“معرکہ حق” دی جت توں بعد پاکستان دی بین الاقوامی اہمیت ودھ ڳئی اے، یوم تکبیر اساݙی قومی جت دا ڈینھ اِے، عطاء اللہ تارڑ

لاچین (اے پی پی) وفاقی وزیر اطلاعات تے نشریات عطاء اللہ تارڑ آکھیا جو “معرکہ حق” دی جت توں بعد پاکستان دی بین الاقوامی اہمیت ودھ ڳئی اے، آذربائیجان دی عوام ایں کامیابی تے جشن منایا، یوم تکبیر اساڈی قومی فتح دا ڈینھ اِے۔ بدھ کوں دورہ آذربائیجان وچال میڈیا نال خاص گالھ مہاڑ کریندیں ہوئیں وفاقی وزیر اطلاعات آکھیا جو اللہ تعالیٰ دے فضل و کرم نال “معرکہ حق” اَتے “آپریشن بنیان مرصوص” اچ شاندار کامیابی ملی اِے جئیں تے پوری قوم شکر گزار اِے۔ وزیراعظم شہباز شریف اَتے فیلڈ مارشل سید عاصم منیر ایں دورہ تے موجود ہن، آذری اَتے ترک عوام ساڈی جت تے بہوں خوشیاں منائن، اساݙا اڄ ترائے فریقین دا مذاکرات اَتے گالھ مہاڑ تھیسی، ڈوہیں ملکاں نال اساݙے سٹریٹجک تعلقات ہن، ایں توں پہلے اساں ترکیہ اَتے ایران گئے اَتے اڄ اِتھاں آذربائیجان اچ موجود ہیسے، اڄ آذربائیجان دا یوم جمہوریہ اَتے پاکستان دا یوم تکبیر منایا ویندا پئِے، اِتھاں ہِک جشن دا ماحول اِے۔ انہاں آکھیا جو کل وزیراعظم شہباز شریف آذربائیجان دے صدر الہام علیوف اَتے عوام دا بھرپور حمایت تے دل دی گہرائیاں نال شکریہ ادا کیتے، پاکستان بارے اِتھاں وݙا جذبہ پاتا ویندے۔ انہاں آکھیا جو وزیراعظم شہباز شریف دی متحرک سفارت کاری پاکستان کوں بین الاقوامی سطح تے نویں سنڄاݨ ڈِتی اِے۔ انہاں واضح کیتا جو “معرکہ حق” اچ پاکستان حق اَتے سچ تے ہا اَتے دنیا پاکستان دے موقف کوں منیا۔ عطاء اللہ تارڑ آکھیا جو اج یوم تکبیر اَتے اِتھاں دے ریپبلک ڈے دے موقع تے وزیراعظم شہباز شریف، ترکیہ دے صدر رجب طیب اردوان اَتے آذربائیجان دے صدر الہام علیوف کٹھے تھیسن۔ انہاں آکھیا جو اساݙا مشرقی ہمسایہ ملک دا شکست خوردہ وزیراعظم آپݨی خفت مٹاوݨ کیتے غیر ذمہ دارانہ بیانات ڈیندا پئِے لیکن دنیا پاکستان کوں سراہندی پئی اِے۔ ہِک سوال دے جواب وچ وفاقی وزیر اطلاعات آکھیا جو وزیراعظم شہباز شریف اَتے نائب وزیراعظم اسحاق ڈار دی سفارتی کوششاں پاروں عالمی سطح تے پاکستان دے تعلقات مستحکم تھیندے پئن جڈاں جو مختلف شعبیاں اچ تعاون ودھاوݨ کیتے جلدی وفود دی سطح تے ٻئی ملاقاتاں تھیسن۔ انہاں آکھیا جو آذربائیجان دے صدر ڈوہاں ملکاں دے تعلقات کوں نویاں بلندیاں تئیں گھن ونڄݨ چاہندن۔ انہاں آکھیا جو ترکیہ، آذربائیجان اَتے پاکستان دے عوام، حکومتاں اَتے قیادت آپس وچ ہِک آواز ہن اَتے ہِک ٻئے دی خوشی اچ شریک تھیندن۔