وفاقی وزیر پٹرولیم علی پرویز ملک دا توانائی اَتے وسائل دی ترقی اچ ترکیہ نال تکڑی شراکت داری ودھاوݨ دا عزم

اسلام آباد۔23مئی (اے پی پی) وفاقی وزیر پٹرولیم علی پرویز ملک دا توانائی اَتے وسائل دی ترقی اچ ترکیہ نال تکڑی شراکت داری ودھاوݨ دا عزم کریندے آکھیے ݙوہیں ملک سانجھے منصوبیں، ٹیکنالوجی دی منتقلی اَتے سرمایہ کاری دے موقعیں توں فیدہ چاسڳدن۔ ترجمان پیٹرولیم ڈویژن موجب اے ڳالھ انہاں ترکیہ دے سفیر عرفان نذیروغلو نال ملاقات اچ کیتی، ملاقات اچ توانائی دے شعبیں سودھے زیر زمین اَتے سمندر اچ تیل اَتے گیس دی تلاش اَتے اہم معدنیات اچ اشتراک اَتے ݙو طرفہ تعاون کوں ودھاوݨ تے توجہ مرکوز کیتی ڳئی۔ وزیر پٹرولیم علی پرویز ملک پاکستان بھارت جھیڑے دے دوران ترکیہ دے بے لوث تعاون تے شکریہ ادا کیتا۔ انہاں آکھیے جو پاکستان اَتے ترکیہ دی دوستی ہر آزمائش اچ سرخرو تھئی اے، جو ݙوہیں بھرا ملکاں دے گھاٹے تعلقات دی عکاسی کریندی اےِ۔ انہاں وزیراعظم شہباز شریف ولوں سفیر دا شکریہ ادا کیتا اَتے آکھیے جو صدر رجب طیب اردوان پاکستان نال محبت دا اظہار ہمیشہ کھل تے کیتے، پاکستانی حکومت اَتے عوام ایں بھرپی کوں بہوں قدر دی نگاہ نال ݙیکھدن اَتے ترکیہ کیتے وی ایہو جذبات رکھیندن۔ ترکی دے سفیر عرفان نذیراوغلو پاکستان نال ترکی دے عزم کوں دوہرائے تے آکھیے جو تعلق ویلھے دی کسوٹی تے پورا لہہ ڳئے۔ انہاں آکھیے جو پاکستان شروع توں صورتحال کوں بہترین طریقے نال سنبھالیے ۔ بھاویں بھارت جارحیت کیتی، لیکن پاکستان ھک ذمہ وار ریاست وانڳوں تحمل دا مظاہرہ کیتا۔ انہاں مزید آکھیے جو ݙوہیں ملکاں دے نینگراں اچ پاک-ترک مشترکہ ہیروز اَتے تاریخی تعلقات بارے نویں بیداری پیدا تھئی اے۔ علی پرویز پٹرولیم اَتے معدنیات دے شعبیاں اچ تعاون کوں ودھاوݨ دی بے پناہ صلاحیت تے روشنی پاتی۔ انہاں آکھیے جو ݙوہیں ملک سانجھے منصوبیں، ٹیکنالوجی دی منتقلی اَتے سرمایہ کاری دے موقعیں توں فیدہ چا سڳدن۔ انہاں ݙسایا جو ترکی دی سرکاری کمپنی ترکش پٹرولیم کارپوریشن (ٹی پی او سی) کوں 13 مئی 2025 کوں تھیوݨ آلی ٻولی اچ ݙو آنشور بلاکس ݙتے ڳئن۔ انہاں اچوں ھک بلاک بلوچستان (زیارت نارتھ) اچ ہے، جیندے اچ “ماری انرجیز (33.16 فیصد) آپریٹر، او جی ڈی سی ایل (24.87 فیصد)، پی پی ایل (24.87 فیصد)، ٹی پی او سی (10 فیصد) اَتے گورنمنٹ ہولڈنگز پرائیویٹ لمیٹڈ (7.10 فیصد) شامل ھن۔ ݙوجھا بلاک سندھ (سکھپور-II) اچ اے ، جیندے اچ پرائم (25 فیصد) آپریٹر، او جی ڈی سی ایل (30 فیصد)، ماری انرجیز (30 فیصد) اَتے ٹی پی او سی (15 فیصد) شامل ھن۔ ایندے علاوہ، ترکش پٹرولیم پاکستانی کمپنیاں (ماری انرجیز، او جی ڈی سی ایل، پی پی ایل) دے نال رل تے 2025 دے آف شور بڈ راؤنڈ اچ حصہ ڳھنّݨ کیتے ھک مشترکہ ٻولی معاہدہ وی کیتے ۔ سفیر ترکیہ توانائی اَتے معدنیات دے شعبیں اچ پاکستان نال تعلقات کوں مزید تکڑا بݨاوݨ تے ترکی دے عزم دی تصدیق کیتی۔ انہاں پاکستان ولوں غیر ملکی سرمایہ کاری کیتے سازگار ماحول بݨاوݨ دی کوششاں دی تعریف کیتی تے سانجھی معاشی ترقی کوں ودھارا ݙیوݨ سانڳے تعاون تے امید دا اظہار کیتے۔ ݙوہیں فریقین مشترکہ تیل و گیس ڳولݨ دے منصوبیں اَتے کریٹیکل منرلز دے شعبے اچ تعاون کوں تکھا کرݨ تے اتفاق کیتے، جو صنعتی اَتے تکنیکی ترقی کیتے ٻہوں اہم ہن