اسلام آباد (اے پی پی) وفاقی وزیر خزانہ سینیٹر محمد اورنگزیب دی صدارت ءچ پاکستان کرپٹو کونسل (پی سی سی) دا اجلاس تھیا۔ اجلاس ءچ وزیر مملکت/ وزیراعظم دے معاون خصوصی بلاک چین و کرپٹو اتے پاکستان کرپٹو کونسل دے چیف ایگزیکٹو افسر بلال بن ثاقب آن لائن شامل تھئے، اسٹیٹ بینک آف پاکستان دے گورنر وی آن لائن اجلاس ءچ شریک تھئے، جݙاں جو سکیورٹیز اینڈ ایکسچینج کمیشن آف پاکستان (ایس ای سی پی) دے چیئرمین، قانون و انصاف ڈویژن دے سیکرٹری اتے وزارت انفارمیشن ٹیکنالوجی و ٹیلی کمیونیکیشن دے سیکرٹری ذاتی حیثیت اچ شرکت کیتی۔اجلاس ءچ پاکستان ءچ ڈیجیٹل اتے ورچوئل اثاثیں کیتے مجوزہ ریگولیٹری فریم ورک تے ڳالھ مہاڑ کیتی ڳئی، جیندے نال بین الاقوامی معیاراں اتے جدید ٹیکنالوجی دے رجحاناں نال ہم آہنگی رکھی ویسی۔ شرکا ملک ءچ ڈیجیٹل فنانس اتے کرپٹو ایکو سسٹم دی نگرانی اتے ریگولیشن کیتے ہک خودمختار ریگولیٹری اتھارٹی دے قیام دے مختلف پہلوواں تے وی دھیان ݙتا۔ کونسل دے ممبران ہک محفوظ، شفاف اتے نویں سوچ کوں ریگولیٹری ماحول کوں یقینی بݨاوݨ کیتے قیمتی تجویزاں ݙتیاں تاں جو بلاک چین کوں ذمہ واری نال اپنایا ونڄ سڳے، سرمایہ کاراں دا تحفظ کیتا ونڄ سڳے اتے مالی شمولیت کوں ودھایا ونڄ سڳے۔چیئر سارے اسٹیک ہولڈرز دیاں کوششاں دی تعریف کیتی اتے اے عزم کیتا جو حکومت ہک جدید اتے مستقبل دیاں ضرورتاں نال ہم آہنگ مالیاتی نظام بݨاوݨ کیتے پرعزم اے جیڑھا نویں سوچ دی حمایت دے نال مالیاتی استحکام اتے ضابطہ جاتی ضرورتاں کوں وی یقینی بݨاوے۔اے فیصلہ کیتا ڳئے جو اسٹیٹ بینک، ایس ای سی پی، قانون ڈویژن اتے آئی ٹی و ٹیلی کام ڈویژن دے نمائندیں تے مشتمل ہک تکنیکی کمیٹی بݨائی ویسی جیڑھی مجوزہ قوانین دا جائزہ ڳھنسی اتے ہک مضبوط فریم ورک اتے گورننس ڈھانچے دیاں تجویزاں پیش کریسی جنہاں تے پاکستان کرپٹو کونسل دے آوݨ آلے اجلاس ءچ دھیان ݙتا ویسی۔
