ٻالاں دے جنسی استحصال وچ ملوث وݙا نیٹ ورک وٹھیا ڳئے ، بین الاقوامی گینگ دے جرمن سرغنہ دی گرفتاری کیتے اقدامات کیتے ویندے پئن: وزیر مملکت داخلہ طلال چوہدری دی ڈائریکٹر جنرل سائبر کرائم دے رَلے پریس کانفرنس

اسلام آباد۔ 3 جون (اے پی پی) وزیر مملکت داخلہ طلال چوہدری آکھیے جو ٻالاں دے جنسی استحصال وچ ملوث وݙا نیٹ ورک وٹھیا ڳئے ، سرغنہ جرمن باشندہ اے جئیں دی گرفتاری کیتے اقدامات کیتے ویندے پئن، ہر ضلع وچ سائبر کرائم دفتر بݨاوݨ چاہندوں اَتے سوشل میڈیا کوں ریگولیٹ کرݨ چاہندوں ، جدید تقاضیں موجب خود کوں اساں ہم آہنگ کرݨا ہوسی۔ ڈائریکٹر جنرل سائبر کرائم وقار الدین سید دے رَلے پریس کانفرنس توں خطاب کریندے طلال چوہدری دا آکھݨ ہئی جو حکومت دا پیکا ایکٹ دا مقصد کوئی صحافی دی آواز کوں دٻاوݨ کائنی، پیکا ویلھے دی لوڑھ اے ، اساں سوشل میڈیا کوں ریگولیٹ کرݨ چاہندوں، کہیں صورت وی اینکوں بند کرݨ یا کہیں دی آواز دٻاوݨ اساڈا مقصد کائنی۔انہاں آکھیے جو پاکستان بھارت جنگ دے دوران ٻاہر بیٹھے انڈین پراکسیز جیڑھی مہم چلائی اے ایندے وچ وی وݙی کامیابی دے نال لوکاں کوں آئیڈنٹیفائی کیتا گئے۔ انہاں آکھیا جو ہر ضلع وچ سائبر کرائم ونگ دے دفتر بݨاوݨ چاہندوں ، کیوں جو اے لوڑھ اے جو ہر ضلع وچ انہاں دا دفتر ہووے، اوتھاں سہولت ہوسی، انہاں کنے او لوک ہوون جنہاں دی کپیسٹی ہووے تاں جو او لوکاں کوں فیسیلیٹیٹ کر سڳن، اتنی درخواستاں اڄ کل ایف آئی اے یا تھاݨے وچ نی ویندیاں جتنیاں ایں ویلھے لوکاں دیاں شکایتاں سائبر کرائم ونگ وچ ویندیاں پئن ، سائبر کرائم ونگ کوں روزانہ دی بنیاد تے شکایات ملدیاں پئن۔وزیر مملکت آکھیے جو پاکستان وچ ہِک انٹرنیشنل گینگ جیں دا سرغنہ ہِک جرمن باشندہ اے، ٻالاں کوں جنسی استحصال دا نشانہ ٻݨیندا ہئی، انہاں اتھاں ہِک نکا جیھا کلب ٻݨایا ہئی، اِیں کلب وچ 6 توں 10 سال دے ٻالاں کوں مختلف قسم دیاں گیمز اَتے ٻئیاں چیزاں سکھیندے ہن، اِیں جاہ تے ٻہوں ہی غریب گھراں دے ٻالاں کوں سݙیا ویندا ہئی، انہاں کوں پہلے پیسے ݙے تے اَتے ایندے بعد بلیک میل کر تے انہاں دا جنسی استحصال کیتا ویندا، انہاں دیاں ویڈیوز کوں ڈارک ویب تے ہزاراں ڈالر دے عوض روزانہ دی بنیاد تے ویچیا ویندا ہئی، انہاں ویڈیوز کوں جیہڑا بندہ عالمی سطح تے ویچیندا ہئی او جرمن باشندہ اے، اساں اوندے تئیں پڄݨ کیتے جیہڑا وی قانونی طریقہ کار ہے او اختیار کریندے پیوں۔