پاکستانی قوم دے جذبے کوں کوئی نی ہرا سڳدا ، بھارت دے مکروہ عزائم مٹی اچ رَلیسوں ، وفاقی وزیر اطلاعات عطاء اللہ تارڑ

کوئٹہ ۔23مئی (اے پی پی) وفاقی وزیر اطلاعات و نشریات عطاء اللہ تارڑ آکھیے جو پاکستانی قوم دے جذبے کوں کوئی ہرا نی سڳدا ، خضدار بس واقعہ اچ جاں بحق اَتے زخمی تھیوݨ آلے ٻالاں دے والدین دا حوصلہ اَتے جذبہ ݙیکھݨ آلا اے ، اساں انہاں کوں خراج تحسین پیش کریندوں ، بھارت آپݨیاں پراکسیز دے ذریعے بلوچستان کوں عدم استحکام دا شکار کرݨ چاہندے لیکن بھارت دے مکروہ عزائم مٹی اچ رلیسوں اَتے ہر صورت امن قائم کریسوں، بھارت کوں دنیا اچ ہزیمت دا سامݨا کرݨا پئے، ہݨ او سافٹ ٹارگٹ تے لہہ آئے ، فتنہ الہندوستان کوں انجام تئیں پڄا تے دم ڳھنسوں، مودی اَتے ایندے حواری سازش دے ذریعے آپݨیاں تقریراں اچ بلوچستان دا ذکر کریندن، وزیراعظم اَتے فیلڈ مارشل دا عزم اے جو بلوچستان امن دا گہوارہ بݨے ۔پاکستان دی کامیابی اے جو کشمیر دا مسئلہ عالمی سطح تے ول اجاگر تھئے ۔ خضدار بس سانحہ دا شکار ٻالاں دی عیادت توں بعد میڈیا نال ڳالھ مہاڑ کریندے وفاقی وزیر اطلاعات آکھیے جو خضدار بس دے دلخراش واقعے اچ ساݙے ٻالاں عظیم قربانی ݙتی، متاثرہ ٻالاں دے والدین دا عزم اَتے جذبہ اُچا ہے۔ انہاں آکھیے جو صوبیدار سلیم آپݨیاں ݙو دھیریں دی تدفین کیتی جݙاں جو انہاں دا تریجھا پتر ٻہوں زخمی اےِ، ایندے باوجود او ایمبولینس دے اڳوں پاکستان دے حق اچ نعرے مریندے رہیے ۔ ہک بندے دے چار ٻال ٻہوں زخمی تھئے لیکن انہاں دے حوصلے اُچے ھن۔ انہاں آکھیے جو اڄ انٹرنیشنل اَتے نیشنل میڈیا کوں خضدار اچ اصل صورتحال توں آگاہ کرݨ کیتے ڳھنّ آیا ڳئے تاں جو دنیا کوں حقائق توں باخبر رکھیا ونڄ سڳے۔ وفاقی وزیر آکھیے جو بھارت معرکہ حق آپریشن ”بنیان مرصوص“ اچ شکست توں بعد ہݨ سافٹ ٹارگٹس تے لہہ آئے ۔ انہاں واضح کیتے جو کلبھوشن یادیو دی بلوچستان توں گرفتاری اساں کنے بھارت دے دہشت گردی اچ ملوث ہووݨ دا ناقابل تردید ثبوت اے۔ انہاں آکھیے جو عسکریت پسند گلزار امام شمبے اَتے سرفراز بنگلزئی وی بھارتی سرپرستی دا خود اعتراف کیتے۔ عطاء اللہ تارڑ آکھیے جو بھارت آپݨیاں پراکسیز دے ذریعے بلوچستان کوں عدم استحکام دا شکار کرݨ چاہندے ۔ آپریشن ”معرکہ حق“ دے دوران وی بلوچستان اچ 33 حملے کیتے ڳئن جو بھارت دے مذموم عزائم دی عکاسی کریندن۔ انہاں آکھیے جو وزیراعظم شہباز شریف اَتے فیلڈ مارشل عاصم منیر دا پکا عزم اے جو دہشت گردی کوں منڈھوں مکا ݙتا ویسی اَتے بلوچستان کوں امن دا گہوارہ بݨایا ویسی۔ وفاقی وزیر آکھیے جو ڈی جی آئی ایس پی آر توں جاری کیتے ڳئے آڈیوز توں اے وی ثابت تھئے جو بھارتی ہینڈلرز کیویں دہشت گردی دی سرگرمیاں اچ ملوث ھن۔ انہاں آکھیے جو پاکستانی قوم ھک مٹھ اے اَتے افواج پاکستان ہر محاذ تے دہشت گردی نال نبݨݨ کیتے تیاراے ۔ ”فتنہ الہندوستان“ کوں ہرجاہ بے نقاب کیتا ویسی۔ انہاں سوال کیتا جو مودی حکومت دا بلوچستان دے واقعات نال کیا تعلق اے جو او آپݨیاں تقریراں اچ ول ول ایندا ذکر کریندے ؟ جعفر ایکسپریس واقعہ دی وڈیو انہاں دہشت گرداں بھارتی میڈیا کوں ݙتی، جو ایں ڳالھ دا واضح ثبوت اے جو بھارت بلوچستان اچ دہشت گردی دی سرگرمیاں اچ براہ راست ملوث اے۔ وفاقی وزیر آکھیے جو ساݙا حوصلہ اَتے عزم اُچا اے ۔ بھارت کوں روایتی جنگ اچ منہ دی کھاوݨی پئی، ایندے چھی جہاز ݙھائے ڳئے اَتے خود بھارت منئے جو بارا ضیان تھئے ۔ وفاقی وزیر آکھیے جو وزیراعظم شہباز شریف، افواج پاکستان، فیلڈ مارشل عاصم منیر، ایئر چیف ظہیر احمد بابر اَتے نیول چیف نوید اشرف بھارتی جارحیت دا منہ بھن جواب ݙتا ۔ انہاں آکھیے جو ساریاں سیاسی جماعتاں اَتے ادارے رل تے بلوچستان اچ امن بحال کریسن۔ ہک سوال دے جواب اچ انہاں آکھیے جو ساݙی بہادر افواج دہشت گرداں کوں جہنم واصل کیتا۔ ایجھے قانون بݨائے ونڄن جو ہر دہشت گرد کوں سزا یقینی بݨ سڳے، ایں سانڳے پارلیمان کوں وی کردار ادا کرݨا ہوسی، اے ہر پاکستانی دی دل دی آواز اے۔ عطاء اللہ تارڑ مزید آکھیے جو موجودہ صورتحال اچ دہشت گردی دے چیلنج نال نبڑیا ویندا پئے ۔ بلوچستان حکومت اَتے پاک آرمی دہشت گردی مکاوݨ کیتے اہم کردار ادا کیتے ۔ وفاقی وزیر آکھیے جو وزیراعظم اَتے فیلڈ مارشل دا عزم ناقابل تسخیر اے۔ انہاں آکھیے جو ہک ہریے ہوئے وزیراعظم دی تقریر توں ظاہر تھیندے جو او ہݨ تئیں آپݨی شکست تے حیران اےِ۔ گجرات دے قصائی مودی کوں شکست اَتے ذلت دا سامݨا کرݨا پئے۔ وفاقی وزیر آکھیے جو جݙاں پاکستان اچ فتح دا جشن منّایا ویندا پیا ہئی تاں ݙوجھے پاسے بھارت اچ مودی حکومت توں سوال چاتے ڳئے جیندا جواب ݙیوݨ توں او قاصر ھن۔ بھارتی میڈیا، سیاستدان اَتے سول سوسائٹی مودی حکومت توں جواب منڳدے پئے ھن اَتے اوں کنے انہاں سوالاں دا جواب کائناں ہئیِ۔ وفاقی وزیر آکھیے جو بھارت ہݨ صرف تڑیاں تئیں محدود رہ ڳئے، مودی ہک ناکام اَتے ہریا ہویا سیاستدان اے۔ انہاں ایں عزم دا اعادہ کیتے جو بھارتی دہشت گردی دی سرگرمیاں کوں ہر صورت بے نقاب کیتا ویسی۔ ہک سوال دے جواب اچ وفاقی وزیر آکھیے جو پاکستان دی ہک وݙی کامیابی اے جو مسئلہ کشمیر ہک واری ول عالمی سطح تے اجاگر تھئے، بلوچستان دے حوالے نال حکومتی اپروچ ہر جاہ موجود اے اَتے مسئلیں دے حل سانڳے تسلسل نال اقدامات کیتے ویندے پئن۔ انہاں آکھیے جو اساں تواتر نال بلوچستان دا دورہ کریندے رہسوں اَتے سارے امور کوں موثر انداز اچ نبݨیندے رہسوں۔ وفاقی وزیر اطلاعات ٻالاں دے لواحقین نال وی ملاقات کیتی اَتے انہاں دے حوصلے دی تعریف کیتی ۔ انہاں آکھیے والدین دا حوصلہ ݙیکھ تے دل تکڑا تھئے۔ زخمی ٻالاں دی صحت یابی دی دعا کریندے انہاں آکھیے جو جݙاں تئیں اے جذبہ قائم اے، پاکستان کوں کوئی دشمن شکست کائنی ݙے سڳدا  ٻالاں دی قربانی ہمیشہ یاد رکھی ویسی