اسلام آباد۔2جون(اے پی پی) وفاقی وزیر منصوبہ بندی، ترقی و اصلاحات پروفیسر احسن اقبال آکھیے جو آوݨ آلے مالی سال دا ترقیاتی بجٹ 1000 ارب روپے ہوسی جݙاں جی ڈی پی دی شرح نمو دا ہدف 4.2 فیصد، زرعی شعبے کیتے 4.5 فیصد، صنعتی شعبہ 4.3 فیصد اتے خدمات دے شعبے کیتے شرح نمو دا ہدف 4 فیصد مقرر کیتا ڳئے تاں جو محدود وسائل پاروں صرف ٻہوں اہم اتے قومی مفاد دے حامل منصوبے شامل کیتے ونڄ سڳدن۔ سالانہ پلان کوآرڈینیشن کمیٹی دا اجلاس منعقد تھیا۔ اجلاس وچ وفاقی وزیر خالد مقبول، وفاقی سیکریٹریز، سٹیٹ بینک، صوبائی حکومتاں دے نمائندگان، اہم قومی و صوبائی اداریں دے سربراہان اتے ٻئے اعلیٰ حکام شرکت کیتی۔ چیف اکانومسٹ ڈاکٹر امتیاز اجلاس دے شرکاء کوں سالانہ ترقیاتی منصوبے، معاشی ترقی دے روڈمیپ اتے قومی ترجیحات تے تفصیلی بریفنگ ݙتی۔ وفاقی وزیر احسن اقبال اجلاس توں خطاب کریندے آکھیے جو پاکستان کوں پیش آندے معاشی چیلنجز پاروں ترقیاتی بجٹ وچ مسلسل کمی دا سامݨاں اے جو قومی ترقی اتے عوامی فلاح دے اہداف دے حصول وچ سنجیدہ رکاوٹ اے۔ اساں کوں ودھدی ہوئی آبادی دے تناظر وچ ترقیاتی فنڈز کوں وسعت ڈیوݨی ہوسی۔ انہاں ݙسایا جو آوݨ آلے مالی سال دا ترقیاتی بجٹ 1000 ارب روپے مقرر کیتا ڳئےاے تاں جو محدود وسائل پاروں صرف انتہائی اہم اتے قومی مفاد دے حامل منصوبے شامل کیتے ونڄ سڳدن۔ وفاقی وزیر ایں ڳالھ تے زور ݙتا جو حکومت ٻاہرلیاں ادائیگیاں، آمدݨی وچ ودھارے اتے ترقیاتی خرچے وچ توازن کیتے جامع اقدامات کریندی پئی اے۔ انہاں آکھیا جو “اڑان پاکستان” پروگرام دے تحت قومی ترقیاتی بجٹ وچ ودھارے اتے شفافیت کوں ودھارا ڈیوݨ کیتے ورکشاپاں اتے اصلاحاتی اقدامات کیتے ویندے پئن، تھرڈ پارٹی ویلیڈیشن دا نظام متعارف کرایا ڳئے تاں جو ترقیاتی منصوبیں وچ شفافیت اتے کارکردگی یقینی بݨائی ونڄ سڳے ۔ احسن اقبال قومی ترجیحی منصوبیں دی فہرست وچ دیا میر بھاشا ڈیم، سکھر-حیدرآباد موٹر وے، چمن روڈ، قراقرم ہائی وے (فیز ٹو) اتے اعلیٰ تعلیم دے منصوبیں کوں سرفہرست قرار ݙتا۔ انہاں آکھیے جو پاکستان دا شمار دنیا دے گھٹ ترین ٹیکس ریونیو آلے ملکاں وچ تھیندے اتے ٹیکس چوری تے قابو پاوݨ اتے ٹیکس نیٹ کوں ودھاوݨ کیتے ہک قومی مہم دی ٻہوں لوڑھ اے ۔ وفاقی وزیر واضح کیتا جو 2018ء وچ اساں نویں منصوبیں دے آغاز تے غور کریندے پئے ہاسے جݙاں جو اڄ اساں کوں جاری منصوبیں کوں محدود کرݨ جیھے اوکھے فیصلے کرݨے پوندے پئن۔ قومی ترقی کیتے ہر فرد اتے ادارے کوں آپݨی ذمہ واری نبھاوݨی ہوسی۔ انہاں ایں ڳالھ دا وی اعتراف کیتا جے کوئی اہم منصوبہ ترقیاتی بجٹ وچ شامل نہ تھی سڳیا تاں اوندے تے پیشگی معذرت خواہ ہن، کیونجو 1000 ارب روپے دے بجٹ وچ ساریاں وزارتاں دیاں ضرورتاں کوں پورا کرݨ ممکن کائنی۔ احسن اقبال سارے سٹیک ہولڈرز تے زور ݙتا جو او قومی مفاد وچ فیصلے کرن تاں جو پاکستان کوں پائیدار ترقی دے رستے تے ٹوریا ونڄ سڳے۔
