وفاقی وزیر داخلہ محسن نقوی دی ایرانی وزیر داخلہ نال اہم ملاقات، اربعین اَتے محرم الحرام اچ زائرین سانڳے بارڈر 24 گھنٹے کھلا رکھݨ دا فیصلہ

تہران۔28مئی (اے پی پی) وفاقی وزیر داخلہ محسن نقوی تہران اچ ایران دے وزیر داخلہ سکندر مومنی نال اہم ملاقات کیتی جیندے اچ کئی وݙے فیصلے کیتے ڳئے۔ ملاقات اچ پاکستان اَتے ایران دا زائرین سانڳے بارڈر 24 گھنٹے کھلا رکھݨ دا فیصلہ کیتا ڳیا جیندے تحت اربعین اَتے محرم الحرام اچ پاک ایران بارڈر زائرین سانڳے 24/7 اوپن رہسی۔ ایرانی وزیر داخلہ آکھیا جو 5 ہزار پاکستانی زائرین کوں ایرانی حکومت مشہد اچ قیام و طعام دیاں سہولتاں ݙیسی اَتے ایرانی حکومت زائرین سانڳے بارڈر توں عراق تئیں خصوصی انتظامات کریسی۔ ملاقات اچ زائرین دی سہولت اَتے مسئلیاں دے فوری حل سانڳے ہاٹ لائن ٻݨاوݨ دا وی فیصلہ کیتا ڳیا۔ اربعین توں پہلے مشہد اچ پاکستانی زائرین بارے پاکستان، ایران اَتے عراق دی وزارت داخلہ دی سہ ملکی کانفرنس دے انعقاد دا وی فیصلہ کیتا ڳیا۔ ملاقات اچ زائرین دی سکیورٹی سانڳے پروازاں دی تعداد ودھاوݨ تے اتفاق کیتا ڳیا اَتے ایں تے عملدرآمد سانڳے لائحہ عمل جلدی ٻݨایا ویسی۔ ملاقات اچ بحری رستے نال وی زائرین کوں ایران اَتے عراق بھیجݨ تے وی ڳالھ مہاڑ کیتی ڳئی۔ ملاقات اچ پاک ایران تعلقات اَتے مختلف شعبیاں اچ آپسی تعاون دے ودھارے تے ڳالھ مہاڑ کیتی ڳئی۔ غیر قانونی امیگریشن، انسانی سمگلنگ اَتے انسداد منشیات دی روک تھام سانڳے اشتراک کار ودھاوݨ تے ڳالھ مہاڑ کیتی ڳئی۔ بارڈر سیکورٹی مینجمنٹ سانڳے ݙوہاں ملکاں وچال کوآرڈینیشن بہتر بݨاوݨ تے اتفاق کیتا ڳیا۔ ایرانی وزیر داخلہ آکھیا جو ایران اَتے پاکستان وچال بہترین تعلقات ہن، پاکستان دی سکیورٹی اساݙے سانڳے ساریں توں ودھ اہم اے۔ انہاں آکھیا جو زائرین دی خدمت اساݙا مذہبی فریضہ اے۔ ملاقات اچ غیر دانستہ پاکستانی بحری حدود اچ ونڄݨ آلے حراست اچ ڳھدے ڳئے ایرانی ماہی گیراں دی رہائی بارے ڳالھ مہاڑ کیتی ڳئی۔ ایرانی ہم منصب دے مطالبے تے وزیر داخلہ محسن نقوی ایں بارے ہر ممکن تعاون دی یقین دہانی کرائی۔ وزیر داخلہ محسن نقوی آکھیا جو زائرین کوں سہولتاں دی فراہمی تے ایرانی حکومت دے شکر گزار ہئیں، ہاٹ لائن دے قیام نال ایشوز کوں فوری طور تے حل کرݨ اچ مدد ملسی۔ ایران دے نائب وزیر داخلہ علی اکبر پورجمیشدیان، ڈپٹی وزیر داخلہ نادر یار احمدی، مشیر ہادیان، گورنر جنرل سیتان بلوچستان منصور باجر، وزارت داخلہ دے انٹرنیشنل افیئرز دے سربراہ کرنل جواہری وی ایں موقع تے موجود ہن۔ پاکستان ولوں ڈی جی ایف آئی اے اَتے متعلقہ افسر وی موجود ہن۔