بھارتی جارحیت خطے کوں غیرمحفوظ بݨا ݙتے، امن دا رستہ صرف مکالمے اتے سفارتکاری نال ممکن اے، بلاول بھٹو زرداری

نیویارک۔ 3 جون (اے پی پی) پاکستان پیپلزپارٹی دے چیئرمین اتے سفارتی پارلیمانی وفد دے سربراہ بلاول بھٹو زرداری جامع مذاکرات، سندھ طاس معاہدے دی بحالی اتے مسئلہ کشمیر دے حل تے زور ݙیندے ہوئیں آکھیے جو امن دا رستہ صرف مکالمے اتے سفارتکاری نال ممکن اے۔ پی پی پی میڈیا سیل توں جاری بیان موجب پاکستان دے سفارتی پارلیمانی وفد دے سربراہ بلاول بھٹو زرداری دی اقوام متحدہ اچ او آئی سی رکن ملکاں کوں جنوبی ایشیا اچ بھارت دی جارحیت اتے بے بنیاد الزاماں متعلق تفصیلی بریفنگ ݙتی ڳئی۔ پاکستانی سفارتی وفد دے سربراہ بلاول بھٹو زرداری بھارت ولوں پہلگام حملے کوں بغیر کہیں تحقیق دے پاکستان نال جوڑݨ دی کوشش کوں مسترد کر ݙتا۔ پارلیمانی وفد سندھ طاس معاہدے دی یکطرفہ معطلی کوں پاݨی کوں ہتھیار بݨاوݨ دی کوشش اتے بین الاقوامی قوانین دی سنگین خلاف ورزی قرار ݙتا۔ بعد اچ چیئرمین بلاول بھٹو زرداری اقوام متحدہ اچ او آئی سی ملکاں دے اجلاس توں خطاب کریندے آکھیے جو بھارتی جارحیت خطے کوں غیرمحفوظ بݨا ݙتے، دنیا کوں ایں خطرناک رجحان کوں معمول بݨݨ توں روکݨا ہوسی، بھارت کوڑے الزاماں کوں سرحد پار حملیں دا جواز بݨائے۔ انہاں پاکستان ولوں خطے اچ کشیدگی گھٹ کرݨ، ثالثی اتے جنگ بندی کیتے کردار ادا کرݨ تے او آئی سی دا شکریہ ادا کیتا۔ بلاول بھٹو آکھیے جو او آئی سی ایں نازک ویلھے اچ دنیا دا اخلاقی ضمیر بݨ تے سامݨے آئی اے، مسئلہ کشمیر دے منصفانہ حل کیتے حمایت جاری رکھی ونڄے۔ او آئی سی ملکاں پاکستان ولوں ݙتی ونڄݨ آلی شفاف بریفنگ دی تعریف کریندے یکجہتی دا اظہار کیتا اتے اقوام متحدہ دے چارٹر اتے معاہدیں دے احترام تے زور ݙتا۔