پاکستان اتے ایران دا مختلف شعبیاں اچ تعاون ودھاوݨ تے اتفاق، خطے اچ امن کیتے سارے حل طلب مسلیاں تے الاوݨ کوں تیار ہیں، وزیراعظم شہباز شریف دی ایرانی صدر دے کٹھے پریس کانفرنس

تہران۔26مئی(اے پی پی)وزیراعظم محمد شہباز شریف آکھیے جو پاکستان اتے ایران تجارت اتے سرمایہ کاری سودھا مختلف شعبیاں اچ تعاون ودھاوݨ تے اتفاق کیتے اتے آکھیے جو خطے اچ امن کیتے ہمسایہ ملکاں دے نال پاݨی دے مسئلے، تنازعہ کشمیر اتے انسداد دہشت گردی سودھا سارے تصفیہ طلب مسلیاں دے حل کیتے ڳالھ مہاڑ کرݨ کوں تیار ہیں۔ اے ڳالھ وزیر اعظم شہباز شریف دورہ ایران ویلھے ایرانی صدر ڈاکٹر مسعود پز شکیان نال پریس کانفرنس کریندے آکھی۔ انہاں آکھیا جو بھرا ملک ایران دا دورہ کر تے ٻہوں خوشی تھئی اے، ایران ساݙا ݙوجھا گھر اے، اپݨے وفد دے بہترین استقبال تے شکریہ ادا کرینداں، اساں تعمیری اتے مفید ڳالھ مہاڑ کیتی اے جیندے اچ باہمی دلچسپی اتے تعاون دے سارے شعبیاں تے الائے، ݙوہیں ٻھرا اتے ہمسایہ ملک تجارت، سرمایہ کاری سودھا سارے شعبیاں اچ تعاون ودھاوݨ چاہندے ہیں۔ انہاں آکھیا جو پاکستان اتے ایران دے ٻہوں ودھ ثقافتی اتے تاریخی تعلقات ہین، اساں مختلف شعبیاں اچ انہاں تعلقات کوں تعمیری تعاون اچ وٹاوݨ دا فیصلہ کیتے۔ ایرانی صدر ڈاکٹر مسعود پز شکیان کڄھ ݙینھ پہلے برصغیر اچ ابھردی ہوئی صورتحال اتے اوکھے ویلھے ٹیلی فون کر تے اظہار یکجہتی اتے چنتا کیتے، پاکستانی عوام کیتے انہاں دے جذبات تے ممنون ہیں۔ انہاں ایں بحران کوں ٻیا شدید تھیوݨ توں پہلے روکݨ تے زور ݙتے۔ وزیراعظم آکھیا جو ایرانی وزیر خارجہ عباس عراقچی بہترین سفارتکار ہین، انہاں نال دورہ پاکستان اچ ٻہوں چنڳی اتے تفصیلی ڳالھ مہاڑ تھئی اے، اللہ تعالیٰ دے فضل اتے ساݙی فوج دی بہادرانہ کارروائی اتے پاکستانی عوام دی اپݨیاں مسلح افواج دی غیر متزلزل حمایت نال اساں ایں بحران اچ فاتح ٻݨ تے اٻھریے ہیں، اساں امن چاہندے ہیں اتے مذاکرات نال خطے اچ امن کیتے رل تے کم کریسوں، تنازعہ کشمیر سودھا سارے تنازعات دے حل کیتے سنجیدہ ہیں، تنازعہ کشمیر اقوام متحدہ دیاں قرارداداں دے مطابق حل کیتا ونجے۔ 1954ء اچ بھارتی لوک سبھا اچ آنجہانی وزیراعظم جواہر لعل نہرو جموں و کشمیر دے عوام کوں حق خود ارادیت ݙیوݨ دا وعدہ کیتے، اساں امن کیتے ہمسایاں نال پاݨی دے تنازعہ، تجارت دے ودھارے اتے انسداد دہشت گردی تے مذاکرات کیتے تیار ہیں، ٻھل ایندے کیتے سنجیدگی ݙکھاوݨی ہوسی۔ انہاں آکھیا ڄیکر جارحیت دا رستہ اختیار کیتا گیا تاں ول اساں اپݨے ملک اتے علاقائی سالمیت دا دفاع کریسوں جیویں کڄھ ݙینھ پہلے اساں کیتے، ڄیکر انہاں امن دی پیشکش قبول کیتی تاں اساں حقیقت اچ اتے سنجیدگی نال ثابت کریسوں جو اساں حقیقت اچ امن چاہندے ہیں۔ انہاں آکھیا جو غزہ دی صورتحال ٻہوں چنتے آلی اے، جیندی اساں مذمت کریندے ہیں، 50 ہزار توں ودھ فلسطینی شہید تھی چکین، عالمی برادری کوں خطے اچ فوری اتے دیرپا جنگ بندی کیتے اپݨا اثرو رسوخ استعمال کرݨا چاہیدے۔ انہاں آکھیا جو پاکستان ایران اچ امن، ترقی اتے خوشحالی کیتے اپݨے برادر عوام دے نال کھڑے اتے اساں سول اتے پرامن ایٹمی پروگرام کیتے ایران دی مکمل حمایت کریندے ہیں، ایں حوالے نال مستقبل اچ قریبی مشاورت جاری راہسی۔ ایران دے صدر ڈاکٹر مسعود پز شکیان آکھیا جو پاکستان برادر ہمسایہ ملک اے، وزیراعظم شہباز شریف دی ایران آمد دا خیرمقدم کریندے ہیں، ݙوہیں ملکاں وچال ݙھاکیاں توں ثقافتی اتے تاریخی تعلقات ہین۔ او آئی سی دے پلیٹ فارم تے ڈونہیں ملکاں دا موقف ہکو ڄھیاں اے۔ انہاں آکھیا جو خطے دی ترقی اتے خوشحالی امن نال ممکن اے، پاکستان اتے بھارت وچال جنگ بندی دا خیرمقدم کریندے ہیں۔ انہاں آکھیا جو ڈونہیں ملکاں وچال سیاست، معیشت اتے بین الاقوامی تعلقات سودھا مختلف شعبیاں اچ تعاون تے گالھ تھئی۔ انہاں آکھیا جو سرحدی علاقیاں اچ انسداد دہشت گردی بارے ݙو طرفہ قریبی تعاون ضروری اے، ایران اتے پاکستان فلسطینی کاز دی بھرپور حمایت کریندن، فلسطین اچ تھیوݨ آلی نسل کشی تے عالمی برادری دی خاموشی سوالیہ نشان اے۔