وزیراعظم شہباز شریف دا پشاور جرگہ توں خطاب، دہشتگردی دے خاتمے تئیں خیبرپختونخوا کوں ہِک فیصد این ایف سی فنڈ ملدا راہسی، سندھ طاس معاہدے تحت ہر قطرہ پاکستانی عوام دا حق ہے

پشاور۔ 3 جون (اے پی پی) وزیراعظم محمد شہباز شریف آکھیے جو دہشتگردی دے خلاف جنگ اچ خیبرپختونخوا کیتے این ایف سی وچ مقرر کیتا ڳیا ہِک فیصد فنڈ دہشتگردی دے مکݨ تئیں جاری راہسی۔ 2010 توں اِیں مد وچ خیبرپختونخوا کوں 700 ارب روپے توں ودھ فنڈز ݙتے ڳئن۔ 1960 دے سندھ طاس معاہدے تحت پاݨی دا ہِک ہِک قطرہ پاکستانی عوام دا حق ہے۔ فیلڈ مارشل سید عاصم منیر دی قیادت وچ افواج پاکستان ہندوستان کوں زندگی دا او سبق سکھائے جیڑھا او قیامت تئیں نہ بُھلسن۔ جے ہندوستان ول کوئی حرکت کیتی تاں انہاں کوں ول سبق سکھیسوں۔ خیبرپختونخوا دے غیور عوام پاکستان دے دفاع کیتے قربانیاں ݙتن ، خیبرپختونخوا ہِک عظیم صوبہ اے۔ اے ڳالھ انہاں پشاور وچ ہِک جرگہ توں خطاب کریندے آکھی ۔اِیں موقع تے فیلڈ مارشل سید عاصم منیر، وفاقی وزیر اطلاعات و نشریات عطاء اللہ تارڑ، وفاقی وزیر داخلہ محسن نقوی، گورنر خیبرپختونخوا فیصل کریم کنڈی، وزیراعلیٰ خیبرپختونخوا علی امین خان گنڈاپور، کور کمانڈر لیفٹیننٹ جنرل عمر بخاری، وفاقی و صوبائی وزراء، سینیٹرز، ارکان صوبائی اسمبلی اَتے قبائلی زعماء وی موجود ہن۔ وزیراعظم جرگہ توں خطاب کریندے آکھیے جو اڄ میں کیتے ٻہوں عزت دی ڳالھ ہے جو میں اِیں جرگے وچ تساݙے سامݨے موجود ہاں۔ اساں زعماء دیاں ڳالھیں سُݨیاں، وزیراعلیٰ خیبرپختونخوا دیاں ڳالھیں سُݨیاں، اساں سَارے تساݙیاں ڳالھیں سُݨݨ کیتے آیوں۔انہاں آکھیے جو صوبہ خیبرپختونخوا ہِک عظیم صوبہ اے، میں ہمیشہ اپݨیاں تقریراں وچ آکھیے جو اے پاکستان دے سوہݨے صوبیں وچوں ہِک اے جِتھاں برف پوش پہاڑ ہن، وادیاں اَتے انتہائی دلیر عوام ہن۔ تساں 1947 وچ ریفرنڈم وچ پاکستان دا بھرپور ساتھ ݙے تے ثابت کیتا جو تساں واقعی پاکستان دے ٻہوں وݙے حامی ہِو۔ تساں پاکستان دا دفاع کیتا۔ خیبرپختونخوا دے اساݙے بے شمار بھرا، بزرگ اَتے بھیݨاں شہید تھئن۔ اے او عظیم قربانیاں ہن جیں کوں تاریخ کݙاہیں نہ بُھلا سڳسی۔ یقیناً جݙاں وی پاکستان دی ڳالھ آئی، تساں سارے اختلافاں کوں ہِک پاسے رکھ تے پاکستان دا سبز ہلالی جھنڈا اچا کیتا۔ میں تساکوں دلوں تحسین پیش کرݨ آیاں۔پشاور وچ 2016 وچ اے پی ایس دا واقعہ تھیا۔ اتھاں ٻالاں اَتے استاداں کوں شہید کیتا گئیا اَتے ول پشاور وچ میٹنگ تھئی، سوچ سمجھ تے فیصلہ کیتا گئیا اَتے ایندے بعد جیہڑا کجھ تھیا او اساں سَاریں دے سامݨے اے۔ اڄ جیہڑیاں ڳالھیں عمائدین کیتن، انہاں تے اساکوں سنجیدگی نال غور کرݨا ہوسی اَتے رَل ٻہہ تے فیصلے کرݨے ہوسن۔ وزیراعظم آکھیے جو وزیراعلیٰ علی امین گنڈاپور این ایف سی تے نظر ثانی دی ڳالھ کیتی، اے ڳالھ اسلام آباد وچ ݙڈھ مہینہ پہلے تھئی اَتے میں فوراً کمیٹی ٻݨائی، این ایف سی کیتے جیہڑی صوبیاں دی نمائندگی ہوندی ہے، ایندے کیتے ناں ݙتے ڳئن، پہلی میٹنگ اگست وچ سݙیسوں۔انہاں آکھیے جو 2010 دے این ایف سی ایوارڈ وچ ساریں توں پہلے آئٹم وچ چارے صوبیں دہشتگردی دے خلاف جنگ دے مد وچ خیبرپختونخوا کیتے ہِک فیصد فنڈز تے اتفاق کیتا۔ اے جائز اَتے درست فیصلہ ہئی جیہڑا دہشتگردی دے خاتمے تئیں جاری رہسی تاں جو ایندے وچ بلوچستان شامل نہ کیتا گئیا ہئی۔ وزیراعظم آکھیے جو اَڄ تئیں اِیں مد وچ خیبرپختونخوا کوں 700 ارب روپے توں ودھ فنڈز حوالے کیتے ڳئن۔ وزیراعلیٰ دے ݙوجھے مطالبے کیتے انہاں نال رَل ٻہہ تے حل کݙھ گھنسوں۔ انہاں آکھیے جو جیہڑے وی اساں کنے وسائل ہن، او پاکستان دے وسائل ہن جیں وچ سارے صوبیں دا حصہ اے۔ میں معاملیں دے حل کیتے ہِک کمیٹی بݨینداں جیہڑی گورنر خیبرپختونخوا، وزیراعلیٰ خیبرپختونخوا، کور کمانڈر اَتے قبائلی زعماء دے نال ٻہسی اَتے معاملہ اڳوں ودھیا تاں اساں اینکوں پارلیمنٹ وچ وی گھن ویسوں۔وزیراعظم آکھیے جو ہݨے ہندوستان دے نال جنگ تھئی ہئی۔ پاکستان دے ساریاں صوبیں دے عوام دیاں دُعاواں شامل ہن۔ 6 اَتے 7 مئی کوں جِیویں دشمن گھات لا تے حملہ کیتا اَتے اساݙے بے گناہ پاکستانیاں کوں شہید کیتا۔ فیلڈ مارشل دی قیادت وچ افواجِ پاکستان ہندوستان کوں زندگی دا سبق سکھائے جیہڑا او قیامت تئیں نہ بُھلسن۔ اتحاد نال اساں پاکستان دی تقدیر بدلیسوں۔ جِیویں اِیں جنگ وچ کامیابی ملی، اِیویں پاکستان معاشی میدان وچ وی کامیابیاں حاصل کریسی۔ ہݨے چار ملکاں دا دورہ کر تے آیاں، سَاریں دے چہریں تے خوشی ہئی۔ اَڄ پوری قوم ہِک جہت اے، اساکوں پاکستان دی ترقی اَتے خوشحالی کیتے وݙے فیصلے کرݨن۔ چارے صوبیں دی قیادت سݙا تے اساں رَل ٻہہ ویسوں۔ مثال دے طور تے، ہندوستان کوں شکست فاش تھئی اے اَتے مودی سرکار اپݨے زخم چَٹیندی پئی اے، ہندوستان پاݨی دیاں تڑیاں ݙیندے۔ 1960 دے سندھ طاس معاہدے تحت پاݨی دے ہِک ہِک قطرے تے پاکستانی عوام دا حق ہے۔ وزیراعظم شہباز شریف آکھیے جو پاݨی دے اُتے اساکوں فیصلہ کرݨا اے تاں جو ہندوستان دے مذموم عزائم دفن تھی ونڄن۔ اساں کنے بے شمار ڈیم ہن جِتھاں اساں پاݨی ذخیرہ کر سڳدوں ، اساکوں سوچ سمجھ تے فیصلے کرݨے ہوسن۔ شرکاء پاکستان دے شہداء کیتے فاتحہ خوانی کیتی اَتے ملک کیتے اپݨیاں جاناں دا نذرانہ پیش کرݨ آلے سویلین اَتے فوجی جواناں کوں خراجِ عقیدت پیش کیتا۔