سابق وزیر خارجہ بلاول بھٹو زرداری دی قیادت وچ پارلیمانی وفد دا اقوام متحدہ دے ہیڈ کوارٹرز دا دورہ مکمل

اسلام آباد۔ 4 جون (اے پی پی) پاکستان پیپلز پارٹی دے چیئرمین اتے سابق وزیر خارجہ بلاول بھٹو زرداری دی قیادت وچ ہک اعلیٰ سطحی پارلیمانی وفد نیویارک وچ اقوام متحدہ دے ہیڈ کوارٹرز دا ݙو ݙینھ دا دورہ مکمل کر ڳھدے۔ وفد اقوام متحدہ دے سیکرٹری جنرل، جنرل اسمبلی اتے سلامتی کونسل دے صدور، سلامتی کونسل دے مستقل اتے غیر مستقل ارکان دے نمائندیں، او آئی سی گروپ دے سفیراں، میڈیا، سول سوسائٹی اتے تھنک ٹینکس دے نمائندیں اتے پاکستانی کمیونٹی نال ملاقاتاں کیتیاں۔ ترجمان دفتر خارجہ توں جاری بیان موجب اے دورہ بھارت دے غیر ذمہ دارانہ رویے، پاکستان دے خلاف بلا اشتعال جارحیت، جارحانہ بیان بازی اتے پاݨی متعلق سندھ طاس معاہدہ جیڑھا 240 ملین توں ودھ پاکستانیاں کیتے لائف لائن ہے، کوں روکݨ دے غیر قانونی اتے یکطرفہ فیصلے نال پیدا تھیوݨ آلی ودھدی ہوئی علاقائی کشیدگی اتے بین الاقوامی امن و سلامتی کیتے خطرے دے بارے وچ اپݨا نقطہ نظر پیش کرݨ کیتے پاکستان دی بین الاقوامی رسائی دا حصہ ہئی۔ وفد دا پاکستان دا بنیادی سنھیا “ذمہ داری دے نال امن” ہئی۔ وفد بھارت دی طرفوں طاقت دے غیر قانونی استعمال اتے اقوام متحدہ دے چارٹر اتے بین الاقوامی انسانی قانون دی خلاف ورزیاں خاص طور تے شہری علاقیں کوں نشانہ بݨاوݨ اتے تریمتاں اتے نینگریں سودھا نشوم شہریاں دے قتل دے پاسےتوجہ ݙیوائی۔ وفد بھارت دے غیر قانونی زیر تسلط جموں و کشمیر وچ 22 اپریل دے دہشت گردانہ حملے دے حوالے نال بھارت دے بغیر کہیں ثبوت دے بے بنیاد الزاماں کوں مسترد کر ݙتا اتے بین الاقوامی قانون اتے معاہدیں دیاں ذمہ واریاں دی خلاف ورزی کریندے ہوئیں سندھ طاس معاہدہ کوں یکطرفہ طور تے روکݨ دے ذریعے بھارت دے پاݨی کوں ہتھيار بݨاوݨ دے خلاف خبردار کیتا۔ بیان موجب ہر قسم دی دہشت گردی نال نبݨݨ کیتے پاکستان دے عزم دا اعادہ کریندے وفد انسداد دہشت گردی دیاں عالمی کوششاں دی کامیابی وچ پاکستان دے اہم کردار اتے قربانیاں تے روشنی پاتی اتے عالمی برادری دی توجہ پاکستان وچ بھارت دی سرپرستی وچ تھیوݨ آلی دہشت گردی اتے ایندی بین الاقوامی قتل عام دی مہم دے پاسے ݙیوائی۔ وفد ایں ڳالھ تے زور ݙتا جو دہشت گردی دی لعنت نال موثر طریقے نال نݨݨ کیتے سیاست دی نی، تعاون دی لوڑھ اے۔ وفد بھارتی جارحیت اتے اشتعال انگیزیاں دے جواب وچ پاکستان دے ذمہ دارانہ، روک ٹوک اتے قانونی جواب تے زور ݙتا اتے آکھیے پاکستان امن چاہندے او ہمیشہ عزم دے نال اپݨی خودمختاری دا دفاع کریسی۔ پاکستان چتاوݨی ݙتی جو بھارت دی طرفوں ”نیو نارمل“ پیدا کرݨ دیاں کوششاں جو من مانی اتے یکطرفہ حملیں تے مبنی تھیون، جنوبی ایشیا دے جوہری ماحول وچ تباہ کن نتیجے دا باعث بݨ سڳدن اتے عالمی برادری کوں ایندی سختی نال مزاحمت کرݨی چا ہیدی اے۔ وفد ایں ڳالھ دا اعادہ کیتا جو جنوبی ایشیا وچ پائیدار امن اقوام متحدہ دی سلامتی کونسل دیاں قرارداداں اتے کشمیری عوام دیاں خواہشات دے موجب جھیڑا جموں و کشمیر دے منصفانہ اتے پرامن حل تے منحصر اے۔ بیان وچ مزید آکھیا ڳئے جو بین الاقوامی برادری تے زور ݙتا ڳئے جو او بین الاقوامی قانون اتے معاہدیں دے تقدس کوں برقرار رکھے، سندھ طاس معاہدے دی بحالی اتے ایندے معمول دے موجب چلݨ تے زور ݙیوے اتے جموں و کشمیر دے بنیادی جھیڑا سودھا بھارت اتے پاکستان دے وچال سارے تصفیہ طلب مسئلیں دے حل کیتے جامع مذاکرات دے آغاز دی حمایت کرے۔ وفد ایں واضح پیغام دے نال اپݨے دورے دا اختتام کیتا جو پاکستان اپݨے سارے پڑوسیاں نال برابری اتے سانجھے احترام تے مبنی پرامن، تعاون تے مبنی تعلقات دا چاہندے او جارحیت، استثنا، یا بین الاقوامی اصولاں دی خلاف ورزی کوں قبول نہ کریسی۔ وفد وچ وزیر موسمیاتی تبدیلی اتے ماحولیاتی رابطہ ڈاکٹر مصدق مسعود ملک، سینیٹ دی قائمہ کمیٹی موسمیاتی تبدیلی دی چیئرپرسن سینیٹر شیری رحمان؛ قومی اسمبلی دی قائمہ کمیٹی خارجہ امور دی چیئرپرسن اتے سابق وزیر خارجہ حنا ربانی کھر، سابق وزیر تجارت، دفاع اتے خارجہ امور انجینئر خرم دستگیر خان، وزیر سمندری امور سینیٹر سید فیصل علی سبزواری، سینیٹر بشریٰ انجم بٹ، سابق سیکرٹری خارجہ اتے سابق نگراں وزیر خارجہ جلیل عباس جیلانی اتے سابق سیکرٹری خارجہ تہمینہ جنجوعہ شامل ہن۔