ڈھانچہ جاتی اصلاحات، صنعتاں نال تکڑے رابطے اتے پالیسیاں تے تکھے عملدرآمد یقینی بݨایا ویسی، وفاقی وزیر پٹرولیم دی او آئی سی سی آئی دے وفد نال ملاقات اچ ڳالھ مہاڑ

اسلام آباد۔ 30 مئی (اے پی پی) وفاقی وزیر پٹرولیم علی پرویز ملک حکومت دے ایں عزم دا اعادہ کیتے جو ڈھانچہ جاتی اصلاحات، صنعتاں نال تکڑے رابطے اتے پالیسیاں تے تکھے عملدرآمد کوں یقینی بݨایا ویسی تاں جو ملک دی صنعتی ترقی کوں ودھ مضبوط بݨایا ونڄ سڳے۔ پٹرولیم ڈویژن ولوں جاری بیان موجب ، انہاں اے ڳالھ اوورسیز انویسٹرز چیمبر آف کامرس اینڈ انڈسٹری (او آئی سی سی آئی) دے وفد نال ملاقات اچ آکھی ۔ ملاقات اچ مقامی اتے ملٹی نیشنل کمپنیاں دے سینئر رہنما وی موجود ہن۔ ملاقات اچ پاکستان دی توانائی دی ترجیحات اتے طویل مدتی معاشی استحکام تے ڳالھ مہاڑ کیتی ڳئی۔ وفاقی وزیر ڈھانچہ جاتی اصلاحات، پالیسیاں تے تکھے عملدرآمد اتے صنعتاں نال مضبوط رابطے سانڳے حکومت دے عزم دا اعادہ کیتا اتے اپ سٹریم ایکسپلوریشن، پائپ لائن دی ترقی اتے ڈاؤن سٹریم پروسیسنگ اچ سرمایہ کاری دے اہم مواقع دا خاکہ پیش کیتا جیڑھے ماحول دوست توانائی ولوں عالمی رجحان نال ہم آہنگ ہن۔ علی پرویز ملک اڄوکی غیر ملکی سرمایہ کاری متعلق کامیابیاں کوں وی اجاگر کیتا جنہاں دے تحت معدنیات دے شعبے اچ غیر ملکی سرمایہ کاراں کوں راغب کرݨ اچ نمایاں کامیابیاں ڳھدن ۔انہاں اقدامات دا مقصد ملک دے قدرتی وسائل کوں استعمال کرݨ، برآمدات اچ وادھا اتے صنعتی تنوع کوں ودھارا ݙیوݨا اے۔ او آئی سی سی آئی دے صدر اتے فیصل بینک دے سی ای او یوسف حسین پالیسی اچ تسلسل، تکنیکی بنیاداں تے عملدرآمد اتے سانجھی تے مربوط حکمت عملی دی اہمیت تے زور ݙتا تاں جو معاشی استحکام اتے پائیدار ترقی کوں یقینی بݨایا ونڄ سڳے۔ انہاں آکھیے جو حکومت، او آئی سی سی آئی اتے صنعت وچال پالیسی سازی اتے عملدرآمد ݙوہیں اچ نیڑے تعاون اتے شراکت داری ودھ ضروری اے تاں جو مثبت نتیجے ڳھدے ونڄ سڳن اتے سرمایہ کاراں دے اعتماد کوں ودھ تکڑا بݨایا ونڄ سڳے۔