وفاقی وزیر ریلوے اَتے ازبکستان دے سفیر علی شیر تختائف دی ملاقات، ازبکستان-افغانستان-پاکستان ریلوے ٹرانزٹ راہداری دے منصوبے تے ڳالھ مہاڑ

اسلام آباد۔ 3 جون (اے پی پی) وفاقی وزیر ریلوے محمد حنیف عباسی اَتے پاکستان اچ تعینات ازبکستان دے سفیر علی شیر تختائف دی ہک اہم ملاقات تھئی جیندے اچ ازبکستان-افغانستان-پاکستان ریلوے ٹرانزٹ راہداری دے منصوبے تے ڳالھ مہاڑ کیتی ڳئی۔ ایں ملاقات دا مقصد خطے اچ ریلوے شعبے اچ تعاون کوں مزید ودھاوݨ اَتے ایں تاریخی منصوبے دی تکمیل کیتے سانجھی حکمت عملی وضع کرݨ ہئی ݙوہیں رہنماواں ایں منصوبے کوں خطے دی اقتصادی ترقی اَتے تجارتی رابطے کوں مستحکم کرݨ کیتے سنگ میل قرار ݙتا۔ تقریباً 850 کلومیٹر لمبی ریلوے کنیکٹویٹی دے ایں منصوبے تے تعاون کوں حتمی شکل ݙیوݨ کیتے اتفاق رائے پاتا ڳئے جیندے اچ افغانستان اچ 647 کلومیٹر لمبی نویں ریلوے لائن دی تعمیر شامل اے۔ اے راہداری وسطی ایشیا اَتے جنوبی ایشیا وچال پہلا براہ راست ریلوے کوریڈور ہوسی جیڑھا خطے اچ تجارتی اَتے اقتصادی تعاون دے نویں رستے کھولیسی ۔ وزیر ریلوے محمد حنیف عباسی ایں موقع تے آکھیے جو منصوبے دی تکمیل دے بعد پاکستان کوں وسطی ایشیا تئیں سَاریں توں مختصر اَتے موثر ترین رستہ میسر ہوسی، جیڑھا نہ صرف تجارتی حجم اچ ودھارا کریسی بلکہ خطے دی معیشت کوں وی تکڑی بنیاداں تے استوار کریسی۔ انہاں مزید آکھیے جو اے ریلوے کوریڈور تجارت دے ویلھے اَتے لاڳت اچ نمایاں کمی دا باعث بݨسی جیندے نال سارے فریقین کوں فیدہ پُجسی۔ انہاں آکھیے جو ایں راہداری دے تحت سالانہ 15 ملین ٹن سامان دی ترسیل دی صلاحیت متوقع اے، جیڑھی خطے اچ برآمدات اَتے درآمدات دے حجم کوں بے مثال حد تئیں ودھاوݨ اچ مددگار ثابت تھیسی ۔ وزیر ریلوے ایں منصوبے کوں پاکستان دیاں بندرگاہواں توں وسطی ایشیا کوں براہ راست رسائی ݙیوݨ آلا ہک تاریخی سنگ میل قرار ݙتا جو عالمی تجارتی منڈیاں تئیں سوکھی رسائی کوں ممکن بݨیسی۔ ایں توں انڄ وزیر ریلوے ایں منصوبے دی اہمیت کوں چین دے بیلٹ اینڈ روڈ انیشیٹو دے تحت خطے اچ سرمایہ کاری اَتے انفراسٹرکچر دی ترقی دا اہم جزو قرار ݙتا۔ انہاں آکھیے جو اے منصوبہ خطے اچ نہ صرف معاشی رابطے کوں مستحکم کریسی بلکہ علاقائی امن اَتے استحکام اچ وی کلیدی کردار ادا کریسی۔ ملاقات اچ ازبکستان دے سفیر علی شیر تختائف پاکستان دے ریلوے سیکٹر اچ سرمایہ کاری دے وسیع موقع اَتے ݙوہیں ملکاں وچال تجارتی تعلقات کوں ودھاوݨ دے امکانات تے روشنی پاتی۔ انہاں ایں ڳالھ تے زور ݙتا جو سانجھے تعاون نال خطے اچ معاشی خوشحالی کوں ودھارا ݙتا ونڄ سڳدے اَتے ݙوہاں ملکاں دی عوام کیتے روزگار دے نویں موقع بݨائے ونڄ سڳدن۔ ݙوہیں رہنماواں افغانستان اچ امن و استحکام دے ودھارے کیتے ایں منصوبے دے ممکنہ مثبت اثرات دی تعریف کیتی تے اینکوں خطے کیتے ترقی اَتے امن دا ہک روشن مستقبل قرار ݙتا۔ ایں موقع تے انہاں ریلوے دے شعبے اچ تعاون کوں مزید گھاٹا کرݨ اَتے سانجھے ترقیاتی منصوبیں تے کم جاری رکھݨ دا عزم ظاہر کیتا۔ وزیر ریلوے محمد حنیف عباسی ازبکستان دے تجربیں توں استفادہ کریندے پاکستان اچ ریلوے دے نظام کوں جدید خطوط تے استوار کرݨ اَتے ریلوے دی کارکردگی کوں بہتر بݨاوݨ کیتے بھرپور اقدامات کرݨ دا وعدہ کیتا۔ ملاقات دے چھیکڑ تے ݙوہیں فریقین علاقائی تعاون کوں ودھاوݨ ، اقتصادی راہداریاں کوں فعال بݨاوݨ اَتے سانجھی ترقی کیتے سانجھے منصوبیں تے کم جاری رکھݨ دا عزم کیتے۔