وسطی ایشیائی ملکاں نال تجارتی رابطے ودھاوݨ کیتے ریلوے اپݨا نیٹ ورک وسیع کرݨ دی حکمت عملی ترتیب ݙیوے، وزیراعظم شہباز شریف دا اجلاس نال خطاب

اسلام آباد۔ 4 جون (اے پی پی) وزیراعظم محمد شہباز شریف ریلوے کوں جدید بنیاداں تے ترقی ݙیوݨ کوں قومی پالیسی دا اہم جزو قرار ݙیندے آکھیے جو ملکی معاشی اتے صنعتی ترقی کیتے ملک دے ریلوے انفراسٹرکچر دی پائیدار بنیاداں تے نویں سروں تعمیر کرݨ دی لوڑھ اے، وسطی ایشیائی ملکاں نال تجارتی رابطے ودھاوݨ کیتے ریلوے اپݨا نیٹ ورک وسیع کرݨ دے حوالے نال حکمت عملی ترتیب ݙیوے۔ وزیراعظم دفتر دے میڈیا ونگ توں جاری بیان دے موجب وزیراعظم اے ڳالھ اپݨی زیر صدارت پاکستان ریلویز متعلق امور تے اجلاس نال خطاب کریندے آکھی ۔ وزیراعظم آکھیے ریلوے نظام کہیں وی ملک دی معیشت وچ ریڑھ دی ہݙی دی حیثیت رکھیندے ، ملکی معاشی اتے صنعتی ترقی کیتے ملک دے ریلوے انفراسٹرکچر دی پائیدار بنیاداں تے تعمیر نو کرݨ دی لوڑھ اے، علاقائی تجارت تے رابطے کیتے ریلوے کوں جدید بنیاداں تے ترقی ݙیوݨ قومی پالیسی دا اہم جُز اے۔ انہاں ہدایت کیتی وسطی ایشیائی ملکاں نال تجارتی رابطے ودھاوݨ کیتے ریلوے کوں اپݨا نیٹ ورک وسیع کرݨ دے حوالے نال حکمت عملی ترتیب ݙتی ونڄے ۔ وزیراعظم گوادر کوں پاکستان ریلویز نیٹ ورک نال جوڑݨ دا کم تکھا کرݨ دی وی ہدایت کیتی۔ وفاقی وزیر ریلوے حنیف عباسی وزیراعظم کوں پاکستان ریلویز وچ جاری اصلاحات تے بریفنگ ݙیندے ݙسیا جو پاکستان ریلویز وچ مزید سرمایہ کاری دی بے پناہ استعداد اے، وݙے اتے اہم ریلوے اسٹیشناں تے جدید انفارمیشن ڈیسک بݨائے ویندے پئن، لاہور، راولپنڈی اتے ملتان دے ریلوے اسٹیشناں تے صفائی ستھرائی دا نظام آؤٹ سورس کیتا ڳئے، ریل گاݙیاں اتے ریلوے اسٹیشناں وچ ݙتی ویندی خوراک دی نگرانی دے حوالے نال ریلویز اتے صوبائی فوڈ اتھارٹیز رل تے کم کریندیاں پئن۔ بریفنگ وچ ݙسیا ڳیا جو عوام دی سہولت کیتے وݙے عرصے توں بند سروسز دا ݙوجھا آغاز کیتا ڳئے، بولان میل کوں روزانہ سروس دی بنیاد تے شروع کیتا ڳئے جݙاں جو دیرہ غازی خان اتے خوشحال خان خٹک ایکسپریس کوں وی بحال کیتا ڳئے، ریلوے دیاں سکھر، خانیوال اتے کوہاٹ وچ موجود کنکریٹ سلیپر فیکٹریاں کوں آؤٹ سورس کیتا ویندا پئے۔ وزیراعظم کوں ݙسیا ڳیا جو کراچی، لاہور، پشاور، کوئٹہ، ملتان اتے سکھر وچ موجود ریلوے دے ہسپتالاں، سکولاں، کالجاں اتے ریسٹ ہاؤسز کوں ریونیو شیئرنگ دی بنیاد تے آؤٹ سورس کیتا ویندا پئے، رائل پام گالف اینڈ کنٹری کلب لاہور کوں نیلام کیتا ویندا پئے جتھاں فائیو سٹار ہوٹل قائم تھیوݨ دی ساری استعداد موجود اے۔ بریفنگ وچ ݙسیا ڳیا جو ریلویز کوں جدید خطوط تے استوار کرݨ دے حوالے نال ڈیجیٹائزیشن دا کم تکھے کیتا ویندا پئے، ریلوے دے آئی ٹی ڈائریکٹوریٹ دی ری سٹرکچرنگ دا کم تکھے جاری اے، ریل گاݙیاں وچ مفت وائی فائی سروسز ݙتی ویندی پئی اے ، رابطہ موبائل فون ایپلی کیشن کوں وی جدید بݨایا ویندا پئے جئیں دے تحت ریل گاݙی ٹکٹ بک کیتے ونڄ سڳسن ۔ ایندے علاوہ 155 ریلوے اسٹیشناں کوں شمسی توانائی تے منتقل کیتا ویندا پئے جئیں نال حکومت کوں کئی ملین روپے دی بچت تھیسی، رائٹ سائزنگ پالیسی دے تحت 17101 آسامیاں ختم کیتیاں ڳئن جݙاں جو مزید 5695 آسامیاں مستقبل وچ ختم کیتیاں ویسن، بریفنگ دے موجب پاکستان ریلویز ایڈوائزری اینڈ کنسلٹنسی سروسز، ریل کاپ، پاکستان ریلویز فریٹ ٹرانسپورٹ کمپنی اتے پراجیکٹ امپلی منٹیشن یونٹ ختم کر ݙتے ڳئن، 10 ارب روپے دی مالیت دی ریلوے دی زمین واگزار کروائی ڳئی اے، حکومت پنجاب دے نال رل تے لاہور توں راولپنڈی وچال ہائی سپیڈ ریل گاݙی سروس، لاہور اتے راولپنڈی اسٹیشناں دی اپ گریڈیشن اتے ریلوے دی پنجاب وچ موجود اٹھ برانچ لائنز تے سب اربن ریل گاݙی سروسز دے منصوبیں تے کم کیتا ویندا پئے۔ بریفنگ وچ ݙسیا ڳئے جو شاہدرہ باغ توں کوٹ لکھپت تئیں ریلوے لائن دے ݙوہیں پاسوں گرین بیلٹ بݨائی ویسی جݙاں جو مین لائنز دے ݙوہں پاسوں پنجاب دے محکمہ جنگلات دے تعاون نال پھل دار ٻوٹے رادھے ویسن، حکومت بلوچستان دے نال رل تے سریاب-کچلاک اتے کوئٹہ-چمن ریلوے لائنز سیکشنز کوں اپ گریڈ کیتا ویسی۔ بیان موجب وزیراعظم پاکستان ریلویز وچ جاری اصلاحات اتے نویں منصوبیں دی رفتار تے وفاقی وزیر ریلوے حنیف عباسی کوں شاباش ݙتی۔ اجلاس وچ وفاقی وزیر ریلوے حنیف عباسی، وزیراعظم دے مشیر ڈاکٹر توقیر شاہ، وزیر مملکت ریلوے بلال اظہر کیانی اتے متعلقہ اعلیٰ سرکاری افسراں شرکت کیتی۔