اسلام آباد۔ 30 مئی (اے پی پی) پاکستان دی پبلک پروکیورمنٹ ریگولیٹری اتھارٹی (پیپرا) دا ہک اہم مشاورتی اجلاس تھیا جیندے دا مقصد پبلک پروکیورمنٹ رولز 2025 دے مسودے بارے تجاویز اتے سفارشات طے کرݨ ہا۔ اجلاس اچ مختلف شعبیاں دے سپلائرز، وینڈرز اتے تجارتی تنظیماں دے نمائندیاں شرکت کیتی۔ اجلاس دی صدارت پیپرا دے منیجنگ ڈائریکٹر حسنات احمد قریشی کیتی، پاکستان کونسل آف آرکیٹیکچر اینڈ ٹاؤن پلانرز، کنسٹرکشن ایسوسی ایشن آف پاکستان، اسلام آباد چیمبر آف کامرس اینڈ انڈسٹری، اسلام آباد ویمن چیمبر، اسلام آباد انڈسٹریل ایسوسی ایشن اتے آل پاکستان سکیورٹی ایجنسیز ایسوسی ایشن دے نمائندے موجود ہن۔ منیجنگ ڈائریکٹر پیپرا حسنات احمد قریشی نویں قواعد و ضوابط دیاں تفصیلات ݙیندے آکھیا جو نویں قوانین اچ حکومتی اداریاں اچ پروکیورمنٹ سیلز دا قیام، تھرڈ پارٹی ایویلیوایشن، شکایات دے ازالے دے نظام، پروکیورمنٹ دے طریقہ کار اچ جدت، مربوط معاہداتی نظم، اتے نیشنل بلیک لسٹنگ سسٹم جھیں اصلاحات شامل ہن تاں جو شفافیت، احتساب اتے کارکردگی یقینی ٻݨائی ونج سگے۔ انہاں ڈسایا جو ای۔پاک ایکوزیشن اینڈ ڈسپوزل سسٹم (ای پیڈز) مکمل طور تے وفاقی اداریاں اتے پنجاب، سندھ، اتے خیبر پختونخوا دے حکومتی اداریاں اچ نافذ تھی چکیے، اے نظام منصوبہ بندی توں گھن تے ادائیگی تئیں دیاں ساریاں پروکیورمنٹ سرگرمیاں خودکار ٻݨیدے۔ ای پیڈز دی مکمل سکیورٹی آڈٹ دے بعد اوکوں محفوظ اتے قواعد و ضوابط دے عین مطابق قرار ڈتا ڳئے۔ اجلاس اچ شرکاء ٻولی جائزے دے اصول، ای پروکیورمنٹ دے نظام، ایںدے نفاذ اچ درپیش چیلنجز، اتے ٻئے اہم امور تے تجویزاں وی ݙتیاں۔
