28 مئی دا ݙینھ پاکستان دے دفاع اَتے خودمختاری دی تاریخ اچ سنگ میل دی حیثیت رکھیندِے، سردار ایاز صادق

لاہور (اے پی پی) سپیکر قومی اسمبلی سردار ایاز صادق آکھیا جو 28 مئی دا ݙینھ پاکستان دے دفاع اَتے خودمختاری دی تاریخ اچ سنگ میل دی حیثیت رکھیندِے۔ او یوم تکبیر دے موقع تے صوبائی وزیر سوشل ویلفیئر و بیت المال سہیل شوکت بٹ دے نال باٹا پور وچ یوم تکبیر بارے عوامی اجتماع نال خطاب کریندے پئے ہن۔ مسلم لیگ ن دے کارکنان عہدیداران اَتے عوام دی وݙی تعداد ایں موقع تے موجود ہئی۔ سردار ایاز صادق آکھیا جو جے 28 مئی 1998 کوں نواز شریف دھماکے نہ کریندا تاں اج خطے دی صورتحال مختلف ہوندی۔ انہاں آکھیا جو مودی حکومت نیلم جہلم پراجیکٹ اتے پاکستان تے حملے دی ہر ممکن کوشش کیتی، لیکن اساڈی بہادر مسلح افواجِ بھرپور جواب ݙے تے پاکستان دا سر فخر نال اُچا کر ڈِتا۔ اسپیکر قومی اسمبلی واضح کیتا جو جے ہندوستان دوبارہ حملے دی کوشش کریسی تاں اینکوں مُونہہ ٻھن جواب ڈِتا ویسی۔ پاکستان پہل نہ کریسی لیکن دفاع وچ کہیں قسم دی ڳھٹکی نہ چھوڑی ویسی۔ سردار ایاز صادق آکھیا جو پہلگام واقعہ توں بعد پاکستان غیر جانبدار ملکاں توں تحقیقات کراوݨ دی پیشکش کیتی تاکہ اصل حقائق دنیا دے سامھنے آ سگن۔ انہاں آکھیا جو بھارت دی سازش ناکام تھئی اَتے بھارت کوں نہ صرف سفارتی بلکہ جنگی میدان وچ وی شکست تھئی۔