اسلام آباد۔02 جون(اے پی پی)وزیراعظم دی ہدایت موجب ہک اعلیٰ سطحی کثیر الجماعتی وفد 2 جون توں نیویارک، واشنگٹن ڈی سی، لندن تے برسلز دا دورہ کریسی۔ ترجمان دفتر خارجہ توں جاری بیان موجب نو رکنی وفد دی قیادت پاکستان پیپلز پارٹی دے چیئرمین تے سابق وزیر خارجہ بلاول بھٹو زرداری کریندے پئن۔ وفد دے ٻئے ارکان اچ وزیر موسمیاتی تبدیلی تے ماحولیاتی رابطہ ڈاکٹر مصدق مسعود ملک، سینیٹ دی قائمہ کمیٹی موسمیاتی تبدیلی تے ماحولیاتی رابطہ دی چیئرپرسن تے سابق وزیر اطلاعات و موسمیاتی تبدیلی سینیٹر شیری رحمان، قومی اسمبلی دی قائمہ کمیٹی خارجہ امور دی چیئرپرسن تے سابق وزیر خارجہ حنا ربانی کھر، سابق وزیرتجارت، دفاع تے خارجہ امور انجینئر خرم دستگیر خان، سابق وزیر سمندری امور سینیٹر سید فیصل علی سبزواری تے سینیٹر بشریٰ انجم بٹ شامل ہن۔ وفد اچ ݙو سابق خارجہ سیکرٹریز جلیل عباس جیلانی جیڑھے نگراں وزیر خارجہ دے طور تے وی خدمات سرانجام ݙے چکن اتے تہمینہ جنجوعہ وی شامل ہن۔ وزیراعظم دے معاون خصوصی سید طارق فاطمی دی قیادت اچ ݙوجھا وفد 2 جون توں ماسکو دا دورہ کریسی۔ ایں وفد دے دوریں دا مقصد اڄوکے بھارتی جارحیت تے پاکستان دا نقطہ نظر پیش کرݨ اے۔ اے وفد بھارت ولوں بین الاقوامی قوانین دی خلاف ورزی سودھے لاپرواہی تے جارحانہ اقدامات دے بعد پاکستان دے ذمہ دارانہ موقف کوں اجاگر کریسن اتے ایں ڳالھ تے روشنی پیسن جو مذاکرات تے سفارت کاری کوں جھیڑے تے تصادم تے ترجیح ݙتی ونڄݨی چاہیدی اے۔ بیان موجب وفد جنوبی ایشیا اچ پائیدار امن دے ودھارے کیتے بین الاقوامی برادری کیتے اپݨا بھرپور کردار ادا کرݨ دی لوڑھ تے زور ݙیسن۔ سندھ طاس معاہدہ دے معمول دے کم کوں فوراً ول شروع کرݨ دی لوڑھ وی وفد دی رسائی دا ہک اہم موضوع ہوسی۔ اے وفد بین الاقوامی اداریں دی قیادت، پبلک آفس ہولڈرز، اعلیٰ حکام، ارکان پارلیمنٹ، تھنک ٹینکس تے میڈیا دے نال نال ٻئی ممتاز شخصیات نال وی ملاقاتاں کریسن۔
