی جی میجر جنرل احمد شریف چوہدری آکھیا جو آپریشن بنیان مرصوص اچ پاکستان کُوڑ، فریب، جبر اتے بھارتی جارحیت دا پردہ چاک کیتا، اے اساڈے کلچر، اقدار اتے مذہب دے خلاف اے جو اساں کہیں مذہبی یا سویلین ڄاہ تے حملہ کروں، ݙو حریف ایٹمی ملکاں وچال جنگ دا تصور ای خطرناک اتے مذاق اے، صرف کوئی پاگل ای اے سوچ سڳدے جو او پاکستان دی 24 کروڑ عوام دا پاݨی بند کر سڳدے، اے ممکن نئیں، اگر بھارت ولوں ایہو جئی حرکت کیتی، تاں اساڈا ردعمل ایں توں وی ودھ تیکھا اتے شدید ہوسی۔ اے ڳالھیں انہاں الجزیرہ ٹی وی کوں ھک انٹرویو ݙیندیں ہوئیں کیتا جو اساں ہمیشہ آہدے ہیں جو اے جنگ اساݙی اے، مگر فتح اللہ تعالی ݙتی اے۔ اگر تساں پاکستان دیاں گلیاں، شہراں وچ ونجو تاں عوام دے چہریاں تے جواب موجود اے، او خوشی اتے جشن جو او منین٘دے پئن کیوں جو اے صرف عسکری میدان دی ڳالھ نئیں، نہ ای صرف فضائی یا زمینی لڑائی دی بلکہ بیانیہ اتے سچائی دی جنگ (معرکہ حق) اے۔ انہاں آکھیا جو پاکستان کُوڑ، فریب، جبر اتے بھارتی جارحیت دا پردہ چاک کیتا، پہلگام توں بعد بھارت ھک من گھڑت کہانی گھن تے آیا۔ پاکستان صرف ھک ڳالھ آکھی جو اگر تہاݙے کول اساڈے کہیں شہری یا ریاست نال تعلق دا ثبوت اے، تاں سامݨے گھن آؤ اتے او وی بین الاقوامی برادری یا کہیں تریجھے، قابل اعتماد فریق دے سامݨے تاں جو شفاف تحقیقات تھی سڳن لیکن بھارت دے کول کوئی جواب نہ ہا اتے اڄ تئیں کائنی۔ حتیٰ جو کجھ ݙین٘ھ پہلے انہاں دی وزارت خارجہ آکھیا جو تفتیش اڄاں جاری اے۔ تاں 6 اتے 7 تاریخ کوں جو انہاں کیتا، ایں تے وی انہاں کول اخلاقی جواز کائنی۔ انہاں آکھیا جو اساں شفاف رہیوں، سچ الائے، کُوڑ نی ماریا، ڳالھیں کوں تروڑیا مروڑیا نئیں۔ دنیا ݙٹھے جو بھارت دا میڈیا اتے ریاست خود معلومات دی جنگ اچ کُوڑ مریندے پئن۔ پروپیگنڈا اتے کُوڑے دعوے انہاں کول بہوں ترقی یافتہ تھیٹر اتے فلم انڈسٹری اے، پاکستان توں کہیں اگوں، ایں کراہیں او نویں نویں بیانیے گھڑیندے رہندن۔ مثلاً کل ای میں سݨیا جو بھارت آکھیندا پیا ہا جو پاکستان گولڈن ٹیمپل تے حملہ کیتا، ایں توں وݙا کُوڑ کوئی نئیں تھی سڳدا۔ اساں سکھاں دے مقدس جہیں جڈاں جو ننکانہ صاحب، پنجہ صاحب اتے بئی مذہبی جہیں دی حفاظت کریندے ہیں، کرتارپور صاحب دا احترام کریندے ہیں۔ اساں آپݨے سکھ بھراواں نال محبت کریندوں، اساڈے پنجاب (پاکستان اتے بھارت) اچ مشترکہ ثقافت، زبان اتے قربت اے۔ پاکستان دے مسلماناں اتے سکھاں وچال ڳوݙھے تعلقات ہن۔ اساں گولڈن ٹیمپل سویں مقدس مقام تے کیوں حملہ کریسوں؟ اے اساڈے کلچر، اقدار اتے مذہب دے خلاف اے جو اساں کہیں مذہبی یا سویلین مقام تے حملہ کروں۔ ڈی جی آئی ایس پی آر آکھیا جو بھارتی میڈیا اتے اعتماد دا بحران او آپݨے اعلیٰ افسراں اتے جرنیلاں کوں میڈیا تے کُور مارݨ کیتے گھن آندن۔ھک سوال دے جواب اچ انہاں آکھیا جو بھارتیاں دیاں ڳالھیں تے کیویں یقین کروں؟ انہاں کوں پہلے خود آپݨا اعتبار بحال کرݨا پوسی۔ اعتبار سچ الاوݨ نال آندے نہ جو ہزاراں ویب سائٹس بند کرݨ، میڈیا تے پابندی لاوݨ یا حکومت تے تنقید کرݨ آلیاں کوں جیل وچ سٹݨ نال۔ کیا پاکستان ایں تنازع اچ کہیں صحافی کوں جیل وچ سٹیا؟ بالکل وی نئیں۔ اساکوں ترائیں مسلح افواج دے ہم آہنگ اتحاد اتے قومی یکجہتی، آپݨی فضائیہ اتے پائلٹس تے فخر اے۔ ایں فوجی تنازع اچ تساں ترائیں افواج دی ہم آہنگی ݙٹھی صرف آرمی، ایئرفورس، اتے نیوی وچال نئیں، بلکہ سیاسی قیادت اتے پاکستانی عوام نال وی ھک مضبوط ہم آہنگی ݙیکھݨ کوں ملی۔ انہاں آکھیا جو آہنی دیوار ’’بنیان مرصوص‘‘ بھارتی جارحیت دے خلاف متحدہ مزاحمت ہئی۔ فضائیہ دی پیشہ ورانہ مہارت اتے تکنیکی برتری پاکستان ایئر فورس اساݙا فخر اے۔ 6 اتے 7 تاریخ دی رات دی فضائی جنگ پوری دنیا ݙٹھی۔ اے ݙہاکیاں تئیں فضائی جنگی کالجاں اتے فوجی اداریاں وچ پڑھائی اتے زیر بحث کیتی ویسی۔ اساں آپݨے پائلٹس دی پیشہ ورانہ مہارت کوں سلام پیش کریندوں۔ جے ایف17-تھنڈر، جے10- سی اتے زمین تے فتح1- اتے فتح2- میزائل اے سارا کجھ پاکستان دی تکنیکی ترقی دیاں مثالاں ہن۔ انہاں آکھیا جو اساں آپݨی روایتی افواج دی مکمل طاقت حالے تئیں استعمال ہی نئیں کیتی۔ ایں دا وݙا حصہ بلوچستان اتے خیبر پختونخوا اچ بھارت دی حمایت یافتہ دہشتگردی دے خلاف مصروف اے۔ دنیا جاݨدی اے جو بھارت ایں خطے اچ سَبھ توں وݙا دہشتگردی دا سرپرست اے۔ اساں انہاں آپریشنز توں ھک وی فوجی نئیں ہٹایا۔ اساں آپݨی ساری ٹیکنالوجی وی ظاہر نئیں کیتی۔ ڈی جی میجر جنرل احمد شریف چوہدری آکھیا جو امریکہ، چین، سعودی عرب، قطر، متحدہ عرب امارات اتے بئیاں عالمی طاقتاں جاݨدیاں ہن جو ݙو حریف ایٹمی ملکاں وچال جنگ دا تصور ای خطرناک اتے مضحکہ خیز اے۔ بھارت کئی سالاں توں جنگی جنون وچ مبتلا اے جیڑھا جو ٻھاہ نال کھیݙݨ دے مترادف ہے۔ او ھک ایہو جیا ماحول بݨا رہن٘دے ہن جو باہمی تباہی دا سبب بݨسی۔ ایہو وجہ اے جو پاکستان دانشمندی نال کم گھدا اتے ایں پورے تنازع اچ کشیدگی کوں ودھݨ نئیں ݙتا۔ جنگ بندی اتے امن دیاں شرطاں جنگ بندی دا مطلب اے جو ݙوہیں فریقاں فائرنگ بند کر ݙتی، مگر امن تئیں آؤسی جݙاں بھارت آپݨی جنگی جنون اچ سیاسی سوچ توں جان چھڑویسی۔ انہاں آکھیا جو انہاں دے اشرافیہ مسلماناں اتے اقلیتاں دے خلاف ظلم تے یقین رکھیندن، اے ھک سنگین مسئلہ اے۔ صرف مسلماناں تے نئیں، بلکہ عیسائیاں، سکھاں اتے نویاں ذاتاں تے وی ظلم تھیندا پئے۔ ایں ظلم نال قدرتی طور تے ردعمل پیدا تھیندے، جیں کوں بھارت حل کرݨ توں انکار کریندے۔ ہندوتوا اتے اندرونی مسائل دی بیرونی توجیہ انتہا پسندی اتے ہندوتوا نظریہ دے فطری نتائج ہوندے ہن، لیکن بھارت ایں دا الزام پاکستان تے سٹ تے بیرونی مسئلہ بݨیندے۔ جݙاں تئیں بھارت انہاں اندرونی مسائل کوں خود حل نئیں کریندا، امن ممکن نئیں۔ ڈی جی آئی ایس پی آر آکھیا جو کشمیر ھک حل طلب بین الاقوامی مسئلہ اے، جیں وچ پاکستان، چین، اتے بھارت شامل ہن۔ ایں کوں اقوام متحدہ دیاں قرارداداں اتے کشمیری عوام دی مرضی دے مطابق حل تھیوݨا چاھیدے۔ بھارت ایں مسئلے کوں ظلم دے ذریعے اندرونی معاملہ بݨاوݨ دی کوشش کریندے، لیکن امن ایں رستہ ممکن نئیں، صرف کوئی پاگل ہی اے سوچ سڳدے جو او پاکستان دے 24 کروڑ عوام دا پاݨی بند کر سڳدے، اے ممکن نئیں ۔ اساکوں اے حقیقت سمجھݨی چاھیدی اے جو کشمیر توں چی دریا نکلدے ہن اتے اقوام متحدہ دیاں قرارداداں دے مطابق کشمیر ھک متنازعہ علاقہ اے۔ اگر کل کوں کشمیری عوام دی خواہش دے مطابق کشمیر پاکستان وچ شامل تھی ویندے تاں اے سارے دریا پاکستان دے ہوسن اتے بھارت ھک زیریں دریائی ریاست بݨ ویسی اتے ول اے اساڈے تے ہوسی جو ایں کوں کیویں ݙیکھݨے جݙاں جو چین وی ایں تنازع وچ ھک فریق ہے۔ بھارت کوں سمجھݨا چاھیدے جو او کہیں ٻھاہ نال کھیݙدا پئے۔ عالمی ذمہ واری اتے پاکستان دا عزم پاکستان اتے چین کئی ݙہاکیاں توں مختلف شعبیاں اچ شراکت دار ہن۔ پاکستان، چین، اتے بئیاں ذمہ دار اقوام امن کیتے کوشش کریندن۔ جینویں پاکستان آپݨی جنگ خود لڑی۔ اگر بھارت وچ خودداری اے، تاں او وی آپݨی جنگ خود لڑے۔ بھارتیاں کوں وی خودداری سکھݨی چاھیدی اے، اتے کُوڑ اتے جارحیت تے انحصار بند کرݨا چاھیدے۔ مزاحمتی صلاحیت اتے مستقبل دا موقف جݙاں بھارت کھلم کھلا جارحیت کیتی، اساں ݙٹ تے کھڑے تھیے اتے اڄ وی کھڑوں۔ اگر بھارت ولوں ایہو جئی حرکت کیتی، تاں ساڈا ردعمل ایں توں وی ودھ تیکھا اتے شدید ہوسی۔