شنگھائی تعاون تنظیم دی رکنیت پاکستان کیتے اہمیت رکھیندی اے ، ایس سی او علاقائی تعاون اتے رکن ملکاں وچال تعلقات ودھاوݨ دا مؤثر پلیٹ فارم اے، سینیٹر محمد اورنگزیب

اسلام آباد۔3 جون (اے پی پی) وزیر خزانہ و محصولات، سینیٹر محمد اورنگزیب، آکھیے جو شنگھائی تعاون تنظیم دی رکنیت پاکستان کیتے اہمیت رکھیندی اے ، ایس سی او علاقائی تعاون اتے رکن ملکاں وچال تعلقات کوں ودھاوݨ دا مؤثر پلیٹ فارم اے، رکن ملکاں وچال سانجھے منصوبیں، ٹیکنالوجی دی منتقلی اتے صلاحیت ودھاوݨ دے پروگراماں دے موقع ودھاوݨ دی تجویز خوش آئند اے۔ انہاں اے ڳالھ چین دے دارالحکومت بیجنگ اچ منعقدہ ایس سی او رکن ملکاں دے وزرائے خزانہ اتے مرکزی بینکاں دے گورنرز دے اجلاس توں ورچوئل خطاب اچ آکھی۔ وزیر خزانہ اہم اجلاس دی میزبانی تے عوامی جمہوریہ چین دی حکومت دا شکریہ ادا کیتا۔ وزیر خزانہ آکھیے جو انہاں دی اجلاس اچ آپݨی ہتھیں شریک تھیوݨ دی خواہش ہئی تاں جو پاکستان اچ سالانہ بجٹ سیزن جاری ہووݨ پاروں شرکت ممکن نہ تھی سڳی۔ وزیر خزانہ اپݨے خطاب اچ پاکستان کیتے شنگھائی تعاون تنظیم دی رکنیت دی اہمیت کوں اُجاگر کیتا اتے تنظیم کوں علاقائی تعاون اتے رکن ملکاں وچال تعلقات کوں ودھاوݨ دا مؤثر پلیٹ فارم قرار ݙتا۔ انہاں ایس سی او دے منشور اتے “شنگھائی سپرٹ” دے اصولاں دے تحت علاقائی تعاون کوں اڳوں ودھاوݨ دے عزم دا اظہار کیتا۔ وزیر خزانہ خطے دی ترقی کیتے نویں موقعیں دی تلاش اچ ایس سی او دی سرگرمیاں دی تعریف کیتی اتے ایس سی او دے دائرہ کار اچ معاشی تعاون کوں مزید تکڑا بݨاوݨ کیتے پاکستان دے عزم کوں دوہرائے۔ وزیر خزانہ تنظیم علاقائی استحکام اتے خوشحالی دے ودھاوݨ اچ نمایاں کردار ادا کرݨ اتے رکن ملکاں وچال تجارت، سرمایہ کاری اتے مالیاتی تعاون کوں ودھاوݨ اچ ایس سی او دے کردار دی تعریف کیتی اتے رکن ملکاں وچال سانجھے منصوبیں، ٹیکنالوجی دی منتقلی اتے صلاحیت ودھاوݨ دے پروگراماں دے موقع ودھاوݨ دی تجویز دی وی حمایت کیتی۔ سینیٹر محمد اورنگزیب ڈیجیٹل معیشت اتے مالی شمولیت دی اہمیت دا ذکر کیتا اتے پاکستان دی معاشی ترقی اتے خوشحالی اچ ڈیجیٹل ٹیکنالوجی دے بھرپور استعمال کوں اُجاگر کیتا۔ وزیر خزانہ عالمی معیشت اچ سست روی، ودھدی ہوئی معاشی ناہمواریاں اتے ماحولیاتی تبدیلی جیھے وݙے مسئلیں دے سانجھے حل اتے رکن ملکاں کیتے ہکو ڄھیں مفید ترقیاتی ماڈل اپنائے ونڄݨ تے زور ݙتا۔ وزیر خزانہ معاشی ترقی اتے علاقائی رابطے ودھاوݨ اچ انفراسٹرکچر دی ترقی کوں اُجاگر کیتا اتے خطے اچ ٹرانسپورٹ، توانائی اتے ڈیجیٹل رابطیں کوں بہتر بݨاوݨ دے اقدامات دی حمایت کیتی۔ وزیر خزانہ ایس سی او ڈویلپمنٹ بینک دے قیام دے منصوبے دی بھرپور حمایت کیتی اتے اینکوں رکن ملکاں وچال ترقی اتے معاشی تعاون کوں ودھاوݨ، انفراسٹرکچر اتے ترقیاتی منصوبیں کیتے مالی وسائل ݙیوݨ اتے علاقائی رابطے اتے معاشی ہم آہنگی کیتے اہم قرار ݙتا۔ وزیر خزانہ بینک دے قیام دے تکنیکی پہلوواں دے حوالے نال پاکستان دے نقطہ نظر دا اُجاگر کریندے امید ظاہر کیتی مجوزہ بینک جدت، ڈیجیٹل فنانس، فن ٹیک سلوشنز اتے ماحول دوست مالیاتی طریقیں کوں آپݨیاں بنیادی سرگرمیاں دا حصہ بݨیسی۔ وزیر خزانہ ایس سی او نیٹ ورک آف فنانشل تھنک ٹینکس دی فعالیت دی تجویز دا وی خیر مقدم کیتا اتے امید ظاہر کیتی جو اے مالیاتی تعاون دے میدان اچ تحقیق، تجزیہ اتے مستقبل دی منصوبہ بندی کیتے بہترین پلیٹ فارم ثابت ہوسی۔ وزیر خزانہ اپݨے خطاب اچ پاکستان ولوں ایس سی او دے پلیٹ فارم ݙٹھے معاشی تعاون ودھاوݨ اتے خطے اچ معاشی خوشحالی، استحکام اتے پائیدار ترقی کوں ودھاوݨ اچ تعاون اتے آپسی مفاد کوں سامݨے رکھݨ دا عزم دوہرائے۔ وزیر خزانہ پاکستان اچ نمایاں معاشی استحکام گھنݨ اتے پائیدار اتے جامع معاشی ترقی دی تکڑی بنیاد رکھݨ کیتے مختلف شعبیں اچ کیتی ڳئی اصلاحات بالخصوص مالی نظم و ضبط، اہم معاشی اشاریں اچ بہتری، کرنٹ اکاؤنٹ خسارے اچ کمی، کرنسی دی قدر اچ استحکام اتے سرمایہ کاراں دے اعتماد اچ وادھا ودھݨ دا وی ذکر کیتا۔ ایں توں پہلے اجلاس توں خطاب کریندے چین دے وزیر خزانہ اتے گورنر پیپلز بینک آف چائنا پاکستان دی معاشی ترقی  دی تعریف کیتی اتے ملک اچ معاشی استحکام دے کامیاب حصول اتے اصلاحاتی ایجنڈے کوں اڳوں ودھاوݨ کیتے حکومت پاکستان کوں مبارخ باد پیش کیتی۔