حکومت اتے عوام ‘معرکہ حق’ اچ کامیابی دے بعد معاشی میدان اچ تاریخی فتح کیتے پرعزم ہین، وزیر اعظم

اسلام آباد، 23 مئی (اے پی پی) وزیراعظم محمد شہباز شریف آکھیے جو حکومت اتے عوام ‘معرکہ حق’ اچ کامیابی دے بعد معاشی میدان اچ تاریخی فتح کیتے پرعزم ہین۔ اے ڳالھ انہاں چیمبرز آف کامرس دے صدور نال گالھ مہاڑ اچ آکھی۔ وزیراعظم محمد شہباز شریف نال پورے ملک دے چیمبرز آف کامرس دے صدور دے وفد ملاقات کیتی۔ وزیراعظم آکھیا جو حکومت اتے نجی شعبے دے اشتراک نال پاکستان انشاء اللہ تیکھے ہک عالمی معاشی طاقت دے طور تے ابھرسی۔ انہاں معاشی خود انحصاری کیتے نجی شعبے کوں متحرک کرݨ دی لوڑھ تے زور ڈتے اتے آکھیے جو پاکستانی کاروباری برادری دے حقوق دا تحفظ اتے انہاں کوں منافع بخش کاروبار کیتے سازگار ماحول ݙیوݨ حکومت پاکستان دی اولین ترجیح اے، چھوٹے اتے درمیانے درجے دے کاروبار ودھاوݨ کیتے حکومت پاکستان کئی اقدامات کریندی پئی اے، کاروبار دی لاگت گھٹ کرݨ کیتے “آسان کاروبار” دی پالیسی تے عملدرآمد کیتا ویندا پئے۔ انہاں آکھیا جو ملکی صنعتاں اچ جدید ٹیکنالوجی متعارف کراوݨ دی لوڑھ اے، اتے خواتین کاروباری افراد دا ملکی معیشت دی ترقی اچ کلیدی کردار اے۔ انہاں یقین ڈیوایا جو حکومت خواتین کاروباری افراد کوں معاشی سرگرمیاں اچ پورا تعاون ڈیسی تاں جو او ملکی ترقی اچ متحرک کردار ادا کر سگن۔ وفد معرکہ حق اچ تاریخی کامیابی تے وزیراعظم اتے پاک فوج کوں خراج تحسین پیش کیتا۔ وفد حکومتی درست معاشی پالیسیاں دی بدولت ملکی معیشت اتے کاروبار اچ بتدریج بہتری تے وزیراعظم دا شکریہ ادا کیتا۔ وفد آکھیا جو سٹاک ایکسچینج دی کارکردگی پچھلے ݙو سالاں توں بتدریج بہتر تھئی اے، جیڑھی ثبوت اے جو حکومتی معاشی پالیسی درست سمت دو ویندی پئی اے۔ وفد ملکی ترقی اتے عوامی فلاح و بہبود دے اقدامات سانڳے حکومت کوں ہتھ ونݙاوݨ دا یقین ݙیوایا اتے ایف بی آر اصلاحات دی تعریف کریندے اپݨیاں تجویزاں وی ݙتیاں۔