پاکستانی بیانیہ عالمی سطح تے مقبول، بھارتی فریب بے نقاب تھئے، بیرسٹر دانیال چوہدری

اسلام آباد۔ 24 مئی (اے پی پی) پارلیمانی سیکرٹری اطلاعات و نشریات بیرسٹر دانیال چوہدری پاکستان دے سفارتی وفد تے یقین ظاہر کریندے ہوئیں آکھیے جو سفارتی وفد کشمیر اتے دہشت گردی سودھے پاکستان دے خدشات کوں عالمی سطح تے مؤثر انداز اچ پیش کریسن۔ آپݨے ہک انٹرویو اچ دانیال چوہدری آکھیے پاکستان دے بیانیے دی عالمی سطح تے تعریف تھیندی پئی اے جئیں دا او حقدار اے جݙاں جو بھارت دا فراڈ اتے دھوکہ بے نقاب تھئےے۔ انہاں زور ݙے تے آکھیِے عالمی برادری پاکستان دے موقف دی سچائی کوں تکھے منیندی پئی اِے جݙاں جو بھارت ولوں حقیقت کوں بھن مروڑ دیاں کوششاں بے نقاب تھیندیاں پئن۔ دانیال چوہدری آکھیِے پاکستان دے مندوبین ہر قانونی اتے بین الاقوامی فورم دے نال فعال طور تے رابطہ کریسن تاں جو دہشت گردی کیتے بھارت دی حمایت کوں بے نقاب کرݨ آلے نہ مٹاوݨ آلے ثبوت پیش کیتے ویسن۔ انہاں خاص طور تے گھڑیے ہوئے پہلگام واقعہ دا ذکر کیتا جئیں اچ بھارت پاکستان تے کوڑا الزام لاتا جیڑھا بھارت دے خراب ہتھکنڈیں دی مثال اِے۔ انہاں زور ݙے تے آکھیِے پاکستان مضبوط سفارتی کوششاں دے ذریعے بھارت دے ݙوڑے پن اتے جارحیت کوں اجاگر کریندا رہ ویسی۔ پاکستان بین الاقوامی پلیٹ فارمز تے حقائق اتے سچائی کوں ظاہر کرݨ دے نال نال بھارت کوں اوندے اقدامات دا جواب منڳسی۔دانیال چوہدری خضدار اتے جعفر ایکسپریس حملیں جیھے واقعات دا حوالہ ݙیندے ہوئیں دہشت گردی دی بھارتی پشت پناہی دی مذمت کیتی۔ ایں حملیں اچ نشوم شہریاں اتے ٻالاں کوں بے رحمی نال نشانہ بݨایا ڳئے۔ انہاں زور ݙے تے آکھیِے بھارت دی ایں طرح دیاں کارروائیاں دی حمایت انسانی حقوق اتے بین الاقوامی قوانین دی کھلی خلاف ورزی اِے۔ انہاں متاثرین اتے انہاں دے خانداناں کیتے انصاف دی لوڑھ تے زور ݙیندے ہوئیں ہندوستان دے اقدامات دی عالمی مذمت تے زور ݙتا۔ انہاں ایں ڳالھ تے روشنی پاتی اِے جو پاکستان دہشت گردی دا ساریں توں وݙا شکار رہیِے، جئیں بے پناہ انسانی اتے اقتصادی ضیان برداشت کیتن۔ انہاں آکھیِے پاکستان دہشت گردی دے خلاف جنگ اچ اہم قربانیاں ݙتن ، بے شمار جاناں ضائع تھئن اتے انفراسٹرکچر کوں وی ضیان پڄے ۔ دانیال چوہدری ایں ڳالھ تے زور ݙتِے دہشت گردی دے خلاف جنگ اچ پاکستان دیاں کوششاں اتے قربانیاں نمایاں رہین اتے عالمی برادری کیتے ضروری اِے جو او خطے اچ امن و استحکام کوں قائم رکھݨ کیتے پاکستان دیاں مسلسل کوششاں کوں منے اتے اوں دی حمایت کرے۔