وزیر خزانہ سینیٹر محمد اورنگزیب دی صدارت اچ پاکستان کرپٹو کونسل دا اعلیٰ سطح دا اجلاس 2 جون کوں تھیسی

اسلام آباد۔ 30 مئی (اے پی پی) پاکستان کرپٹو کونسل دا اعلیٰ سطح دا اجلاس سنوار، 2 جون 2025 کوں وفاقی وزیر خزانہ و محصولات سینیٹر محمد اورنگزیب دی صدارت اچ تھیسی۔ وزارت خزانہ توں جاری بیان موجب ، اے اجلاس پاکستان اچ ڈیجیٹل کرنسی اتے کرپٹو دے وسیع تر منظر نامے متعلق ودھدے ضابطہ جاتی اتے قانونی ڈھانچے تے غور و خوض کیتے ہک سٹریٹجک فورم دے طور تے منعقد کیتا ویندا پئے۔ اجلاس اچ وزیر مملکت و وزیراعظم دے معاون خصوصی بلاک چین و کرپٹو بلال بن ثاقب بطور چیف ایگزیکٹو افسر پاکستان کرپٹو کونسل دے خصوصی طور تے شریک تھیسن۔ اجلاس اچ گورنر اسٹیٹ بینک آف پاکستان، چیئرمین سکیورٹیز اینڈ ایکسچینج کمیشن، سیکرٹری قانون و انصاف ڈویژن اتے سیکرٹری وزارت انفارمیشن ٹیکنالوجی و ٹیلی کمیونیکیشن دی شرکت متوقع اے۔ اجلاس دے اہم نکات اچ پاکستان اچ ڈیجیٹل اتے ورچوئل اثاثیں کیتے ہک تکڑے ضابطہ جاتی فریم ورک دی تیاری شامل اے جیڑھا عالمی معیاراں اتے جدید ٹیکنالوجی دے تقاضیں موجب ہووے۔ اجلاس اچ ہک اہم موضوع پاکستان ورچوئل اثاثہ جات ریگولیٹری اتھارٹی دے قیام کیتے ابتدائی اقدامات تے غور تھیسی، اے ہک مجوزہ خودمختار ادارہ ہوسی جیڑھا ملک اچ ڈیجیٹل فنانس اتے کرپٹو ایکو سسٹم دی نگرانی کریسی۔ کونسل دا مقصد ہک محفوظ، شفاف اتے اختراع دوست ضابطہ جاتی ماحول دی بنیاد رکھݨ اے تاں جو بلاک چین ٹیکنالوجی کوں ذمہ داری نال اپناوݨ ، سرمایہ کاراں دے تحفظ، اتے مالی شمولیت دے ودھارے کوں ممکن بݨایا ونڄ سڳے۔ اے اجلاس پاکستان اچ مستقبل دے تقاضیں نال ہم آہنگ مالیاتی ڈھانچے کوں ودھاوݨ ، ڈیجیٹل معیشت اچ استحکام اتے ضابطیں دی مکمل پابندی کوں یقینی بݨاوݨ دے حوالے نال حکومتی عزم دا عکاس اے۔