اسلام آباد۔2جون(اے پی پی) وفاقی وزیر ریلوے محمد حنیف عباسی پاکستان ریلوے دی 77 سالہ تاریخ وچ ریکارڈ کامیابیاں دا اعلان کریندے ݙسائے جو مالی سال دے 11 مہینے اچ ریلوے 83 ارب روپے آمدنی حاصل کیتی اے جیڑھا جو ایں ادارے دا ہݨ تئیں دا ساریں توں وݙا ریکارڈ اے، عید الاضحیٰ دے موقع تے پنج خصوصی ریل گاݙیاں چلاوݨ دے علاوہ ترائے ݙینھ کیتے مسافراں کوں کرائے وچ 20 فیصد خصوصی رعایت ݙتی ویسی۔ میڈیا نال ڳالھ مہاڑ کریندے وزیر ریلوے آکھیے جو میڈیا نال کیتے ڳئے معاہدیں کوں مکمل طور تے نافذ کیتا ویسی اتے شفافیت کوں ہر صورت یقینی بݨایا ویسی ، رائل پام ایکسپریس دی انٹرنیشنل ٹینڈرنگ مکمل تھی چکی اے اتے آئوٹ سورسنگ دے تحت ٻہوں اہم منصوبے جاری ہن جنہاں وچ ہسپتال اتے 14 سکولاں دی آئوٹ سورسنگ شامل اے تاں جو ملازماں کوں سستی اتے معیاری طبی سہولتاں اتے تعلیم ݙتی ونڄ سڳے۔ ملازماں دے ٻالاں کوں نجی تعلیمی اداریں جیھی معیاری تعلیم ݙتی ویسی اتے فیس ریلوے دیاں شرطاں موجب ہوسی۔انہاں آکھیے جو چکلالہ اتے مارگلہ سٹیشناں تے صفائی دا اعلیٰ انتظام کیتا ڳئے اتے فوڈ کوالٹی تے کڑی نگرانی کیتی ویندی پئی اے۔ چارے صوبیں دیاں فوڈ اتھارٹیز وی ریلوے وچ فوڈ کوالٹی کوں بہتر بݨاوݨ تے کم کریندیاں پئن ۔ فرنٹ ڈیسک اتے ریل ہوسٹس سروسز کوں وی وختی متعارف کرایا ویسی تاں جو مسافراں کوں بہترین خدمات ݙتیاں ونج سڳن۔ وفاقی وزیر آکھیے جو پنجاب ماڈل دے تحت اینٹی انکروچمنٹ آپریشن سختی نال نافذ کیتے ویندے پئن اتے ارباں روپے دی قیمتی زمین واپس ڳھدی ویسی، سٹیشن یارڈز، کمرشل، زرعی اتے رہائشی زمیناں کوں خالی کراوݨ دے منصوبے وی جاری ہن۔ پنجاب حکومت نال تکڑے تعلقات قائم تھی چکئن اتے 2016 توں رُکے ہوئے ٻہوں منصوبے ول فعال کیتے ویندے پئن۔ گرین پاکستان پروگرام دے تحت ریلوے ٹریک دے آسے پاسے وݨ رادھے ویسن جݙاں جو پنجاب کیتے 45 ارب روپے دے ریلوے منصوبے تے کم جاری اے۔حنیف عباسی آکھیے جو ریلوے دی رفتار ودھا تے 160 کلومیٹر فی گھنٹہ کرݨ دی منصوبہ بندی کیتی ویندی پئی اے جیں نال لاہور توں راولپنڈی دا سفر ݙو گھنٹے دا ہوسی ۔ ایں توں انڄ 1413 نویاں ویگنز دی تیاری جاری اے جنہاں وچوں 500 کوں فریٹ سروس کیتے شامل کیتا ویسی۔ 15 جون توں لاہور توں نارووال کیتے نویں ریل سروس شروع تھیسی اتے ایں مہینے روس کیتے لاہور توں ملتان، سندھ اتے سرحد تئیں فریٹ ریل گاݙی روانہ کیتی ویسی۔ قازقستان نال وی ریلوے دے ترقیاتی منصوبیں تے کم جاری اے۔ ریکوڈک اتے تھر کول دی ترسیل کیتے ریلوے کوں اپ گریڈ کرݨ لازم اے۔ ترائے غیر فعال فریٹ اتے آڈٹ کمپنیاں کوں بند کر ݙتا ڳئے تاجو نظام کوں مزید موثر بݨایا ونڄ سڳے۔ مارگلہ ریلوے سٹیشن کوں جدید خطوط تے اپ گریڈ کرݨ دا منصوبہ وی زیرعمل اے۔ وفاقی وزیر ریلوے اپݨے خطاب وچ آکھیے جو ریلوے دی ترقی، معیشت کوں تکڑا بݨاوݨ اتے مسافراں دی سہولت کیتے کم کیتا ویندا پئے۔ ایں اقدامات دا مقصد منافع کماوݨ کائنی بلکہ پاکستان ریلوے کوں ہک جدید، شفاف اتے عوام دوست ادارہ بݨاوݨ اے۔ انہاں ریلوے ملازماں دے تعاون دی وی تعریف کیتی تے یقین ݙیوائے ریلوے ملازماں کوں مفت علاج دیاں سہولتاں ݙتیاں ویسن۔
