ہیلتھ سیکٹر اچ ٹیلی میڈیسن دا نفاذ ہک انقلابی قدم ثابت تھیسی، وفاقی وزیر صحت سید مصطفیٰ کمال

اسلام آباد۔ 26 مئی (اے پی پی) وفاقی وزیر قومی صحت سید مصطفیٰ کمال آکھیا جو ہیلتھ سیکٹر اچ ٹیلی میڈیسن دا نفاذ ہک انقلابی قدم ثابت تھیسی۔ عوام کوں ڈاکٹراں اَتے دوائیں دی سہولت انہاں دے دَر تئیں پُڄیسوں۔ اے ڳالھیں انہاں ایز شفاء دے چیف ٹیکنالوجی آفیسر نال ملاقات اچ آکھی۔ ایں موقع تے ٹیلی میڈیسن منصوبے تے تفصیلی ڳالھ مہاڑ تھئی۔ وزیر صحت ڈیجیٹل کلینک دا معائنہ کیتا، مشین دے فیچرز تے تفصیلی بریفنگ ݙتی ڳئی۔ مصطفیٰ کمال آکھیا جو ملک دی وݙی آبادی ہسپتالاں تئیں رسائی دی سکت نی رکھیندی، پرائمری ہیلتھ کیئر سسٹم کوں فعال بݨاوݨ ویلھے دی لوڑھ اے، 70 فیصد مریض بی ایچ یو دی بجائے وݙے ہسپتالاں دا رُخ کریندن، ٹیلی میڈیسن نال وݙے ہسپتالاں دا رش گھٹ تھیسی اَتے بنیادی مرکزاں کوں قابل عمل بݨایا ویسی۔انہاں آکھیا جو ہر بندہ ٹیکنالوجی نال جُڑیا ہوئے، صحت دیاں سہولتاں ݙیوݨ کیتے ٹیکنالوجی توں فیدہ چیسوں اَتے ہݨ مشورہ صرف ہک کال دی دوری تے ممکن تھیسی۔ انہاں آکھیا جو غریب مریض جیڑھے ہسپتال نی ونڄ سڳدے، ٹیلی میڈیسن توں فیدہ چیسن، پرے دے علاقیاں تئیں صحت دیاں سہولتاں ٹیلی میڈیسن نال ممکن تھیسن، ہر شہری دا میڈیکل ریکارڈ قومی شناختی کارڈ نال جوڑیا ویسی، ادویہ ساز کمپنیاں کوں دوائیں دی ترسیل کیتے فیکٹری آؤٹ لیٹس قائم کرݨ دی دعوت ݙتی ویسی۔ اے منصوبہ عوامی تے نجی شراکت داری (پی پی پی) دے تحت پورا تھیسی۔ ٹیکنالوجی ݙیوݨ آلیاں کمپنیاں شفاف بولی نال چݨیاں ویسن۔ انہاں آکھیا جو جدید صحت سہولتاں تئیں عوامی رسائی اچ اے ہک انقلابی قدم اے۔