لاہور۔ 1 جون (اے پی پی) صدر مملکت آصف علی زرداری آکھیے جو پاکستان اَتے بنگلہ دیش وچال مختلف شعبیں وچ تعاون دے وسیع موقع موجود ہن، اساکوں ݙوہں ملکاں دے عوام دی فلاح و بہبود کیتے رَل کty کَم کرݨ دی لوڑھ اے۔ انہاں اے ڳالھ سنوار کوں گورنر ہاؤس لاہور وچ پاکستان اَتے بنگلہ دیش دے کرکٹرز اَتے آفیشلز دے اعزاز وچ ݙتے ڳئے استقبالیہ وچ بطور مہمان خصوصی شرکت دے موقع آکھی۔ ایں موقع تے چیئرمین پاکستان کرکٹ بورڈ اَتے وفاقی وزیر داخلہ محسن نقوی، گورنر پنجاب سردار سلیم حیدر، پاک بنگلہ دیش کرکٹ ٹیماں دے کھݙاریاں اَتے آفیشلز سودھے ٻئے وی موجود ہن۔ صدر مملکت آکھیے جو کھیݙ سانجھے رابطیں دا اہم ذریعہ ہن، بنگلہ دیش کرکٹ ٹیم سفیر دے طور تے پاکستان دا دورہ کریندی پئی اے۔ بنگلہ دیش بھرا ملک اے، اللہ تعالیٰ پاکستان وانگوں بنگلہ دیش کوں وی وسائل نال نوازیے، اقوام عالم وچ بنگلہ دیش ہک مضبوط معاشی ملک دے طور تے سنڄاتا ویندے، ݙوہں ہمسایہ اَتے بھرا ملکاں وچال تعاون دے وسیع موقع موجود ہن، اساکوں ݙوہں ملکاں دے عوام دی فلاح و بہبود کیتے رَل تے کَم کرݨ دی لوڑھ اے۔ صدر مملکت آکھیے جو بنگلہ دیش دی اڄوکی نسل پاکستان توں انڄ دے درد دی کیفیت توں ناواقف اے، میں ایں نسل توں تعلق رکھینداں جنہاں اساکوں وکھ تھیندے ݙٹھے، ویلھا آڳئے جو اساکوں کہیں نہ کہیں طرح ایں درد دا مداوا کرݨاں اے، ݙوہں ملکاں وچال تکڑے تعلقات بݨاوݨ اَتے قربت کیتے کَم کرݨ دی ٻہوں لوڑھ اے، اساکوں رَل تے ایجھے اقدامات کرݨے ہوسن جیڑھے ݙوہیں ملکاں دے عوام کوں خوشحال کریسن، ایں حوالے نال ݙوہں ملکاں دے نینگراں کوں آپݨا بھرپور کردار ادا کرݨاں ہوسی۔ ایویں صدر مملکت آصف علی زرداری پاک بنگلہ دیش کرکٹرز اَتے آفیشلز نال ہتھ ملایا اَتے نیک خواہشات دا اظہار کیتا اَتے آکھیے جو اڄوکی سیریز وچ پاکستانی کرکٹ ٹیم دی کارکردگی ٻہوں چنڳی رہی، بنگلہ دیش دی کرکٹ ٹیم وی اعلیٰ معیار دا کھیݙ پیش کریندی پئی اے۔
