اسلام آباد۔02 جون(اے پی پی) وزیر اعظم محمد شہباز شریف آکھیے جو معرکہ حق دی تریخی فتح توں بعد ملکی اداریں اچ پائیدار اصلاحات دے ذریعے ملک کوں ہک مستحکم عالمی معیشت بݨاوݨ دی جدوجہد اچ کامیاب تھیوݨ کیتے حکومت پاکستان پرعزم اے۔ وزیراعظم دفتر دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت اچ ایف بی آر دے امور دے حوالے نال جائزہ اجلاس منعقد تھیا۔ وزیراعظم ایف بی آر اچ جاری اقدامات و اصلاحات دی تھرڈ پارٹی ویلیڈیشن کیتے عالمی شہرت یافتہ کمپنیاں دی خدمات حاصل کرݨ دی ہدایت کریندے آکھیے جو حق دی تریخی فتح توں بعد ملکی اداریں اچ پائیدار اصلاحات دے ذریعے پاکستان کوں ہک مستحکم عالمی معیشت بݨاوݨ دی جدوجہد اچ کامیاب تھیوݨ کیتے حکومت پرعزم اے، سارے شعبیں اچ ادارہ جاتی اصلاحات تکھے جاری ہن۔ وزیراعظم آکھیے جو ملکی اداریں توں کرپشن دے انسداد تے شفافیت دی عدم موجودگی جہیاں ٻیاں خامیاں کوں دور کرݨ کیتے حکومت پاکستان دے سارے ادارے انتھک محنت کریندے پئن، اڄوکے مثبت معاشی اشاریے حکومتی پالیسیاں دی صحیح سمت دا منہ ٻولیندا ثبوت ہن۔ وزیراعظم فیس لیس کسٹمز اسسمنٹ سسٹم دی اڄوکی کارکردگی تے اطمینان دا اظہار کریندے آکھیے جو شفافیت کوں برقرار رکھݨ کیتے گھن آئی ڳئی فیس لیس کسٹمز اسسمنٹ سسٹم جہیاں اصلاحات دے حوصلہ افزا نتائج سامݨے آندے پئن، پاکستان کوں معاشی طور تے مستحکم بݨاوݨ دی ایں جدوجہد اچ اساں کامیاب تھیسوں۔ اجلاس اچ وزیر اعظم کوں فیس لیس کسٹمز اسسمنٹ سسٹم دی اڄوکی کارکردگی تے پاکستان ریونیو آٹومیشن لمیٹڈ (پرال) اچ اصلاحات دی پیشرفت بارے ݙسایا ڳیا۔ بریفنگ اچ ݙسایا ڳیا جو فیس لیس کسٹمز اسسمنٹ سسٹم دے نفاذ نال محصولات اچ مجموعی طور تے ودھارا تھیا اے اتے کسٹمز کلیئرنس دے دورانیے اچ کافی کمی آئی اے، پاکستان ریونیو آٹومیشن لمیٹڈ اچ اصلاحات دا عمل تکھے جاری اے ۔ بریفنگ اچ ݙسایا ڳئےجو عام صارفین کیتے سوکھا ڈیجیٹل ٹیکس ریٹرن دا نظام وختی لاگو کیتا ونڄ سڳسی، عام صارفین دی سہولت کیتے ڈیجیٹل ٹیکس ریٹرن دے نظام کوں اردو اتے ٻیاں مقامی زباناں اچ متعارف کرݨ دے عمل تے کم تکھے جاری اے ۔ اجلاس اچ وفاقی وزیر قانون و انصاف اعظم نذیر تارڑ، وفاقی وزیر اطلاعات و نشریات عطا اللہ تارڑ، چیئرمین ایف بی آر اتے متعلقہ اداریں دے اعلیٰ افسران شریک ہن۔
