28 مئی ہر پاکستانی سانڳے باعث افتخار اَتے قابل فخر ݙینھ اے، سائنسداناں، افواجِ پاکستان اَتے سیاسی قیادت ناقابلِ تسخیر پاکستان دی بنیاد رکھی، وفاقی وزیر داخلہ

اسلام آباد۔28مئی (اے پی پی) وفاقی وزیر داخلہ محسن نقوی آکھیا اے جو 28 مئی 1998 دا او ݙینھ جݙاں پاکستان بھارت دے 5 دھماکیاں دے جواب اچ 6 ایٹمی دھماکے کر تے دشمن کوں ݙو ٹوک پیغام ݙتا، پاکستان ایٹمی دھماکے کر تے دنیا کوں ݙسایا جو اساں دشمن دی کہیں وی مہم جوئی دا منہ ٻھن جواب ݙیوݨ سانڳے ہر ویلھے تیار ہئیں۔ یوم تکبیر تے آپݨے خصوصی سنیھے اچ قوم کوں مبارخ ݙیندیں ہوئیں انہاں آکھیا جو 28 مئی ہر پاکستانی سانڳے باعث افتخار اَتے قابل فخر ݙینھ اے۔ انہاں واضح کیتا جو سائنسداناں، افواجِ پاکستان اَتے سیاسی قیادت ناقابلِ تسخیر پاکستان دی بنیاد رکھی، سارے سائنسداناں کوں قوم سلام پیش کریندی اے۔ انہاں آکھیا جو تہاݙا اے کارنامہ دفاعی تاریخ دا سنہری باب اے۔ وزیر داخلہ محسن نقوی آکھیا جو عالمی دباؤ، معاشی پابندیاں اَتے خطرات دے باوجود 1998 اچ ایٹمی دھماکے کرݨ جرأت دی اعلیٰ مثال اے۔ وزیر داخلہ آکھیا جو یوم تکبیر صرف ہک ݙینھ کائنی بلکہ عزم تے ہمت دی روشن مثال اے جیڑھی اساکوں ہر اوکھ نال نبڑݨ دی طاقت ݙیندی اے، یومِ تکبیر اساݙی خودداری، قومی یکجہتی اَتے سٹریٹجک خودمختاری دا ݙینھ اے۔ انہاں ٻیا آکھیا جو چاغی دے پہاڑاں پاکستان دے جرأت مند فیصلے کوں دنیا بھر اچ گونج دار آواز ݙتی، اے پہاڑ گواہ ہن جو پاکستان آپݨی خودمختاری دے تحفظ سانڳے کوئی سمجھوتہ کائینی کیتا۔ وفاقی وزیر داخلہ محسن نقوی آکھیا جو اڄوکے چیلنجاں دا مقابلہ وی ایں اتحاد اَتے قربانی نال کیتا ویسی جو 28 مئی کوں کیتا ڳیا۔ وزیر داخلہ ایں ڳالھ تے زور ݙتا جو بھارت دی جارحانہ پالیسیاں دے باوجود پاکستان ہݨ وی ضبط تے تحمل دا مظاہرہ کیتا لیکن 10 مئی دا عبرتناک سبق دشمن کوں ہمیشہ یاد رہسی۔ انہاں آکھیا جو بھارت جاݨدے جو پاکستان دی دفاعی صلاحیت ناقابل تسخیر اے اَتے ہݨ او کوئی وی مس ایڈونچر توں پہلے سو واری سوچیسی، اساں دنیا کوں ثابت کیتے جو اساں ذمہ دار ایٹمی طاقت ہئیں۔ وزیر داخلہ واضح کیتا جو پاکستان امن چاہندے، پر آپݨی خودمختاری تے کوئی سمجھوتہ نہ کریسی۔ انہاں آکھیا جو یومِ تکبیر تے پوری قوم دفاعِ وطن دے معماراں کوں خراجِ عقیدت پیش کریندی اے۔