وفاقی وزیر داخلہ محسن نقوی دی صدارت اچ اجلاس، زائدالمیعاد شناختی کارڈز تے جاری سمز کوں بلاک کرݨ سودھے فیصلے کیتے ڳئن

اسلام آباد۔ 30 مئی (اے پی پی) وفاقی وزیر داخلہ محسن نقوی نیشنل ڈیٹا بیس اینڈ رجسٹریشن اتھارٹی (نادرا) دے ہیڈکوارٹرز دا دورہ کیتا اتے اہم اجلاس دی صدارت کریندیں وݙے اہم فیصلے کیتے، زائدالمیعاد شناختی کارڈز تے جاری ساریاں سماں کوں وختی بلاک کرݨ دا فیصلہ کیتا، وزیر داخلہ پورے ملک اچ چہرہ شناسی (فیشل ریکوگنیشن) ٹیکنالوجی دے نفاذ کوں 31 دسمبر 2025 تئیں یقینی بݨاوݨ دی ہدایت کرڈتی۔ وزارت داخلہ توں جاری بیان موجب ، وزیر داخلہ سیکٹر آئی 8 اچ 10 منزلہ نادرا میگا سینٹر دا وی سنگ بنیاد وی رکھیا، آئی ایٹ نادرا میگا سینٹر دی تکمیل جون 2026 اچ متوقع اے۔ وزیر داخلہ محسن نقوی دی صدارت اچ اجلاس اچ زائدالمیعاد شناختی کارڈز تے جاری ساریاں سماں کوں وختی بلاک کرݨ دا فیصلہ کیتا، پہلے مرحلے اچ 2017 یا ایں توں پہلے دے شناختی کارڈز تے جاری سمز بند کیتیاں ویسن۔ اجلاس اچ فیصلہ کیتا ڳئے جو اڳلے مرحلے اچ 2017 دے بعد دے منسوخ شدہ کارڈز تے وی ایہا پالیسی لاگو کیتی ویسی تاں جو صرف فعال شناختی کارڈ تے ہی سمز جاری رہسن۔ چیئرمین نادرا لیفٹیننٹ جنرل محمد منیر افسر ݙسایا جو پی ٹی اے دے تعاون نال انہاں موبائل سمز کوں بلاک کیتا ویندا پئے جیڑھے فوت تھیوݨ آلے لوکاں یا میعاد ختم شدہ شناختی کارڈز دے حامل لوکاں دے ناں تے رجسٹرڈ ہن۔ انہاں آکھیے جو مختلف سرکاری محکمے اتے سروس فراہم کنندگان شہریاں دی بائیومیٹرک معلومات اپݨیاں مقامی ڈیٹابیسز اچ محفوظ کریندے پئن جیندے نال اے حساس معلومات غلط استعمال اتے چوری دے خطرے نال ݙوچار ہن۔ چیئرمین نادرا آکھیے جو نادرا دے محفوظ اتے تصدیق شدہ ڈیٹا بیس توں فیدہ چیندیں فیشل ریکوگنیشن نظام دا استعمال کیتا ونڄے، خاص طور تے انہاں شہریاں دی مدد کیتے جنہاں کوں فنگر پرنٹس دی تصدیق اچ اوکھ تھیندی پئی اے ۔ وزیر داخلہ محسن نقوی آکھیے جو وزارت داخلہ ولوں سارے متعلقہ اداریاں کوں شہریاں دی بائیومیٹرک معلومات دی علیحدہ سٹوریج بند کرݨ دیاں ہدایات جاری کیتیاں ویسن۔ وزیر داخلہ محسن نقوی ہدایت کیتی جو ملک اچ چہرہ شناسی (فیشل ریکوگنیشن) ٹیکنالوجی دے نفاذ کوں 31 دسمبر 2025 تئیں یقینی بݨایا ونڄے، ایں عمل دی نگرانی وزارت داخلہ کریسی۔ وزیر داخلہ محسن نقوی آکھیے جو نادرا دی سروسز کوں ملک دی 44 ایجھیاں تحصیلاں اتے مخصوص یونین کونسلاں تئیں توسیع ݙتی ڳئی اے جتھاں پہلے اے سہولتاں دستیاب نہ ہن، اسلام آباد دی ساریاں 31 یونین کونسلز اچ 30 جون 2025 تئیں نادرا خدمات دستیاب ہوسن۔ وزیر داخلہ ٻاہرلے ملک پاکستانیاں کوں بہتر خدمات ݙیوݨ دی اہمیت تے زور ݙتا ۔ وزیر داخلہ محسن نقوی ہدایت کیتی جو وزارت خارجہ نال رابطے اچ رہندیں ہوئیں ہک جامع جائزہ ڳھدا ونڄے تاں جو انہاں ملکاں اتے خطیں دی نشاندہی کیتی ونڄ سڳے جتھاں نادرا خدمات دی ودھ لوڑھ اے۔ وزیر داخلہ محسن نقوی ملتان، سکھر اتے گوادر اچ نادرا دے ریجنل دفتراں دے قیام دی وی منظوری ݙتی۔ اجلاس دے دوران چیئرمین نادرا لیفٹیننٹ جنرل محمد منیر افسر ادارے دی رسائی، سروس ڈیلیوری اتے ڈیجیٹل تبدیلی دے حوالے نال پیش رفت تے تفصیلی بریفنگ ݙتی۔ وزیر داخلہ محسن نقوی نادرا اچ اصلاحات تے پیش رفت دا جائزہ ڳھدا اتے نادرا دی گزریل سال دی نمایاں کامیابیاں دی تعریف کیتی جنہاں دے تحت 87 نویں رجسٹریشن مراکز اتے 417 اضافی کائونٹرز قائم کیتے ڳئن۔ اجلاس کوں ݙسایا ڳیا جو نیشنل آئیڈنٹیٹی کارڈ (این آئی سی) رولز 2002 اچ وفاقی حکومت ولوں اہم ترامیم دی منظوری ݙتی ڳئی اے۔ بریفنگ دے دوران ݙسایا ڳئے جو ٻالاں اتے خانداناں دے رجسٹریشن سرٹیفکیٹس کوں اپ ڈیٹ کیتا ڳئے تاں جو قانونی وضاحت اتے فراڈ روکݨ کوں یقینی بݨایا ونڄ سڳے۔ ایں ضمن اچ پاکستان ٹیلی کمیونیکیشن اتھارٹی (پی ٹی اے)، وفاقی تحقیقاتی ادارہ (ایف آئی اے)، سٹیٹ بینک آف پاکستان (ایس بی پی)، سکیورٹیز اینڈ ایکسچینج کمیشن آف پاکستان (ایس ای سی پی) اتے ٻئے متعلقہ اداریں دے نال شناختی فراڈ، سم دے غلط استعمال اتے بائیومیٹرک تضادات دے تدارک کیتے ضروری تعاون جاری اے، نادرا دا وݙا فوکس پاک آئی ڈی موبائل ایپ دی افادیت اتے خصوصیات کوں مزید بہتر بݨاوݨ اے، ہݨ تئیں ایں ایپ کوں 70 لکھ توں ودھ واری ڈائون لوڈ کیتا ڳئے ۔ بریفنگ اچ ݙسایا ڳئے جو ہݨے ہی ایپ اچ نویاں سہولتاں شامل کیتیاں ڳئن جیویں جو ڈیجیٹل شناختی کارڈ دا اجرا، پنشنرز کیتے “پروف آف لائف” اتے وفاقی اسلحہ لائسنس دی تجدید۔ وزیر مملکت داخلہ طلال چوہدری اتے نادرا دے اعلیٰ حکام وی ایں موقع تے موجود ہن۔