وزیر مملکت آکھیے جو تقریباً 50 ٻال متاثر تھئن ، جیہڑے ٻال اتھوں برآمد کیتے ڳئن انہاں وچوں 6 ٻالاں کوں چائلڈ پروٹیکشن بیورو دے حوالے کیتا گئے، بدقسمتی نال کجھ ٻالاں دے گھر آلے اَتے والدین وی اِیں وچ شامل نکلئن، انہاں دے خلاف وی کارروائی دا آغاز کیتا گئے ۔ وزیر مملکت داخلہ آکھیے جو پنج گھنٹے دا طویل آپریشن 23 مئی کوں کیتا گئیا، نیشنل سائبر کرائمز انویسٹیگیشن ایجنسی (این سی سی آئی اے) ݙو لوکاں کوں گرفتار کیتے اَتے 6 ٻالاں کوں چائلڈ پروٹیکشن بیورو وچ بھیجیا گئے۔ اِیں موقع تے ڈائریکٹر جنرل سائبر کرائم وقارالدین سید ݙسایا جو سپیشل برانچ پنجاب اساکوں اطلاع ݙتی جو مظفرگڑھ دے علاقے دین پناہ وچ ہِک غیر ملکی دا آوݨ ونڄݨ اے اَتے اِیں دیاں سرگرمیاں مشکوک ہن، این سی سی آئی اے سپیشل برانچ دے تعاون نال 22 اَتے 23 مئی دی رات پنج گھنٹے طویل آپریشن دے نتیجے وچ ݙو ملزماں کوں گرفتار کر ڳھدا۔انہاں آکھیا جو پاکستان وچ اے اپݨی نوعیت دا پہلا اَتے واحد واقعہ اے جیں وچ اے گینگ مقامی ٻالاں دا جنسی استحصال کر تے انہاں دیاں ویڈیوز وی ٻݨیندے، کانٹینٹ پروڈکشن وی کریندے اَتے اِیں کانٹینٹ کوں ول انٹرنیشنل مارکیٹ وچ گھن ونڄ تے ڈارک ویب تے وچیندا ہئی اِیں گینگ اتھاں ہِک فائٹنگ سکول ٻݨایا ہویا ہئی جِتھاں ٻالاں کوں مختلف فزیکل ایکٹیوٹیز کرائیاں ویندیاں ہن اَتے اِیں بہانے نال ٻالاں کوں اتھاں سݙا تے انہاں کوں جنسی استحصال دا نشانہ ٻݨایا ویندا ہئی۔ انہاں ݙسایا جو اتھوں 6 ٻال ملئن جنہاں کوں چائلڈ پروٹیکشن بیورو دے حوالے کر ݙتا گئے۔ اطلاعات موجب 6 سال توں 10 سال دے درمیان 50 توں ودھ ٻال جنسی استحصال دا شکار تھئن۔ انہاں ݙسایا جو تحقیقات توں پتا لڳئے جو جرمن رہائشی ہِک واری 18 توں 20 ݙینھ کیتے اِتھاں قیام کیتا، سارا سیٹ اپ ٻݨا تے ݙتا، ویڈیوز اَتے لائٹنگ دی باقاعدہ تربیت ݙتی، پنج لوکاں دے خلاف ایف آئی آر درج کر ڳھدیاں ڳئن جنہاں وچوں ݙو ملزماں کوں گرفتار کر گھدا گئے جݙاں جو ٻئے ترائے ملزم اشتہاری ہن۔ ملزم ویڈیوز بݨا تے جرمن باشندے کوں بھیجیندے ہن جیہڑے واٹس ایپ گروپس اَتے ٹیلی گرام گروپس دے ذریعے انہاں کوں مختلف گروپس وچ کھنڈیندے ہن اَتے ول ڈارک ویب تے انہاں کوں وچیندے ہن۔