وزیراعظم محمد شہباز شریف دی لاہور قلندرز کوں پاکستان سپر لیگ 10 دا فائنل جتݨ تے مبارخ

استنبول ۔26 مئی (اے پی پی) وزیر اعظم محمد شہباز شریف لاہور قلندرز کوں پاکستان سپر لیگ 10 دا فائنل جتݨ تے مبارخ ݙتی اے۔ سنوار کوں پی ایم آفس دے میڈیا ونگ توں جاری بیان موجب وزیر اعظم پی ایس ایل دے ݙاہویں ایڈیشن دے فائنل میچ اچ شاندار کھیݙ پیش کرݨ تے کوئٹہ گلیڈی ایٹرز اتے لاہور قلندرز دی تعریف کیتی۔ وزیر اعظم آکھیا جو لاہور قلندرز ہک سنسنی خیز مقابلے دے بعد ہدف کامیابی نال حاصل کیتا، پی ایس ایل 10 اچ شامل ساریاں ٹیماں بہترین کھیݙن۔ انہاں پاکستان سپر لیگ دے ݙاہویں ایڈیشن دے کامیاب انعقاد تے چیئرمین پی سی بی محسن نقوی اتے پی سی بی دی انتظامیہ کوں وی مبارخ ݙتی۔ وزیر اعظم سارے کھݙاریاں خاص کر غیر ملکی کھݙاریاں کوں خراج تحسین پیش کیتا جنہاں دی شرکت نال ایں کامیاب ایونٹ تھیا۔