جاپان دی ٹیکنالوجی اتے اپݨے وسائل دے امتزاج نال اساں ہک پائیدار صنعتی مستقبل تعمیر کر سڳدوں، جام کمال خان

اسلام آباد ۔ 29 مئی (اے پی پی) وفاقی وزیر تجارت جام کمال خان آکھیے جو ساݙے دروازے جاپانی سرمایہ کاراں کیتے کھلئے پئن، اساں جاپان کوں نہ صرف ہک شراکت دار بلکہ پاکستان دی معیشت کوں جدید خطوط تے استوار کرݨ کیتے ہک محرک قوت دے طور تے ݙیکھدوں ، جاپان دی ٹیکنالوجی اتے ساݙے وسائل دے امتزاج نال اساں ہک پائیدار صنعتی مستقبل تعمیر کر سڳدوں۔ اے ڳالھ انہاں ٹوکیو اچ جاپان انٹرنیشنل کوآپریشن ایجنسی (جائیکا)، جاپان ایکسٹرنل ٹریڈ آرگنائزیشن (جیٹرو) اتے جاپان-پاکستان بزنس کوآپریشن کمیٹی (جے پی بی سی سی) نال اعلیٰ سطحی ملاقاتاں اچ آکھی ۔ وفاقی وزیر تجارت ملاقاتاں اچ پائیداری، جدت اتے اقتصادی انضمام تے مبنی سانجھے مفاد تے مبنی شراکت داری کوں ودھاوݨ دے پاکستان دے عزم دا اعادہ کیتا۔ ساریاں ملاقاتاں اچ وزیر تجارت تانبہ، سونا اتے ݙوجھے صنعتی معدنیات دے ذخیرے کوں جاپانی سرمایہ کاری کیتے ہک سٹریٹجک موقع قرار ݙتا۔ انہاں جاپانی کمپنیاں کوں دعوت ݙتی جو او تلاش، جدید پراسیسنگ ٹیکنالوجیز اتے ویلیو چین دی ترقی اچ شامل تھیون اتے پاکستان دے جغرافیائی محل وقوع توں فیدہ چا سڳن۔ جام کمال آکھیے جو ساݙا معدنی شعبہ ہݨ وی وݙے پیمانے تے غیر دریافت شدہ اے جئیں کیتے اساں جاپانی شراکت داراں کوں اعلیٰ قدر دے منصوبیں اچ شامل تھیوݨ دی دعوت ݙیندوں جو اہم معدنیات دی پائیدار سپلائی چینز قائم کرݨ اچ مددگار ثابت تھیسن۔ انہاں آکھیے جو پاکستان ٹیکنالوجی دی منتقلی، پبلک پرائیویٹ پارٹنرشپ اتے ایجھا سرمایہ کاری فریم ورک کیتے تیار اے جو سانجھے فیدے اتے دیرتئیں اثرات کوں یقینی بݨاوے۔ جائیکا دے سینئر نائب صدر ہارا شوہی اتے ساؤتھ ایشیا ڈیپارٹمنٹ دے ݙوجھے افسراں نال ڳالھ مہاڑ اچ وزیر تجارت زور ݙتے جو مستقبل دا اشتراک پاکستان دی قومی ترجیحات موجب ہووݨا چاہیدے۔ انہاں جائیکا ولوں گزریل سالاں اچ 11.7 ارب ڈالر دی معاونت دی تعریف کتیی جو نقل و حمل، توانائی، ووکیشنل تربیت اتے آفتاں نال نبڑݨ ۔ انہاں جائیکا تے زور ݙتے جو او صنعتی کلسٹرز اتے لاجسٹکس کوریڈورز کیتے اضافی معاونت ݙیوے تاں جو معدنی برآمدات اتے ویلیو ایڈڈ پیداوار اچ ودھارا تھیوے۔ وزیر تجارت ڈیجیٹل اختراعات اتے گرین ٹیکنالوجیز سودھے جدید صنعتاں اچ پاکستانی صلاحیت کوں ودھاوݨ کیتے تکنیکی تعاون کوں ودھاوݨ دی وی درخواست کیتی۔ انہاں ٹیکس، توانائی، زراعت اتے انسانی وسائل دے شعبے اچ جاری اصلاحات تے روشنی پاتی۔ جیٹرو دے صدر سسومو کاتااوکا اتے ایگزیکٹو نائب صدر کازویا ناکاجو نال ملاقات اچ وزیر تجارت پاکستان اتے جاپان وچال تجارت اتے سرمایہ کاری دے ودھارے اچ جیٹرو دے کلیدی کردار دی تعریف کیتی ۔ انہاں جاپانی کمپنیاں کوں پاکستان دے سپیشل اکنامک زونز (ایس ای زیڈ) اتے ویلیو ایڈڈ شعبیاں جیڑھے جو آئی سی ٹی، انجینئرنگ اتے فوڈ پروسیسنگ اچ سرمایہ کاری دے موقع ڳولݨ تے ڳالھ مہاڑ کیتی۔ انہاں جیٹرو توں درخواست کیتی جو او جاپانی صنعتی اداریاں اچ پاکستان دے معدنی سرمایہ کاری دے امکانات کوں نمایاں کرݨ کیتے خصوصی مہمان، سیمینارز اتے بی ٹو بی سرگرمیاں دا انتظام کرے۔ انہاں جاپانی کمپنیاں کوں ٹی ڈی اے پی دی ولوں منعقدہ پاکستان دی نمایاں تجارتی نمائشاں اچ شرکت دی دعوت ݙتی تاں جو عملی شراکت داری دے موقع پیدا کیتے ونڄ سڳن۔ جاپان-پاکستان بزنس کوآپریشن کمیٹی دی ولوں ݙتے ڳئے استقبالیہ ݙوپہر دے کھاݨے دے دوران وزیر تجارت کمیٹی دے پراݨے کردار دی تعریف کیتی جو پاکستان اتے جاپان وچال بزنس ٹو بزنس رابطے کوں تکڑابݨاوݨ اچ پیش پیش رہی اے۔ انہاں جے پی بی سی سی تے زور ݙتے جو او پاکستان-جاپان بزنس ڈائیلاگ دی تیاری اچ فعال کردار ادا کرے، خاص کر معدنی اشتراک، مینوفیکچرنگ، انجینئرنگ اتے زرعی ویلیو چینز دے شعبیں اچ سفارشات پیش کرے۔ انہاں ایں ڳالھ دا یقین ݙیوائے جو پاکستان سرمایہ کار دوست ملک اے اتے جاپانی کمپنیاں دے خدشات کوں اعلیٰ سطحی بین الوزارتی رابطے دے ذریعے ترجیحی بنیاداں تے حل کیتا ونڄ سڳدے۔