وزیراعظم شہباز شریف اَتے تاجکستان دے صدر مشترکہ تاریخ، ثقافت اَتے جغرافیہ اُتے مبنی برادرانہ تعلقات دی توثیق کریندے جاری تعاون تے اطمینان کیتے

دوشنبے۔ 29 مئی(اے پی پی) وزیراعظم شہباز شریف اَتے جمہوریہ تاجکستان دے صدر امام علی رحمان مشترکہ تاریخ، ثقافت اَتے جغرافیہ اُتے مبنی برادرانہ تعلقات دی توثیق کریندے جاری تعاون اُتے اطمینان کیتے اَتے اسٹریٹجک شراکت داری کوں ہک نویں سطح تئیں گھن ونجݨ دا عزم دوہرائے۔ انہاں سرمایہ کاری دے موقعیاں، تعلیمی رشتیاں، ثقافتی تبادلیاں کوں ودھاوݨ سودھا معلوماتی ٹیکنالوجی اچ اشتراک کوں اڳو تے ٹورݨ اَتے عوامی رشتیاں کوں مضبوط بݨاوݨ کیتے نویں امکانات ڳولݨ تے اتفاق کیتے۔ تاجکستان دی حکومت دی دعوت تے وزیراعظم محمد شہباز شریف دوشنبے پُڄین جتھاں 29 توں 31 مئی 2025 تئیں تھیوݨ آلی بین الاقوامی اعلیٰ سطح کانفرنس برائے تحفظ گلیشیئرز اچ شرکت کریسن۔ وزیراعظم دے کٹھے اعلیٰ سطح وفد اچ وزیر اطلاعات عطا اللہ تارڑ، وزیراعظم دے معاونِ خصوصی سید طارق فاطمی اَتے سینئر حکام شامل ہن۔ دوشنبے پڄݨ تے تاجکستان دے وزیراعظم قاہر رسول زادہ انہاں دا استقبال کیتے۔ وزیراعظم جمہوریہ تاجکستان دے صدر امام علی رحمان نال ملین۔ قصرِ ملت پڄݨ تے صدر وزیراعظم اَتے انہاں دے وفد کوں خؤش آمدید آکھیا ڳئے۔ ݙوہیں رہنماواں ݙوطرفہ تعاون دے مختلف پہلواں دے نال نال علاقائی اَتے عالمی معاملیاں اُتے وی تفصیلی الایا۔ صدر اَتے وزیراعظم جولائی 2024 اچ وزیراعظم دے دوشنبے دے دورے اچ طے تھیوݨ آلے تاریخی اسٹریٹجک پارٹنرشپ معاہدے کوں یاد کیتے، جئیں ݙوطرفہ تعلقات کوں مضبوط بݨاوݨ اَتے مشترکہ مفادات کوں فروغ ڈیوݨ دی ہک مضبوط بنیاد ݙتی اے۔ انہاں مشترکہ تاریخ، ثقافت اَتے جغرافیہ اُتے مبنی برادرانہ تعلقات دی توثیق کریندے ہوئے جاری تعاون اُتے اطمینان کیتے اَتے اسٹریٹجک شراکت داری کوں ہک نویں سطح تئیں گھن ونجݨ دے عزم دا اعادہ کیتے تاں جو ݙوہیں ملکاں اَتے لوکاں کوں فائدہ تھیوے۔ ݙوہیں رہنماواں ݙوطرفہ تعاون دا جائزہ گھدا جیڑھا سیاسی، تجارتی و اقتصادی، توانائی، دفاع، سلامتی، اَتے علاقائی رشتیاں دے شعبیاں تے مشتمل ہئی۔ کاسا-1000 منصوبے دے حوالے نال، ݙوہیں رہنماواں ایکوں علاقائی انضمام کیتے ہک اہم منصوبے دے طور اُتے اُجاگر کرݨ دے عزم دا اعادہ کیتے۔ 15 مئی 2025 کوں دوشنبے اچ تھیوݨ آلے کاسا-1000 بین الحکومتی کونسل دے اجلاس دا خیرمقدم کریندے وزیراعظم ایں منصوبے کوں تیکھے فعال بݨاوݨ کیتے مشترکہ عزم دا یقین ڈیوائے۔ اقتصادی تعاون سانڳے انہاں ݙوطرفہ تجارت اچ موجود غیر استعمال شدہ موقعیاں دا اعتراف کریندے ہوئے ایں ڳالھ اُتے زور ڈتے جو پاکستان-تاجکستان مشترکہ کمیشن برائے تجارت، اقتصادی اَتے سائنسی و تکنیکی تعاون دے ستویں اجلاس، جیڑھا دسمبر 2024 اچ اسلام آباد اچ تھیے، اچ تھیوݨ آلے فیصلیاں دے مطابق تعاون دے نویں رستے ڳولیے ونڄن۔ ݙوہیں ایں ڳالھ تے وی اتفاق کیتے جو موجودہ ادارہ جاتی ڈھانچیاں، بشمول 12 مشترکہ ورکنگ گروپس کوں مؤثر طریقے نال استعمال کر تے خاص کر تیل و گیس اَتے توانائی دے شعبیاں اچ تعاون ودھایا ویسی۔ انہاں دفاع اَتے سلامتی دے شعبے اچ ودھدے تعاون دا خیرمقدم کیتے اَتے ایں عزم دا اعادہ کیتے جو او مشترکہ سلامتی چیلنجز نال نبڑݨ کیتے ایں تعاون کوں مزید مضبوط بݨیسن۔ انہاں دہشت گردی، سرحد پار منظم جرائم، اَتے انسانی و منشیات دی اسمگلنگ دے خلاف تعاون کوں ودھاوݨ دی لوڑ تے زور ڈتے۔ ملاقات اچ علاقائی اَتے عالمی جغرافیائی و سیاسی حالتاں اُتے الیندے انہاں خطے اچ امن، استحکام اَتے اقتصادی ترقی ودھاوݨ کیتے رل مل تے کم کرݨ دا آکھیے۔ تاجک-کرغیز سرحدی تنازعے دے پرامن حل اُتے وزیر اعظم صدر کوں ایں سنگ میل اُتے مبارک ڈتی اَتے مسئلے کوں پرامن ذرائع نال حل کرݨ تے صدر دی دانشمندی اَتے بصیرت دی تعرفی کیتی۔ وزیر اعظم امید کیتی جو ایں تاریخی پیشرفت نال خطے اچ تعاون اَتے ترقی دے ہک نویں دور دا آغاز تھیسی۔ ڈوہیں رہنماواں اقوام متحدہ، او آئی سی، شنگھائی تعاون تنظیم ، اَتے اقتصادی تعاون تنظیم جیڑھے کثیر الجہتی فورمز اُتے تعاون اُتے اطمینان کیتے اَتے باہمی دلچسپی دے عالمی و علاقائی معاملیاں اُتے تعاون جاری رکھݨ دے عزم دا اعادہ کیتے۔ وزیر اعظم تاجکستان دے نال پاکستان دے تاریخی اَتے خوشگوار تعلقات دی توثیق کریندے زور ڈیتے جو پاکستان تاجکستان دے نال جاری باقاعدہ اَتے کثیر الجہتی رشتیاں کوں مشترکہ مفاد کیتے وڈی اہمیت ڈیندے۔ انہاں وسطی ایشیائی خطے دے نال رشتیاں کوں مضبوط بݨاوݨ کیتے پاکستان دے عزم دا اعادہ کیتے اَتے ایں سانڳے چین-پاکستان اقتصادی راہداری کوں علاقائی ربط دا کلیدی منصوبہ قرار ڈیتے۔ وزیر اعظم صدر امام علی رحمن کوں جنوبی ایشیائی خطے دی تازہ ترین صورتحال توں وی باخبر کیتے۔ انہاں زور ڈیتے جو ساڈا خطہ بھارت دے غیر ذمہ دارانہ اَتے غیر قانونی اقدامات، جو 7 مئی 2025 توں جاری ہن، دا متحمل نی تھی سڳدا، کیونجو اے اقدامات جنگ دے مترادف اَتے اقوام متحدہ دے منشور اَتے بین الاقوامی قانون دی خلاف ورزی ہن۔ وزیر اعظم عالمی برادری اُتے زور ڈیتے جو او بھارت کوں جوابدہ ٹھہراوے۔ انہاں دوہرائے جو پاکستان امن چاہندے ٻھل ڄیکر چیلنج کیتا ڳیا تاں او آپݨی خودمختاری دا بھرپور دفاع کریسی۔ انہاں جموں و کشمیر دے تنازعے دے اقوام متحدہ دی سلامتی کونسل دی قرارداداں دے مطابق حل کوں خطے اچ پائیدار امن کیتے کلیدی قرار ڈیتے۔ صدر امام علی رحمان ہر شعبے اچ ذوطرفہ تعاون کوں مزید فروغ ڈیآݨ دی خواہش دا اعادہ کیتے اَتے پاکستان کوں ہک قابل اعتماد شراکت دار قرار ڈیتے۔ انہاں اعلیٰ سطح باقاعدہ رشتیاں دا ذکر کریندے سائنس و ٹیکنالوجی، زراعت، صنعت، پن بجلی پیداوار اَتے سیاحت دے شعبیاں اچ قریبی تعاون دی اہمیت اُتے زور ڈیتے۔ وزیر اعظم 29 توں 31 مئی 2025 کوں دوشنبے اچ تھیوݨ آلی “بین الاقوامی اعلیٰ سطح کانفرنس برائے گلیشیئرز دے تحفظ” دے کامیاب انعقاد تے صدر تاجکستان کوں مبارک ڈتی۔ وزیر اعظم صدر علی امام رحمان کوں اسلام آباد دے سرکاری دورے دی دعوت ڈتی تاں جو تذویراتی مکالمہ جاری رکھیا ونج سڳے اَتے کثیر الجہتی شراکت داری کوں مزید گہرا کیتا ونجے۔ صدر مملکت تاجکستان وزیر اعظم شہباز شریف دے اعزاز اچ ہک خصوصی استقبالیہ وی ݙتے۔