پاکستان اپݨے حصے دے پاݨی تے کوئی سمجھوتہ کریسی نہ ہی بھارت کوریڈ لائن کراس کرݨ ݙیسی ،وزیراعظم شہباز شریف دا دوشنبے اچ بین الاقوامی کانفرنس توں خطاب

دوشنبے۔30مئی(اے پی پی) وزیراعظم محمد شہباز شریف گلیشیئرز دے تحفظ  کوں پاکستان سانڳے ٻہوں اہمیت دا حامل قرار ݙیندے آکھیے جو پاکستان اچ پاݨی دا دارومدار گلیشیئرز تے ہے ،ماحولیاتی تبدیلیاں دے اثرات دے نتیجے اچ پاکستان دے گلیشیئرز تکھے پگھلدے پئن ،ترقی یافتہ ملک  ماحولیاتی تبدیلیاں دے چیلنجز نال نبݨݨ سانڳے آپݨی ذمہ واریاں پوریاں کرن ،پاکستان اپݨے حصے دے پاݨی تے کوئی سمجھوتہ کریسی نہ ہی بھارت کوریڈ لائن کراس کرݨ ݙیسی ۔ اے ڳالھ انہاں تاجکستان دے دارالحکومت دوشنبے اچ گلیشیئرز دے تحفظ متعلق  بین الاقوامی کانفرنس (آئی جی سی پی 2025) توں خطاب کریندے آکھی۔وزیراعظم گلیشیئرز دے تحفظ تے چیلنجز تے جامع ڳالھ مہاڑ تے تاجک صدر کوں مبارخ ݙتی ۔ انہاں آکھیے پاکستان پولورینجز دے بعد دنیا دا ساریں توں وݙا گلیشیئرزآلا علاقہ اے،پاکستان اچ 13ہزار گلیشیئرز ہن،گلیشیئرز دا تحفظ اساں کیتے ٻہوں اہم اے ، پاکستان دے پاݨی دا نصف حصہ گلیشیئرز توں ملدے ،انڈس ریور سسٹم ساݙی لائف لائن اے اتے ساݙی تہذیب ، ثقافت تے معیشت  دا ایں تے دارومدار ہے ، پاکستان دے 5 وݙے دریاواں دا پاݨی گلیشیئرز دا مرہون منت ہے ،ماحولیاتی تبدیلیاں دے اثرات دے نتیجے اچ پاکستان دے گلیشیئرز تکھے پگھلدے پئن ،2022 اچ ماحولیاتی تبدیلیاں پاروں چھل تے طوفانی مینھ دا سامݨا کرݨا پئے پورے ملک اچ لکھاں ایکڑ تے کھڑیاں فصلاں تباہ ،  ہزاروں گھرملیا میٹ تھی ڳئے انفراسٹرکچر کوں ٻہوں ضیان پڄا۔ وزیراعظم آکھیے پاکستان دا فضا اچ زہریلی گیساں دے اخراج اچ حصہ  ادھ فیصد توں وی گھٹ اے لیکن پاکستان دنیا دے انہاں 10 ملکاں اچ شامل اے جیڑھے ماحولیاتی تبدیلیاں توں ساریں توں ودھ متاثر ہن ۔وزیراعظم آکھیے ماحولیاتی تبدیلیاں پاروں ایکو سسٹم وی متاثر تھیندا پئے ،ترقی یافتہ ملک ماحولیاتی تبدیلیاں  دے چیلنجزنال نبݨݨ سانڳے آپݨی ذمہ واریاں پوریاں کرن ایں سلسلے اچ وختی تے عملی اقدامات ناگزیر ہن ،ترقی یافتہ ملک ترقی پذیرملکاں اچ ارلی وارننگ سسٹم تے ڈیزاسٹر منیجمنٹ اچ سرمایہ کاری ودھاون کیوں جو مستقبل اچ وی ماحولیاتی تبدیلیاں پاروں وݙی تباہی دا خطرہ موجود اے ۔وزیراعظم آکھیے عالمی برادری ایں ضمن اچ آپݨی ذمہ واریاں دا ادراک کرے تےاپݨے وعدیں تے وختی عملدرآمد کرے۔ وزیراعظم آکھیے پاݨی کوں ہتھیار دے طور تے وی استعمال کیتا ویندا پئے ۔بھارت دا سندھ طاس معاہدے کوں آپݨے تنگ نظر سیاسی مفادات سانڳے یک طرفہ طور تے معطل کرݨ دا فیصلہ قابل مذمت اے۔ انہاں اعلان کیتے جو پاکستان اپݨے حصے دے پاݨی تے کوئی سمجھوتہ نہ کریسی تے بھارت کوں ریڈ لائن کراس نہ کرݨ ݙیسی ۔وزیراعظم آکھیے گلیشیئرزدا تحفظ ہر صورت یقینی بݨاوݨا ہوسی