بھارت 10 مئی دی شکست فاش کوں قیامت تئیں یاد رکھیسی، وزیراعظم شہبازشریف

اسلام آباد۔23مئی (اے پی پی) وزیراعظم محمد شہباز شریف آکھیے جو 10 مئی کوں افواج پاکستان قوم دے اتحاد اَتے اتفاق نال بھارت کوں جیڑھی شکست فاش ݙتی، دشمن اینکوں قیامت تئیں یاد رکھیسی۔ او اتھاں مری روڈ انٹر چینج جناح سکوائر دے افتتاح دے موقع تے منعقدہ تقریب توں خطاب کریندے پئے ہن، ایں موقع تے وفاقی وزرا حنیف عباسی، طارق فضل چوہدری، طلال چوہدری دے علاوہ سی ڈی اے اَتے اسلام آباد پولیس دے اعلیٰ حکام وی موجود ہن۔ وزیر اعظم آکھیے جو او ہک واری ول قوم کوں دلوں مبارخ ݙیندن، 10 مئی کوں افواج پاکستان آپݨی بہترین حکمت عملی اَتے بہادری نال بھارت کوں جیڑھی شکست فاش ݙتی اے اللہ تعالیٰ دا خاص انعام اَتے مہربانی اے۔ انہاں آکھیے جو قوم دے اتحاد و اتفاق دی شاندار تاریخ کوں دشمن قیامت تئیں یاد رکھسی۔ وزیر اعظم جناح سکوائر دے منصوبے دی 35 ݙینھ اچ تکمیل تے سی ڈی اے، متعلقہ کمپنی دے ذمہ داران اَتے وزیر داخلہ محسن نقوی کوں مبارکباد ݙیندے آکھیے جو ایں مختصر مدت اچ منصوبے دی تکمیل سوکھا کم نہ ہئی۔ انہاں وفاقی دارالحکومت دی انتظامیہ اَتے سی ڈی اے کوں مزید مستعدی اَتے محنت اَتے لگن نال کم کرݨ اَتے اسلام آباد کوں مزید سوہݨا بݨاوݨ کیتے اقدامات دی ہدایت کیتی۔ وزیر داخلہ محسن نقوی ایں موقع تے خطاب کریندے ہوئیں آکھیے جو اے منصوبہ 35 ݙینھ دی ریکارڈ مدت اچ مکمل کیتا ڳئے تاں جو شہریاں کیتے گھٹ توں گھٹ اوکھ تھیوے ۔ منصوبے دے تعمیراتی معیار تے کوئی سمجھوتہ کائنی کیتا ڳیا بہترین اَتے معیاری تعمیر یقینی بݨائی ڳئی اے ۔ انہاں آکھیے جو فیض آباد چوک تے پل کوں چوڑا کرݨ، شاہین چوک اَتے کشمیر چوک سودھے کئی ٻئے منصوبیں تے تکھّا کم شروع کیتا ویسی۔ واضح رہے جو پاکستان دی تاریخ اچ پہلی واری صرف 35 ݙینھ دی ریکارڈ مدت اچ انڈر پاس پراجیکٹ مکمل کیتا ڳئے ۔ وزیر داخلہ محسن نقوی دی ہدایت تے لینڈ سکیپنگ اَتے ہارٹیکلچر دا کم جاری اے ۔ ایں منصوبے نال مری ونڄݨ آلے شہریاں کوں آمدونڄ اچ ٻہوں سہولت ملسی۔ ویلھے دے نال شہریاں کوں ایندھن دی وی بچت تھیسی۔ چیئرمین سی ڈی اے محمد علی رندھاوا پراجیکٹ دی تکمیل تے بریفنگ ݙتی